ရန်ကုန်၊ မတ် ၃၀
အကြမ်းဖက်စစ်ကောင်စီ တပ်ဖွဲ့ဝင်များအနေဖြင့် ပြည်သူကို ညှင်းပန်းနှိပ်စက်သတ်ဖြတ်နေသော စစ်အာဏာရှင် လက်ပါးစေအဖြစ် ဆက်လက်မလုပ်ကိုင်ဘဲ ကျိုက်ထိုတော်လှန်ရေးအင်အားစုနှင့် ဆက်သွယ်ပြီး ပြည်သူ့ရင်ခွင်ခိုလှုံမည်ဆိုပါက ပါရှိသည့် လက်နက်အမျိုးအစားအလိုက် ဆုကြေးငွေများ ချီးမြှင့်သွားမည်ဟု KRF က ထုတ်ပြန်သည်။
စစ်ကောင်စီတပ်သားများအနေဖြင့် လက်နက်ငယ် ၁ လက် ယူဆောင်လာလျှင် သိန်း (၃၀) ကျပ်၊ RPG (သို့) ၄၀ မမ (သို့) ၆၀ မမ လက်နက်ကြီး ၁ လက်လျှင် သိန်း (၅၀) ကျပ်၊ ကျည်ဘောက် (Magazine) ၁ ကတ်လျှင် ၅ သောင်းကျပ်၊ လက်နက်ငယ် ကျည်ဆံ ၁ တောင့်လျှင် ၅၀၀ ကျပ်၊ လက်နက်ကြီး ကျည်ဆံ ၁ ခု လျှင် ၅ သောင်းကျပ်၊ လက်ပစ်ဗုံးသီး ၁ လုံးလျှင် ၁ သောင်းကျပ် ချီးမြှင့်ခံရမည်ဖြစ်ကြောင်း KRF က ဆိုသည်။
“လက်ရှိ ကျနော်တို့ဆီမှာ CDM ပြလုပ်ထားတဲ့ စစ်သား ၈ ယောက်ရှိပါပြီ၊ သူတို့လာတာ လက်နက်တော့ မပါဘူး၊ နောက်ပိုင်း လက်နက်နဲ့ ပါလာရင် ထိုက်တန်တဲ့ ဆုကြေးငွေပေးအပ်မှာပါ’ ဟု ကျိုက်ထိုတော်လှန်ရေးအင်အားစု KRF တာဝန်ခံက ရန်ကုန်ခေတ်သစ်သတင်းဌာနသို့ ပြောဆိုသည်။
ယင်းအပြင် ပြည်သူ့ရင်ခွင်သို့ ခိုလှုံလာသော စစ်သားများကို လုံခြုံစိတ်ချရသော လွတ်မြောက်နယ်မြေသို့လည်းကောင်း၊ သွားလိုသော အရပ်ဒေသသို့လည်းကောင်း ချိတ်ဆက်ပို့ဆောင်ပေးမည်ဖြစ်ကြောင်း ကျိုက်ထိုတော်လှန်ရေးအင်အားစုက ထုတ်ပြန်ထားသည်။
