ရန်ကုန်၊ ဧပြီ ၁၅
ကရင်နီပြည်နယ်တွင် ၂၀၂၂ ခုနှစ်၊ ဧပြီလ ဒုတိယတပတ်အတွင်း အကြမ်းဖက်စစ်ကောင်စီတပ်နှင့် ကရင်နီပူးပေါင်းတပ်ဖွဲ့ကြား တိုက်ပွဲများပြင်းထန်ခဲ့ပြီး စစ်ကောင်စီဘက်မှ ၄၈ ဦးသေဆုံးကာ အများအပြား ထိခိုက်ဒဏ်ရာရကြောင်း၊ ကရင်နီပူးပေါင်းတပ်ဖွဲ့မှ ရဲဘော် ၁၀ ဦး ကျဆုံးသွားကြောင်း ကရင်နီအမျိုးသားများကာကွယ်ရေးတပ် KNDF က သတင်းထုတ်ပြန်သည်။
ဧပြီလ ၁၂ ရက်နေ့တွင် အကြမ်းဖက်စစ်ကောင်စီသည် ဒီးမော့ဆိုမြို့နယ်သို့ လေကြောင်းတိုက်ခိုက်မှု ၁၀ ကြိမ်ထက်မနည်းပြုလုပ်ခဲ့ကြောင်း၊ အများပြည်သူ နေအိမ်များကို မီးရှို့ဖျက်ဆီးခြင်း၊ ကျေးရွာများအတွင်း မြေမြှုပ်မိုင်းများ ထောင်ခြင်းများ ပြုလုပ်ခဲ့ကြောင်း KNDF က ဆိုသည်။
ဧပြီလ ဒုတိယတပတ်အတွင်း ကရင်နီပြည်နယ် ဒီးမော့ဆို၊ ဖရူဆို၊ ဘော်လခဲမြို့နယ်များတွင် တိုက်ပွဲများ ဖြစ်ပွားခဲ့ကြောင်း သိရှိရသည်။
တိုက်ပွဲများအတွင်း အကြမ်းဖက်စစ်ကောင်စီ စစ်ကား ၁ စီးနှင့် မြေတူးစက် ၁ စီးကို ဖျက်ဆီးနိုင်ခဲ့ကြောင်း KNDF က ထုတ်ပြန်ထားသည်။
ဓါတ်ပုံ – ဒီးမော့ဆိုမြို့နယ် အိုးခူးရီကျေးရွာတွင် ဖြစ်ပွားသော တိုက်ပွဲမြင်ကွင်း
