ရန်ကုန်၊ ဩဂုတ် ၂၉
ကရင်အမျိုးသားအစည်းအရုံး KNU ကော်သူးလေအုပ်ချုပ်နယ်မြေ၊ ကရင်ပြည်နယ်၊ မြဝတီ-ဝေါလေကားလမ်း ကျော်ဝါးဘိုးဘုရားအနီးတပ်စွဲထားသော အကြမ်းဖက်စစ်တပ်ကို KNLA ပူးပေါင်းတပ်ဖွဲ့က ဩဂုတ်လ ၂၈ ရက် ယမန်နေ့ ညသန်းခေါင်တွင် ဒရုန်းဖြင့် ဗုံးကျဲတိုက်ခိုက်ရာ အရာခံဗိုလ် ၁ ဦးအပါအဝင် ၂ ဦးသေဆုံးပြီး ၅ ဦး ဒဏ်ရာရကြောင်း သတင်းရရှိသည်။
ကော်ဘရာစစ်ကြောင်းနှင့် Federal Wings ဒရုန်းတပ်ဖွဲ့က ဒရုန်းဖြင့် ဗုံးကျဲတိုက်ခိုက်ခဲ့ခြင်းဖြစ်ပြီး အရာခံဗိုလ် ၁ ဦး၊ တပ်ကြပ်ကြီး ၁ ဦး သေဆုံးကာ အရာရှိ ၂ ဦး အပါအဝင် ၅ ဦးဒဏ်ရာရကြောင်း ကော်ဘရာစစ်ကြောင်းက သတင်းထုတ်ပြန်သည်။
“၂ ဦး သေတယ်၊ ဗိုလ်တစ်ဦးကတော့ တပိုင်းပြတ်သွားတယ်၊ မသေသေးဘူး၊ ၅ ဦးဒဏ်ရာရတယ်” ကော်ဘရာစစ်ကြောင်းပြန်ကြားရေးက ရန်ကုန်ခေတ်သစ်သို့ ပြောဆိုသည်။
အကြမ်းဖက်စစ်တပ်သည် ကုန်းကြောင်း လေကြောင်းဖြင့် အင်အားအလွန်အကျွံသုံးကာ ကော်ဘရာစစ်ကြောင်း လုံခြုံရေးယူထားသည့် သုံးထပ်ကွေ့ကို တိုက်ခိုက်ပြီးနောက် ကျော်ဝါးဘိုး ဘုရားအနီးတွင် တပ်စွဲထားခြင်းဖြစ်သည်။
မြဝတီ-ဝေါလေလမ်းပိုင်းရှိ သေ့ဘောဘိုးစခန်းနှင့် ဥကရစ်ထ စစ်တပ်စခန်းများကို KNLA၊ KNDO ပူးပေါင်းတပ်ဖွဲ့များက တိုက်ခိုက်သိမ်းပိုက်ပြီးနောက် အကြမ်းဖက်စစ်တပ်က အဆိုပါလမ်းပိုင်းကို ပြန်လည်စိုးမိုးနိုင်ရန် အင်အားအလွန်အကျွံသုံးကာ တိုက်ခိုက်လာနေခြင်းဖြစ်သည်။
ဓါတ်ပုံ – ကျော်ဝါးဘိုးဘုရားအနီး တွေ့ရသော အကြမ်းဖက်စစ်သားများ
