ရန်ကုန်၊ ဖေဖော်ဝါရီ ၁၉
ကရင်ပြည်နယ်၊ ကော့ကရိတ်မြို့နယ်ရှိ စစ်တပ်နှင့် စီးပွားရေး ဆက်စပ် လုပ် ကိုင်နေသော ခရိုနီဦးချစ်ခိုင်ပိုင် Denko ဆီဆိုင်တွင် ယနေ့ မွန်းလွဲပိုင်း ဗုံး ၂ လုံးပေါက်ကွဲပြီး မီးလောင်သွားကြောင်း ဒေသခံများက ရန်ကုန်ခေတ်သစ်သတင်းဌာနသို့ ပြောဆိုသည်။
ဖေဖော်ဝါရီ ၁၉ ရက်နေ့ မွန်းလွဲ ၃ နာရီ ၄၅ မိနစ်တွင် ဗုံးပေါက်ကွဲပြီး မီးလောင်သွားခြင်းဖြစ်ကြောင်း ဒေသခံတစ်ဦးက ရန်ကုန်ခေတ်သစ်သတင်းဌာနသို့ ပြောဆိုသည်။
“ကော့ကရိတ်မြို့နယ်၊ သာမည အထွက်၊ ကော့ကဒါ က Denko ဆီဆိုင် ဗုံးပေါက်ကွဲတယ်။ ဗုံးက နှစ်လုံးဆင့်ပေါက်တာ အသံတော်တော်ကျယ်တယ်။ ပြီးတော့ မီးထလောင်တယ်။ အချိန်က ၃ နာရီ ၄၅ မိနစ်မှာ ဗုံးနှစ်လုံးဆင့်ပေါက်ပြီး မီးလောင်တာပါ။ ထိခိုက်သူမရှိပါဘူး” ဟု ဒေသခံက ရန်ကုန်ခေတ်သစ်သတင်းဌာနသို့ ပြောဆိုသည်။
ရန်ကုန်တွင်လည်း မကြာသေမီးက Denkoဆီဆိုင်များမှ ငွေသိမ်းသည့်ကားတစ်စီး ဖေဖော်ဝါရီလ ၇ ရက်နေ့ တောင်ဒဂုံမြို့နယ်အတွင်းတွင် တားဆီးခံရပြီး ငွေများကို သိမ်းဆည်းခံရမှု ဖြစ်ပွားခဲ့သေးသည်။
ယခင် စစ်ခေါင်းဆောင် သန်းရွှေလက်ထက်တွင် ကြီးပွားချမ်းသာလာသော ဦးချစ်ခိုင်သည် ဘဏ်လုပ်ငန်းနှင့် ဆီဆိုင်၊ ဆောက်လုပ်ရေးလုပ်ငန်း အပါအဝင် စီးပွားရေးလုပ်ငန်းများစွာ လုပ်ကိုင်နေသူလည်းဖြစ်သည်။ သဘာ၀ ပတ်ဝန်း ကျင်ထိခိုက်မှုများစွာရှိနေသည့် ရှမ်းပြည်နယ်မှ တီကျစ်ကျောက် မီးသွေးဓာတ် အားပေးစက်ရုံကို ဦးချစ်ခိုင်၏ဧဒင်ကုမ္ပဏီနှင့်တရုတ်ကုမ္ပဏီတို့ ပူးတွဲ လုပ်ကိုင်လျက်ရှိသည်။
