မလှိုင်မြို့နယ်၊ နှောကန်ရဲစခန်းကို PDF တပ်ဖွဲ့များ ဝင်ရောက် တိုက်ခိုက်၊ မုံရွာမြို့ပေါ်ရှိ ယာဥ်ထိန်းရဲကင်း ကို လက်ပစ်ဗုံး ပစ်သွင်းတိုက်ခိုက်
ရန်ကုန်၊ ဧပြီ ၁၅
မန္တလေး၊ မလှိုင်မြို့နယ်၊ နှောကန်ရဲစခန်းကို PDF တပ်ဖွဲ့များ ဝင်ရောက် တိုက်ခိုက်ခဲ့ကြောင်း ဒေသပြည်သူများ ထံမှ သိရသည်။
ဧပြီလ ၁၅ ရက်နေ့ ညနေ ၄ နာရီ ၄၅ မိနစ်တွင် မလှိုင်မြို့နယ်၊ နှောကန်ရဲစခန်းကို PDF တပ်ဖွဲ့များက လက်နက်ကြီး၊ လက်နက်ငယ်များဖြင့် ဝိုင်းဝန်း ပစ်ခတ် တိုက်ခိုက်ခဲ့ကြောင်း သိရသည်။
အဆိုပါ တိုက်ပွဲတွင် နှောကန် နယ်မြေ ရဲစခန်းမှ ရဲ ဒုတပ်ကြပ် နေလင်းထွန်းတွင် လက်မောင်း ကျည်ထိမှန်ခဲ့ကြောင်း၊ အကြမ်းဖက် စစ်တပ်က အင်အား အလုံးအရင်းဖြင့် စစ်ကူလာသောကြောင့် PDF တပ်ဖွဲ့များ ဆုတ်ခွာခဲ့ရကြောင်း သိရှိရသည်။
ထို့ပြင် စစ်ကိုင်းတိုင်း၊ မုံရွာမြို့ပေါ်ရှိ ယာဥ်ထိန်းရဲကင်း ကို လက်ပစ်ဗုံး ပစ်သွင်းတိုက်ခိုက်ခဲ့ကြောင်း Area71 အဖွဲ့ထံမှ သိရသည်။
ဧပြီလ ၁၄ ရက်နေ့ မွန်းလွဲ ၂ နာရီ ၃၀ မိနစ်တွင် မုံရွာမြို့ ဗဟိုမဏ္ဍပ် အနီး မုံရွာ၊ တမာတန်းလမ်းဆုံ မီးပွိုင့်၌ အရပ်ဝတ်ဖြင့် လက်နက်ကိုင်ဆောင်ကာ လုံခြုံရေး ယူထားသည့် စစ်သား ၃ ဦးရှိသော ယာဥ်ထိန်းရဲကင်းကို လက်ပစ်ဗုံး ပစ်သွင်းတိုက်ခိုက်ခဲ့ကြောင်း သိရသည်။
အဆိုပါ လက်ပစ်ဗုံးသည် ယာဥ်ထိန်း ရဲကင်းဂိတ်ကို ထိမှန်ခဲ့ပြီး စစ်သားများ ထိခိုက်သေဆုံးမှု ရှိမရှိကို အတည်မပြု နိုင်သေးကြောင်း သိရသည်။
ယင်း တိုက်ခိုက်မှုကို Area 71 အဖွဲ့နှင့် Ronin Thirteen people force အဖွဲ့တို့က ပူးပေါင်း လုပ်ဆောင်ခဲ့ကြောင်း သိရသည်။
