ရန်ကုန်၊ မေ ၄
ကချင်ပြည်နယ်၊ ဖားကန့်မြို့နယ် လုံးခင်းအုပ်စု မှော်ပုံကျေးရွာကို မေလ ၃ ရက်နေ့ ည ၇ နာရီ ၄၅ မိနစ်အချိန်တွင် အကြမ်းဖက်စစ်ကောင်စီက လက်နက်ကြီးများဖြင့် ရမ်းသမ်းပစ်ခတ်မှုကြောင့် အပြစ်မဲ့ပြည်သူနှစ်ဦး လက်နက်ကြီးထိမှန်၍ သေဆုံးသွားကြောင်း ဒေသခံများက ရန်ကုန်ခေတ်သစ်သို့ ပြောကြားသည်။
သေဆုံးသွားသူများမှာ ဦးရုံးကွေ အသက် (၆၃)နှစ်နှင့် ဦးမောင်ထူး အသက် (၄၅)နှစ်တို့ ဖြစ်ကြပြီး လက်နက်ကြီး ကျစဥ် နေရာတွင်ပင် သေဆုံးသွားကြခြင်းဖြစ်သည်။
“ဦးရုံးကွေ အသက် (၆၃)နှစ် ထမင်းဆိုင်ပိုင်ရှင်ပါ။ ရှမ်းလူမျိုး။ ဦးမောင်ထူးက အသက် (၄၅)နှစ် ဈေးဝယ်လာသူ။ တိုက်ပွဲမဖြစ်ဘဲ စစ်တပ်က တမင်တကာ ပစ်ခတ်ခဲ့တာပါ” ဟု ဒေသခံတစ်ဦးက ရန်ကုန်ခေတ်သစ်သို့ ပြောကြားသည်။
စစ်တပ်က လက်နက်ကြီးများကို တိုက်ပွဲဖြစ်ပွားခဲ့ခြင်းမရှိဘဲ တစ်ဖက်သတ် ပစ်ခတ်ခဲ့ခြင်းဖြစ်ပြီး မေ ၄ ရက်နေ့ မနက်ပိုင်းကလည်း လက်နက်ကြီး ၂ လုံး ပစ်ခတ်ခဲ့ပြီး တစ်လုံးပေါက်ကွဲခဲ့ပြီး တစ်လုံးမကွဲခဲ့ကြောင်း ဒေသခံများထံမှ သိရှိရသည်။
