ရန်ကုန်၊ ဖေဖေါ်ဝါရီ ၁၆
မကွေးတိုင်း၊ ဂန့်ဂေါမြို့နယ်၊ မင်းရွာရှိ အကြမ်းဖက်စစ်ကောင်စီ စစ်သားနှင့် ရဲများတပ်စွဲထားသော ရဲစခန်းကို ယောဒေသကာကွယ်ရေးတပ် YDF နှင့် မြိုင် PDF တို့က ဖေဖေါ်ဝါရီလ ၁၀ ရက် ည ၇ နာရီ ၂၀ မိနစ်တွင် ဝင်ရောက်တိုက်ခိုက်ရာ စစ်ကောင်စီဘက်မှ ၂၀ ဦး သေဆုံးကာ ၁၈ ဦး ဒဏ်ရာပြင်းထန်ကြောင်း YDF က သတင်းထုတ်ပြန်သည်။
စစ်ကောင်စီဘက်မှ အများအပြားသေဆုံးသော်လည်း အဆိုပါစခန်းကို သိမ်းပိုက်နိုင်ခြင်းမရှိဘဲ YDF မှ ရဲဘော် ၁ ဦး ကျဆုံးကာ ၁ ဦး ဒဏ်ရာရရှိပြီး ပြန်လည် ဆုတ်ခွာလာခဲ့ကြောင်း သိရှိရသည်။
ဖေဖေါ်ဝါရီလ ၁၁ ရက်နံနက်တွင် အကြမ်းဖက်စစ်ကောင်စီ တပ်ကူအများအပြား အဆိုပါ မင်းရွာ ရဲစခန်းသို့ အင်အားဖြည့်တင်းလာကြောင်း၊ YDF က ပတ်ဝန်းကျင်ကို ဆက်လက်ပိတ်ဆို့ထားမှုကြောင့် ဒဏ်ရာရ စစ်ကောင်စီ စစ်သားများကို ကယ်ထုတ်နိုင်ခြင်းမရှိသေးကြောင်း YDF က ဆိုသည်။
အလားတူ ကရင်နီပြည်နယ်တွင် ဖေဖေါ်ဝါရီလ ဒုတိယပတ်အတွင်း စစ်ကောင်စီတပ်နှင့် ကရင်နီပူးပေါင်းတပ်ဖွဲ့ကြား တိုက်ပွဲများဖြစ်ပွားခဲ့ပြီး စစ်ကောင်စီဘက်မှ ဗိုလ်အဆင့် အရာရှိ ၁ ဦးအပါအဝင် ၈ ဦးထက်မနည်းသေဆုံးကြောင်း ကရင်နီအမျိုးသားများကာကွယ်ရေးတပ်ဖွဲ့ KNDF က သတင်းထုတ်ပြန်သည်။
ဖေဖေါ်ဝါရီလ ၁၀ ရက် နံနက် ၇ နာရီ ၁၅ မိနစ်တွင် လွိုင်ကော်မြို့နယ်၊ ဖာတီမာကျေးရွာအနီး၌ စစ်ကောင်စီတပ်နှင့် ကရင်နီတပ်မတော် KA၊ KNDF တို့ကြား ဖြစ်ပွားသောတိုက်ပွဲသည် ညနေ ၄ နာရီခွဲအထိ ကြာမြင့်ခဲ့ပြီး စစ်ကောင်စီဘက်မှ ၇ ဦး သေဆုံးပြီး အများအပြား ဒဏ်ရာရကြောင်း သိရှိရသည်။
အထိနာသော စစ်ကောင်စီတပ်သည် သံချပ်ကာအမြှောက်ကားများပါ အသုံးပြု၍ ကရင်နီတပ်ဖွဲ့ကို တိုက်ခိုက်လာသလို ဖာတီမာနှင့် ပါကျဲကျေးရွာများရှိ အရပ်သား ပြည်သူ ၂ ဦးကို သတ်ဖြတ်ကာ နေအိမ်များကို မီးရှို့ဖျက်ဆီးခဲ့ကြသည်။
ဖေဖေါ်ဝါရီလ ၁၀ ရက်နေ့ မွန်းလွဲ ၁ နာရီခွဲခန့်တွင် ဖယ်ခုံမြို့နယ်၊ ခေါင်းမိုင်ကျေးရွာအနီး အင်အား ၁၀၀ ခန့်ရှိသော စစ်ကောင်စီတပ်ဖွဲ့ကို ကရင်နီတပ်ဖွဲ့က မိုင်းဆွဲတိုက်ခိုက်ရာ ထိခိုက်သေဆုံးမှုများရှိကြောင်း၊ ဖေဖေါ်ဝါရီလ ၉ ရက်နေ့တွင် ဖယ်ခုံမြို့နယ်၊ ပင်ပုံကျေးရွာတွင်တပ်စွဲထားသော စစ်ကောင်စီတပ်နှင့် လက်ပါးစေ PNO ပြည်သူ့စစ်တပ်ဖွဲ့ကို ကရင်နီပူးပေါင်းတပ်ဖွဲ့က တိုက်ခိုက်ရာ စစ်ကောင်စီမှ ဗိုလ်အဆင့် အရာရှိ ၁ ဦးသေဆုံးကြောင်း KNDF က ဆိုသည်။
ဒီးမော့ဆိုမြို့နယ်တွင်လည်း တိုင်းပွဲများ ပြင်းထန်ခဲ့ပြီး ဒီးမော့ဆိုမြို့မရဲစခန်းတွင် တပ်စွဲထားသော ငွေတောင်အခြေစိုက် ခလရ ၁၀၂ နှင့် ခမရ ၄၂၇ တပ်ရင်းများကို ကရင်နီပူးပေါင်းတပ်ဖွဲ့က တိုက်ခိုက်ခဲ့ရာ စစ်ကောင်စီဘက်မှ ထိခိုက်ကျဆုံးမှုများ ရှိခဲ့ကြောင်း၊ ဖေဖေါ်ဝါရီလ ၁၂ ရက်နှင့် ၁၃ ရက်များတွင် လွိုင်ကော်မြို့နယ်၊ မြို့ပေါ်ရပ်ကွက်များနှင့် မှုံပြာကျေးရွာရှိ ရေကန်အနီးတွင်လည်း တိုက်ပွဲများ ပြင်းထန်ခဲ့ပြီး စစ်ကောင်စီ၏ ထိခိုက်သေဆုံးမှုကို အတည်မပြုနိုင်သေးကြောင်း KNDF က ထုတ်ပြန်ထားသည်။
