ရန်ကုန်၊ နိုဝင်ဘာ ၁၇
စစ်ကိုင်းတိုင်း၊ ဝက်လက်မြို့နယ်တွင် စစ်တပ် စစ်ကြောင်း မိုင်းဆွဲခံရပြီး အရာရှိတစ်ဦး အပါအဝင် စစ်သား ၂ ဦးသေဆုံးကြောင်း သိရသည်။
နိုဝင်ဘာလ ၁၇ ရက်နေ့ နံနက် ၇ နာရီခန့်တွင် ဝက်လက်မြို့နယ် လှတောကျေးရွာ ရဲစခန်းမှ စစ်သားများသည် လှတောဈေးတန်းဘက်သို့ ထွက်ခွာလာစဥ် ဒိုင်ကွင်း ရှေ့အရောက်တွင် မိုင်းဆွဲ တိုက်ခိုက်ခံရပြီး ဗိုလ်ကြီး ၁ ဦး အပါအဝင် တပ်သား ၁ ဦး သေဆုံးခဲ့ကြောင်း သိရသည်။
“ပြင်းအားလွန် မိုင်းတစ်လုံးနဲ့ ဖောက်ခွဲ တိုက်ခိုက်တာ ၃ ပွင့်ဗိုလ်တစ်ဦးနဲ့ တပ်သား အဆင့်ရှိသူ ၁ ဦး သေတယ်။ ၃ ဦး အပြင်းအထန် ဒဏ်ရာ ရတယ်။ မိုင်းခွဲခံရတဲ့ အဖွဲ့က စစ်ခွေးတွေက အနီးအနားမှာ ရှိတဲ့ ရွာတွေ လက်နက်ကြီး လက်နက်ငယ်တွေနဲ့ ရမ်းသမ်းပစ်ခတ်ပြီး အလောင်းနဲ့ ဒဏ်ရာရတဲ့ သူတွေကို ကားနဲ့ လာခေါ်ဆောင်သွားတယ်။ ဒီတိုက်ခိုက်မှုက အောက်တိုဘာလအတွင်း ကျဆုံးခဲ့တဲ့ BLACK WOLF PDF မှ ရဲဘော် ၄ ဦး ၏ ကိုယ်စား လက်စားခြေ တိုက်ခိုက်ခြင်း ဖြစ်တယ်” BLACK WOLF PDF မှ ရဲဘော် တစ်ဦးက ပြောဆိုသည်။
အဆိုပါ မိုင်းဆွဲ တိုက်ခိုက်မှုကို BLACK WOLF PDF နှင့်ဒေသခံ (ပကဖ) ပင်လယ်မုန်တိုင်း ပြောက်ကျားတပ်ဖွဲ့တို့က ပါဆယ်မိုင်းဖြင့် ဖောက်ခွဲ တိုက်ခိုက်ခဲ့ခြင်း ဖြစ်ကြောင်း သိရသည်။
