ရန်ကုန်၊ အောက်တိုဘာ ၁၆
စစ်ကိုင်းတိုင်း၊ ချောင်းဦးမြို့နယ်ရှိ ကျေးရွာ ၄ ရွာကို အကြမ်းဖက် စစ်တပ်က ရွာလုံးကျွတ် နီးပါး မီးရှို့ဖျက်ဆီးဝင်ရောက်စီးနင်းသဖြင့် ပြည်သူ ၈၀၀၀ ကျော် ထွက်ပြေးနေရကြောင်း ဒေသခံ ပြည်သူများထံမှ သိရသည်။
အောက်တိုဘာလ ၁၅ ရက်နေ့တွင် မှန်ချိုကျေးရွာ၊ မထိသာကျေးရွာ၊ မလုံးတင်ကျေးရွာ၊ ဆင်ပြေကျေးရွာတို့ကို စစ်တပ်က ရွာလုံးကျွတ် နီးပါး မီးရှို့ ဖျက်ဆီးခဲ့ကြောင်း၊ ယင်းကျေးရွာ ၃ ရွာမှ ပြည်သူများ အပါအဝင် အနီးဝန်းကျင်ရှိ ကျေးရွာများမှ ပြည်သူ ၈၀၀၀ ကျော် ဘေးလွတ်ရာသို့ ထွက်ပြေးတိမ်းရှောင်နေရကြောင်း၊ ဆင်မြေရွာကို အကြမ်း ဖက် စစ်တပ်က လက်နက်ကြီးများဖြင့် ရမ်းသမ်း ပစ်ခတ် ခဲ့သောကြောင့် အမျိုးသမီး တစ်ဦး လက်နက်ကြီးထိမှန်ကာ ဒဏ်ရာ အခြေအနေ စိုးရိမ်ရကြောင်း သိရသည်။
စစ်တပ်က မှန်ချိုရွာကို အောက်တိုဘာလ ၁၄ ရက်နေ့မှ စတင်ကာ ၂ ရက်ဆက်တိုက် မီးရှို့ဖျက်ဆီးခဲ့ပြီး အောက်တိုဘာလ ၁၅ ရက်နေ့ နံနက်ပိုင်းတွင် ဆင်မြေရွာ၊ မထိသာရွာနှင့် မလုံတင်ရွာတို့ကို ဆက်လက် စီးနင်း မီးရှို့ ဖျက်ဆီး ခဲ့ခြင်းဖြစ်ကြောင်း သိရသည်။
” ချောင်းဦး မြို့နယ် မှန်ချို၊ မထိသာ၊ မလုံးတင်နဲ့ ဆင်ပြေရွာတွေကို စစ်ခွေးတွေက မီးတင်ရှို့နေတယ်။ မီးက ရွာလုံးကျွတ်နီးနီး အရှိုးခံလိုက်ရတာ တော်တော်များတယ်။ အောက်တိုဘာလ ၁၅ ရက်နေ့ ညအချိန်ထိ ၃ ရွာက မီးမငြိမ်းသေးဘူး။ ထွက်ပြေးတိမ်းရှောင်နေရတဲ့ ပြည်သူတွေကလည်း ၈ ထောင်ကျော်လောက်ရှိတယ်။ စစ်ရှောင်တွေအတွက်လည်း အရေးပေါ် အကူအညီတွေ လိုအပ်နေတယ်။ စစ်ခွေးတွေက လက်နက်ကြီးတွေနဲ့ ရမ်းပစ်လို့ ဆင်မြေရွာက အမျိုးသမီး တစ်ယောက်ကို ထိမှန်တယ်။ ဒဏ်ရာ အခြေအနေ စိုးရိမ်ရတယ်။ ဖမ်းခံရတဲ့ စစ်ဘေးရှောင်တချို့လည်းရှိတယ်။ သူတို့က ရွာဘေး ကပ်ရှောင်တော့ စစ်ခွေးတွေ တောနင်းရှာတဲ့အချိန် စိုက်ခင်းတွေထဲမှာမိတာ မထိသာရွာမှာပါ။ အခု စစ်ခွေးတွေက စစ်ကြောင်း ၃ ကြောင်းခွဲထားတယ်။ ရွာတွေထဲကို ပြည်သူတွေလည်း ပြန်မဝင်ရဲသေးဘူး” ဟု ဒေသခံ ပြည်သူ တစ်ဦးကပြောဆိုသည်။
အောက်တိုဘာလ ၁၅ ရက်နေ့ နံနက်ပိုင်းတွင် မထိသာရွာကို မီးရှို့ဖျက်ဆီးသော အကြမ်းဖက် စစ်တပ်နှင့် ကာကွယ် ရေး တပ်ဖွဲ့များ တိုက်ပွဲ ဖြစ်ပွားခဲ့ကြောင်း၊ တိုက်ပွဲအတွင်း အကြမ်းဖက် စစ်တပ်မှ ပစ်ခတ်သော လက်နက်ကြီး ထိမှန်ကာ PDF ရဲဘော် ၄ ဦးကျဆုံးခဲ့ကြောင်း၊ အကြမ်းဖက် စစ်တပ်မှလည်း လက်နက်နှင့် လူအင်အားများ ထပ်မံဖြည့်တင်းထားကြောင်း ဒေသခံပြည်သူများက ဆက်လက်ပြောဆိုသည်။
