ရန်ကုန်တိုင်း၊ လှိုင်မြို့နယ် EPC ရုံး၊ မရမ်းကုန်းတရားရုံး၊ တောင်ဒဂုံတို့တွင်လည်း ဗုံးပေါက်
ရန်ကုန်၊ ဩဂုတ် ၂၆
ပဲခူးတိုင်း၊ ဖြူးမြို့နယ် ဆာဂွန်းစစ်ဆေးရေးဂိတ်တွင် ယနေ့နံနက်ပိုင်း ချိန် ကိုက် ဗုံးပေါက်ကွဲပြီး လုံခြုံရေးတာဝန်ကျ ရဲတပ်ကြပ် မောင်နိုင်၏ အမျိုးသားတန်ဆာနှင့် မျက်လုံး ဗုံးထိမှန်ကာ အသက်အန္တရာယ်စိုးရိမ်နေရကြောင်း ရန်ကုန်ခေတ်သစ်၏ သတင်းရင်းမြစ်က အတည်ပြုပြောဆိုသည်။
ဩဂုတ်လ ၂၆ ရက်နေ့ နံနက် ၉ နာရီအချိန် ဖြူးမြို့ ဆာဂွန်းလုံခြုံရေးဂိတ်တွင် ဗုံးပေါက်ကွဲခြင်းဖြစ်ပြီး ရဲတပ်ကြပ် မောင်နိုင်အပါအဝင် ရဲ ၅ ဦးဒဏ်ရာရရှိကြောင်း၊ ရဲတပ်ကြပ်မောင်နိုင်သည် အမျိုးသားတန်ဆာနှင့် မျက်လုံးတွင် ဗုံးစ ထိ မှန်ပြီး အသက်အန္တရာယ်စိုးရိမ်ရကြောင်း သိရှိရသည်။
“ဖြူးမြို့နယ်၊ဆာဂွန်းဂိတ်မှာ ချိန်ကိုက်ဗုံးပေါက်ပါတယ်။ ရဲတွေ ဒဏ်ရာရပါတယ်။ ရဲတပ်ကြပ်မောင်နိုင် ေ-ွး နဲ့မျက်စိထိပြီး အခြေအနေ မကောင်းပါဘူး။ ဒီမနက် ၉ နာရီ ဝန်းကျင် ဖြူးမြို့နဲ့ အမြန်လမ်း ဆက်လမ်းပေါ် ဆာဂွန်းစစ် ဆေးရေးဂိတ်မှာ ချိန်ကိုက်ဗုံးပေါက်ကွဲတာပါ” ဟု ရန်ကုန်ခေတ်သစ်၏ သတင်းရင်းမြစ်က ပြောဆိုသည်။
ထို့ပြင် ရန်ကုန်တိုင်း၊ လှိုင်မြို့နယ် EPC ရုံး၊ တောင်ဒဂုံ မြို့နယ်နှင့် မရမ်းကုန်းမြို့နယ်တရားရုံးများတွင် ယနေ့ ဗုံးများပေါက်ကွဲကြောင်း သိရှိရသည်။
လှိုင်မြို့နယ် EPC ရုံးတွင် ယနေ့ မွန်းလွဲ ၃ နာရီ ၃၀ မိနစ်အချိန် ဗုံးပေါက်ကွဲခြင်းဖြစ်ပြီး စစ်တပ်က လမ်းပိတ် စစ်ဆေးကြောင်း ယင်းနောက် မပေါက်ကွဲသေးသော ဗုံးထပ်မံတွေ့ရှိ၍ ညနေ ၄ နာရီကျော်အချိန်တွင် ဖောက်ခွဲလိုက်ကြောင်း သိရှိရသည်။
လှိုင်မြို့နယ်၊ အင်းစိန်လမ်းမနှင့် ဘူတာရုံးမှတ်တိုင်အနီးရှိ လှိုင် EPC ရုံးကို Rangers of Region 7 က တိုက်ခိုက်ခြင်းဖြစ်ကြောင်း သိရှိရသည်။
ထို့ပြင် တောင်ဒဂုံမြိုနယ် ၁၀၄ တွင် ယနေ့ နံနက် ၁၀ နာရီ ၁၀ မိနစ် အချိန်ခန့် ဗုံးပေါက်ကွဲခဲ့ပြီး ပစ်ခတ်မှုများ ဖြစ်ပေါ်ကြောင်း၊ မရမ်းကုန်းမြို့နယ် တရားရုံးတွင်လည်း ယနေ့ မွန်းလွဲပိုင်းတွင် ဗုံးပေါက်ကွဲပြီး စစ်သား ၂ ဦးထိခိုက် ဒဏ်ရာရရှိကြောင်း ဒေသခံများထံမှ သိရှိရသည်။
ဓာတ်ပုံ- ဖြူးမြို့မရဲစခန်း။(ပုံအဟောင်းဖြစ်သည်)
