ဆိပ်ဖြူမြို့နယ်ရှိ ကပစ ၂၁ ကို ရှော့တိုက်ဒုံးဖြင့် ပစ်ခတ်တိုက်ခိုက်
ရန်ကုန်၊ ဧပြီ ၁၈
မကွေးတိုင်း၊ ဆိပ်ဖြူမြို့နယ်၊ ကန်စွန်းမရွာရှိ အမှတ် ၂၁ ကာကွယ်ရေးပစ္စည်းစက်ရုံကို PDF တပ်ဖွဲ့က ရှော့တိုက်ဒုံးဖြင့် ပစ်ခတ်တိုက်ခိုက် ခဲ့ကြောင်း NUG အစိုးရ ကာကွယ်ရေးဝန်ကြီးဌာန မှ သိရသည်။
ဧပြီလ ၁၆ ရက်နေ့ ညနေ ၃ နာရီမှ ၄ နာရီ ၁၀ မိနစ်အထိ ဆိပ်ဖြူမြို့နယ်၊ ကန်စွန်းမကျေးရွာ အခြေစိုက် အမှတ် ၂၁ ကာကွယ်ရေး ပစ္စည်းစက်ရုံကို ပြည်သူ့ကာကွယ်ရေးတပ်မတော် PDF မင်းဘူးခရိုင် အမှတ် ၁ တပ်ရင်းနှင့်ဒေသ တပ်ရင်းများ ပူးပေါင်းကာ ရှော့တိုက်ဒုန်းများ၊ Rocket များဖြင့် ပစ်ခတ်တိုက်ခိုက်ခဲ့ကြောင်း သိရသည်။
တိုက်ခိုက်မှုအတွင်း အကြမ်းဖက် စစ်တပ်၏ ကာကွယ်ရေး ပစ္စည်း ထုတ်လုပ်သည့် အဆောက်အဦးအတွင်းသို့ ကျရောက် ပေါက်ကွဲခဲ့ပြီး ထုတ်လုပ်ရေးစက်ရုံပျက်စီးကာ ရန်သူ့တပ်သားများ ထိခိုက်သေဆုံးမှုရှိကြောင်း ကာကွယ်ရေးဝန်ကြီးဌာနက ထုတ်ပြန်ထားသည်။
