ရန်ကုန်၊ အောက်တိုဘာ ၁၉
ချင်းပြည်နယ် အတွင်း ဟားခါးနှင့် ထန်တလန် အကြားဖြစ်ပွားခဲ့သော ၆ ရက်တာ တိုက်ပွဲအတွင်း အကြမ်းဖက် စစ်တပ်မှ စစ်သား ၂၅ ဦး ထက်မနည်း သေဆုံးကြောင်း သိရသည်။
အောက်တိုဘာ ၁၃ရက်မှ ၁၈ရက်နေ့အထိ ဟားခါးနှင့်ဟထန်တလန် အကြားတိုက်ပွဲများ ဖြစ်ပွားခဲ့ပြီး အကြမ်းဖက် စစ်တပ်ဘက်မှ ၂၅ ဦးထက်မနည်း သေဆုံးကာ CNA နှင့် CDF ဘက်မှ ၄ဦး ကျဆုံးကြောင်း သိရသည်။
ထတလန်မြို့မှ ဟားခါးသို့ စစ်ကူလာသော အင်အား ၄၀ ခန့်ပါ အကြမ်းဖက် စစ်ကြောင်းကို ဒေသခံ ကာကွယ်ရေး တပ်ဖွဲ့များက ကြာညှပ်တိုက်ခိုက်ခဲ့ပြီး စစ်တပ်ဘက်မှ လေကြောင်း အကူအညီများဖြင့်ပါ ပြန်လည် တိုက်ခိုက်ခဲ့ကြောင်း သိရသည်။
အကြမ်းဖက် စစ်တပ် စစ်ကြောင်းကို CNA၊ CDF-Hakha၊ CDF-Thantlang၊ CDF-Lautu၊ CDF-Mara နှင့် CDF-Zophei တို့ ပူးပေါင်းကာ တိုက်ခိုက်ခဲ့ခြင်းဖြစ်ပြီး အကြမ်းဖက် စစ်တပ်ဘက်မှ ၂၅ ဦးသေဆုံးကာ CNA ရဲဘော် ၃ ဦးနှင့် CDF-Hakha ရဲဘော် ၁ ဦး ကျဆုံးခဲ့ကြောင်း Chin National Front (CNF) တပ်ဖွဲ့က ထုတ်ပြန်ထားသည်။
အလားတူ ဖယ်ခုံ- မိုးဗြဲ- လွိုင်ကော် လမ်းပိုင်းတွင် အကြမ်းဖက် စစ်တပ် စစ်ကြောင်း တိုက်ခိုက်ခံရပြီး ၄ ဦးသေဆုံးကြောင်း ဖယ်ခုံ PDF တပ်ဖွဲ့ထံမှ သိရသည်။
အောက်တိုဘာလ ၁၆ ရက်နေ့ နံနက် ၃ နာရီက ဖယ်ခုံ- မိုးဗြဲ- လွိုင်ကော် လမ်းပိုင်းကို စစ်ကြောင်း ထိုးလာသည့် အကြမ်းဖက် စစ်တပ်ကို ဖယ်ခုံ PDF တပ်ရင်း ၂ နှင့် KNDF B 03 တို့က ကြားဖြတ်တိုက်ခိုက်ခဲ့ပြီး စစ်သား ၄ ဦး သေဆုံးကာ MA သေနတ် ၁ လက်နှင့် ခဲယမ်း တချို့ သိမ်းဆည်း နိုင်ခဲ့ကြောင်း သိရသည်။
အောက်တိုဘာလ ၁၇ ရက်နေ့တွင် မိုးဗြဲမြို့ အတွင်းရှိ ခလရ ၁၄ မှ တပ်သား ၂ ဦး ဖယ်ခုံ PDF တပ်ရင်း ၂ ထံ CDM လာရောက် ပြုလုပ်လာခဲ့ပြီး ခလရ ၁၄ တပ်အတွင်း တပ်သားတစ်ဦးမှ ဒုတပ်ရင်းမှူးကို ပစ်သတ်တဲ့ ဖြစ်စဥ်များ ပြောဆိုခဲ့ကြောင်း၊ တပ်တွင်း အုပ်ချုပ်ရေး ပြဿနာများ ရှိနေပြီး ထွက်ပြေးသူများ များပြားနေကြောင်း ဖယ်ခုံ PDF တပ်ဖွဲ့ထံမှ ထုတ်ပြန်ထားသည်။
