ရန်ကုန်၊ ဒီဇင်ဘာ ၂၁
မကွေးတိုင်း၊ မြိုင်နယ်၊ ကန်နီရွာရှိ စစ်ကောင်စီ တပ်သားများကို MVRF တပ်ဖွဲ့က လက်နက်ကြီးများဖြင့် ပစ်ခတ်တိုက်ခိုက်ခဲ့ကြောင်း MVRF တပ်ဖွဲ့မှ တာဝန်ရှိသူ တစ်ဦးက ရန်ကုန်ခေတ်သစ် မီဒီယာသို့ ပြောဆိုသည်။
ဒီဇင်ဘာလ ၂၁ ရက်နေ့ နံနက် ၆ နာရီ ၁၅ မိနစ်ခန့်တွင် Myaing Villages Revolution Front – MVRF တပ်ဖွဲ့မှ ကန်နီရွာ အတွင်းရှိ အကြမ်းဖကိ စစ်ကောင်စီ တပ်သားများကို လက်နက်ကြီးများ၊ Rocket များဖြင့် ပစ်သွင်းတိုက်ခိုက်ခဲ့ခြင်းဖြစ်ကြောင်းသိရသည်။
ယင်းသို့ တိုက်ခိုက်ခြင်းသည် ကန်နီရွာ၌ တပ်စွဲထားသော အကြမ်းဖက် စစ်တပ်က ဘေးပတ်ဝန်းကျင်ရှိ ကျေးရွာများကို လက်နက်ကြီးများဖြင့် ရမ်းသမ်းပစ်ခတ်ခဲ့သောကြောင့် Myaing Villages Revolution Front – MVRF တပ်ဖွဲ့မှ သွားရောက် တိုက်ခိုက် ခဲ့ခြင်းဖြစ်ပြီး စစ်ကောင်စီ တပ်သားများ ထိခိုက်သေဆုံးမှု အရေအတွက်ကို အတည်မပြုနိုင်သေးကြောင်း သိရသည်။
ထို့ပြင် ကချင်ပြည်နယ် မိုးကောင်းမြို့ပြင်တွင် အကြမ်းဖက် စစ်ကောင်စီ ယာဉ်တန်းကို မိုင်းဆွဲတိုက်ခိုက်ခဲ့ကာ ပစ်ခတ် တိုက်ခိုက်ခဲ့ကြောင်း UG BLACK K အဖွဲ့မှ တာဝန်ရှိသူတစ်ဦးကပြောသည်။
ဒီဇင်ဘာလ ၂၀ ရက်နေ့ ညနေ ၆ နာရီ ၁၅ မိနစ်တွင် မိုးကောင်းမြို့ပြင်၌ စစ်ကားတစ်စီးနှင့် စစ်သားများ လိုက်ပါလာသည့် အိမ်စီးကား ၅ စီးကို ဒေသခံကာကွယ်ရေး တပ်ဖွဲ့များက မိုင်းဆွဲတိုက်ခိုက်ခဲ့ခြင်းဖြစ်ကြောင်း၊ မိုင်းဆွဲတိုက်ခိုက်မှုကြောင့် ကားတစ်စီးထိုး ရပ်သွားစဉ် လက်နက်ကြီး လက်နက်ငယ်များဖြင့် ဝိုင်းဝန်းတိုက်ခိုက်ခဲ့ခြင်းဖြစ်ကြောင်း၊ အကြမ်းဖက် စစ်ကောင်စီ ဘက်မှ အသေဆုံး ထိခိုက်ဒဏ်ရာစာရင်းကိုတော့ မသိရသေးကြောင်း UG BLACK K အဖွဲ့မှ တာဝန်ရှိသူတစ်ဦး ရှင်းပြသည်။
အကြမ်းဖက်စစ်ကောင်စီယာဉ်တန်းဘက်မှလည်း ပြန်လည်ပစ်ခတ်ခဲ့ပြီး အကြမ်းဖက်စစ်ကောင်စီ အင်အားအလွန်များပြားခြင်းကြောင့် UG BLACK K တပ်ဖွဲ့မှ အထိအခိုက်မရှိ ပြန်လည်ဆုတ်ခွာ ခဲ့နိုင်ခဲ့ကြောင်း သိရသည်။
