ဝက်လက်၊ စိုင်နိုင်ကွေ့ရွာ၌ တပ်စွဲထားသော စစ်တပ်ကို တိုက်ခိုက်မှု ၂ ဦးသေဆုံး၊ လောင်းလုံးတွင် ပျူစောထီးများ လိုက်ပါလာသည့် သုံးဘီးယာဥ်ကို မိုင်းဆွဲ တိုက်ခိုက်
ရန်ကုန်၊ ဖေဖော်ဝါရီ ၆
စစ်ကိုင်းတိုင်း၊ ဝက်လက်မြို့နယ်၊ စိုင်နိုင်ကွေ့ရွာ၌ တပ်စွဲထားသော စစ်တပ်ကို PDF တပ်ဖွဲ့များ ဝင်ရောက် တိုက်ခိုက်မှု စစ်သား ၂ ဦးသေဆုံးခဲ့ကြောင်း ပြည်သူ့တော်လှန်ရေးတပ်ဦး (ဝက်လက် PRF) မှ တာဝန်ရှိသူ တစ်ဦးက ရန်ကုန်ခေတ်သစ် မီဒီယာသို့ ပြောဆိုသည်။
ဖေဖော်ဝါရီလ ၅ရက်နေ့ ညနေ ၄ နာရီခန့်တွင် ဝက်လက်မြို့နယ်၊ စိုင်နိုင်ကွေ့ရွာ၌ တပ်စွဲထားသော အကြမ်းဖက် စစ်တပ်ကို ဒေသခံကာကွယ်ရေး တပ်ဖွဲ့များက ဝင်ရောက် တိုက်ခိုက်ခဲ့ပြီး စစ်သား ၂ ဦးသေဆုံးခဲ့ကြောင်း သိရသည်။
အဆိုပါ ထိတွေ့ တိုက်ပွဲသည် မိနစ် ၃၀ ကျော်ကြာမြင့်ခဲ့ပြီး အပြန်အလှန် ပစ်ခတ်မှုအတွင်း စစ်သား ၂ ဦး သေဆုံးကာ ပြည်သူ့ တော်လှန်ရေး ရဲဘော်များ အထိအခိုက်မရှိ ပြန်လည် ဆုတ်ခွာနိုင်ခဲ့ကြောင်း ပြည်သူ့တော်လှန်ရေးတပ်ဦး (ဝက်လက်PRF) မှ တာဝန်ရှိသူ တစ်ဦးက ပြောဆိုသည်။
ယင်းတိုက်ခိုက်မှုကို ပြည်သူ့တော်လှန်ရေးတပ်ဦး (ဝက်လက်PRF) ရဲဘော်များနှင့် မဟာမိတ်တပ်ဖွဲ့များဖြစ်သည့် GZ Special Task Force၊ တော်ဝင်ဖီးနစ်၊ ရွှေဘိုခရိုင်တပ်ရင်း၂၃ တို့က ပူးပေါင်း လုပ်ဆောင်ခဲ့ကြောင်း သိရသည်။
ထို့ပြင် တနင်္သာရီတိုင်း၊ လောင်းလုံးမြို့နယ်တွင် ပျူစောထီးများ လိုက်ပါလာသည့် သုံးဘီးယာဥ်ကို မိုင်းဆွဲ တိုက်ခိုက်ခဲ့ကြောင်း LLPDF တပ်ဖွဲ့က တာဝန်ရှိသူ တစ်ဦးက ရန်ကုန်ခေတ်သစ် မီဒီယာသို့ ပြောဆိုသည်။
ဖေဖော်ဝါရီလ ၆ ရက်နေ့ နံနက် ၁၀ နာရီ ၃၀ မိနစ်တွင် လောင်းလုံးမြို့နယ်နှင့် စမ်းလှမ်းကျေးရွာ လမ်းမကြီးပေါ်တွင် လောင်းလုံးမြို့နယ် ပြည်သူ့ကာကွယ်ရေး တပ်ဖွဲ့ LLPDF တပ်ဖွဲ့က မိုင်းဆွဲ တိုက်ခိုက်ခဲ့ပြီး ထိခိုက်သေဆုံးမှု အခြေအနေကို အတည်မပြုနိုင်သေးကြောင်း သိရသည်။
“စမ်းလှမ်းရွာမှာ ဘုရားပွဲကျင်းပဖို့ ဘုရားထီး ပင့်ဆောင်လာတဲ့ ပျူစောထီးအဖွဲ့ရဲ့ ရှေ့တော်ပြေး မောင်းနှင်းလာတဲ့ စမ်းလှမ်း ပျူစောထီးခေါင်းဆောင် လိုက်ပါလာတဲ့ သုံးဘီးယာဥ်ကို မိုင်းဆွဲ တိုက်ခိုက်ခဲ့တယ်။ ထိခိုက်သေဆုံးမှု အခြေအနေတော့ အတည်မပြုနိုင်သေးဘူး” ဟု လောင်းလုံးမြို့နယ် ပြည်သူ့ကာကွယ်ရေး တပ်ဖွဲ့ LLPDF တပ်ဖွဲ့မှ တာဝန်ရှိသူ တစ်ဦးကပြောဆိုသည်။
