ရိုဟင်ဂျာလူမျိုးတုန်းသတ်ဖြတ်မှုနှင့်ပတ်သက်ပြီး ဂမ်ဘီယာက တရားစွဲခွင့်မရှိဟု မြန်မာဘက်က ကန့်ကွက်ထားမှု ICJ တရား ရုံးက ဇူလိုင် ၂၂ ရက်နေ့ အမိန့်ချ ဆုံးဖြတ်မည်

ရန်ကုန်၊ ဇူလိုင် ၁၂

ကုလသမဂ္ဂ၏ အပြည်ပြည်ဆိုင်ရာတရားရုံး ICJတွင် ဂမ်ဘီယာနိုင်ငံက ရိုဟင်ဂျာလူမျိုးတုန်းသတ်ဖြတ်မှု နှင့်ပတ်သက်ပြီး တရားစွဲထားမှုတွင် ဂမ်ဘီယာအနေဖြင့် မြန်မာနိုင်ငံကို တရားစွဲဆိုခွင့်မရှိဟု မြန်မာနိုင်ငံဘက်က ကန့် ကွက်ထားမှုအပေါ် လာမည့် ဇူလိုင်လ ၂၂ ရက်နေ့တွင် ICJ တရားရုံးက အပြီးသတ်ဆုံးဖြတ်ချက် ချမည်ဖြစ်ကြောင်း ICJ က တရားဝင် ထုတ်ပြန်သည်။

အဆိုပါဆုံးဖြတ်ချက် ချမှုကို ဇူလိုင်လ ၂၂ ရက်နေ့ ဒေသစံတော်ချိန် ညနေ ၃ နာရီတွင် ပြုလုပ်မည်ဖြစ်ပြီး သက်ဆိုင်ရာ နိုင်ငံများမှ ကိုယ်စားလှယ်များ တက်ရောက်ကြမည်ဖြစ်ကြောင်း၊ အများပြည်သူများအနေဖြင့် UN Web TV ၊ ICJ Website အပါအဝင် တိုက်ရိုက် ထုတ်လွှင့်မှုများမှတစ်ဆင့် အမှုဆုံးဖြတ်ချက်ကို စောင့်ကြည့်နိုင်ကြောင်း ICJ က ထုတ်ပြန်သည်။

ICJ တွင် လူမျိုးတုန်းသတ်ဖြတ်မှုဖြင့် တရားစွဲဆိုမှုကို NLD အစိုးရလက်ထက်တွင် ဒေါ်အောင်ဆန်းစုကြည်က ဦးဆောင်တရားရင်ဆိုင် ဖြေရှင်းခဲ့ပြီး အကြမ်းဖက် မင်းအောင်လှိုင် လက်ထက်တွင်မူ မင်းအောင်လှိုင် ခန့်အပ်ထားသော ကိုကိုလှိုင် ဦးဆောင်သည့်အဖွဲ့က ရင်ဆိုင်ဖြေရှင်းလျက်ရှိကြောင်း သိရှိရသည်။