ရန်ကုန်၊ ဇွန် ၂
ပဲခူးတိုင်း၊ ပဲခူးမြို့တွင် ကားရပ်မပေးဟုဆိုကာ စစ်တပ်နှင့်ရဲက ရဲအုပ်သီဟကို ဇွန်လ ၁ ရက်နေ့ ညနေပိုင်းတွင် ပစ်သတ်လိုက်ကြောင်း ဒေသခံများက ရန်ကုန်ခေတ်သစ်သတင်းဌာနသို့ ပြောဆိုကြသည်။
ဇွန်လ ၁ ရက်နေ့ ညနေ ၅ နာရီ ၃၀ မိနစ်ဝန်းကျင်အချိန် ပဲခူးတက္ကသိုလ်အနီး မီးပွိုင့်တွင် ရဲနှင့်စစ်တပ်က ကားနှင့်ဆိုင်ကယ်များကို တားဆီးစစ်ဆေးမှုများ လုပ်ဆောင်ကြောင်း၊ ထိုအချိန်တွင် ရဲအုပ်သီဟ မောင်းနှင်လာသော အိမ်စီးကားသည် ကုန်ကားနှင့်ကွယ်ပြီး တားဆီးစစ်နေသော နေရာကို ကျော်လွန်သွားကြောင်း၊ ထိုသို့ ကျော်လွန်ကားရပ်ပေးသဖြင့် ရဲနှင့်စစ်တပ်က ကားတံခါးကို ဆွဲဖွင့်ပြီး ယာဉ်မောင်းသူကို ပစ်ခတ်သဖြင့် ရဲအုပ်သီဟမှာ နေရာတွင်ပင် ပွဲချင်းပြီး သေဆုံးသွားကြောင်း သိရှိရသည်။
“ပစ်ခတ်ခံရပြီး သေဆုံးတာက ရဲအုပ် သီဟ လို့သိရတယ်။ ပစ်တဲ့ ရဲခွေးနဲ့ စစ်ခွေးတွေက မူးနေကြတယ်လို့ ပြောတယ်။ သူတို့လည်း ပစ်သတ်ပြီးမှ ရှာဖွေမှ ရဲမှန်းသိတာလို့ ပြောတယ်။ အချင်းချင်းတောင် အဲဒီလိုတွေ သတ်နေမှတော့ သာမန် ပြည်သူတွေဆို ဘယ်လောက်ခံရမလဲစဉ်းစားသာကြည့်ပါ။
ရဲအုပ်သီဟ၏ ရုပ်အလောင်းကို ဆေးရုံပို့ဆောင်ထားပြီး မိသားစုက အမှုဖွင့်တိုင်ကြားရန်ရှိနေကြောင်း၊ ပဲခူးမြို့ခံများအကြား ရဲအုပ်သီဟ ပစ်သတ်ခံရမှုအပေါ် ရည်ရွယ်ချက်ရှိရှိ ပစ်ခတ်သတ်ဖြတ်ခြင်းဟု သုံးသပ်ကြကြောင်း မြို့ခံများက ပြောဆိုသည်။
“ကားတံခါးဆွဲဖွင့်ပြီး ဘာမှ မမေးမမြန်းဘဲ ပစ်သတ်တာက ရည်ရွယ်ချက်ရှိရှိ ပစ်သတ်တာလို့ပဲ ပြောရမယ်။ ပစ်တာကလည်း ရဲ၊ သေတာကလည်းရဲမို့လို့ တော်သေးတယ်။ ဒီလုပ်ရပ်က ပြည်သူထင်လို့ သတ်ဖြတ်ရင်း သူတို့အချင်းချင်း ဖြစ်သွားတာ။ ဒီလိုလုပ်တာက ပြည်သူတွေကို အနိုင်ကျင့်တာလို့ ထင်ပါတယ်” ဟု ပဲခူးဒေသခံတစ်ဦးက ပြောဆိုသည်။
ဓာတ်ပုံ- ရဲက ပစ်ခတ်၍ သေဆုံးသူ ရဲအုပ် သီဟ။
