ရန်ကုန်၊ ဖေဖော်ဝါရီ ၁၄
ရန်ကုန်တိုင်း၊ မြောက်ဥက္ကလာပမြို့နယ်ရှိ အောင်မင်္ဂလာအဝေးပြေးဝင်းရှေ့ရှိ စစ်ကြောရေး စခန်းကို ဖေဖော်ဝါရီလ ၁၃ ရက်နေ့ ညပိုင်းတွင် ဗုံးသစ်လက်နက်ဖြင့် ပစ်ခတ်ခဲ့ကြောင်း Dictator Revolt Front (D.R.F)က ထုတ်ပြန်သည်။ ဖေဖော်ဝါရီလ ၁၃ ရက်နေ့ ည ၈ နာရီ ၀၃ မိနစ်အချိန်တွင် မြောက်ဥက္ကလာပမြို့နယ်၊ အောင်မင်္ဂလာအဝေးပြေးဝင်းရေ့ရှိ စစ်ကောင်စီ၏ စစ်ကြောရေးစခန်းကို ၄၀ မမ ဗုံးပစ်လောင်ချာဖြင့် ပစ်ခတ်တိုက်ခိုက်ခဲ့ကြောင်း၊ စစ်ကောင်စီတပ်ဖွဲ့ဝင်များ၏ ထိခိုက်မှု အခြေအနေကို မသိရှိရသေးကြောင်း၊ ၁၀၇ နှစ်ပြည့် ဗိုလ်ချုပ်မွေးနေ့ အထိမ်းအမှတ် အဖြစ် တိုက်ခိုက်ခြင်းဖြစ်ကြောင်း D.R.F က ပြောဆိုထားသည်။ ခရေပင်လမ်းခွဲအနီးတွင် နေထိုင်သူတစ်ဦးက “မနေ့ညက ပေါက်ကွဲသံ တော့ကြားရတယ်။ ပစ်ခတ်သံလည်းကြားရတယ်။ ည ၇ ခွဲကျော်ရင် လမ်းပေါ်မယ် လူက သိပ်မရှိတော့ဘူး” ဟု ပြောဆိုသည်။ အလားတူ ယမန်နေ့ညပိုင်း ရန်ကုန်တိုင်း၊ သန်လျင်မြို့နယ် ကျောက်တန်း-သန်လျင် လမ်းမကြီး အောင်သပြေ(သီလဝါ)လမ်းဆုံ အနီးရှိ သီလဝါနယ်မြေခံ ရဲစခန်းကို တိုက်ခိုက်မှုတရပ်ဖြစ်ပွားကြောင်း ၊ ဗုံးသုံးလုံးဆင့်ပေါက်ကွဲမှု ဖြစ်ပွားခဲ့ပြီး အသံကျယ်လောင်စွာကြားရကြောင်း ဒေသခံများထံမှ သိရှိရသည်။ “ဗုံးပစ်သွားတယ်လို့တော့ကြားတယ်။ ဘယ်လိုတွေဖြစ်လဲ တိတိကျကျ မသိဘူး” ဟု သန်လျင်ဒေသခံတစ်ဦးက ပြောသည်။
ဓာတ်ပုံ- အောင်မင်္ဂလာအဝေးပြေးဝင်းရှေ့ အရှိ စစ်ကြောရေးစခန်း အုတ်တံတိုင်း။
