ပခုက္ကူ-ကမ္မ-ပေါက် လမ်းပိုင်းကို အသုံးပြုနေသည့် ပြည်သူများအနေဖြင့် PDF တပ်ဖွဲ့များ၏ စစ်ဆေးမှုနှင့် စည်းကမ်းချက်များကို လိုက်နာကြရန် ပကဖ ထုတ်ပြန်
ရန်ကုန်၊ ဇွန် ၃၀
မကွေးတိုင်း၊ ပခုက္ကူ-ကမ္မ-ပေါက် လမ်းပိုင်းကို အသုံးပြုနေသည့် ပြည်သူများအနေဖြင့် PDF တပ်ဖွဲ့များ၏ စစ်ဆေးမှုနှင့် စည်းကမ်းချက်များကို လိုက်နာကြရန် ပခုက္ကူ မြို့နယ် ပကဖ က အသိပေး ထုတ်ပြန်လိုက်ကြောင်း သိရသည်။
ပခုက္ကူ-ကမ္မ-ပေါက် လမ်းပိုင်းကို ဖြတ်သန်းသွားလာမည့် မော်တော်ကား၊ မော်တော် ဆိုင်ကယ်များအနေဖြင့် နေ့စဉ်ညနေ ၆ နာရီမှ နံနက် ၆ နာရီ အတွင်း ဖြတ်သန်းသွားလာခြင်း မပြုကြရန်၊ မော်တော်ကားများ မောင်းနှင်သွားလာရာ၌ ကားမှန်ချ၍ အရှိန်လျော့ မောင်းနှင် ကြရန်၊ မြို့နယ်ပကဖနှင့် တော်လှန်ရေးအဖွဲ့အစည်းအသီးသီးက လိုအပ်ချက်အရ စစ်ဆေးမှု ပြုလုပ်သည့်အခါ ကြည်ဖြူစွာစစ်ဆေးမှုခံယူရန်နှင့် စစ်ကောင်စီတပ်ဖွဲ့ဝင်များ၊ ယင်းတို့၏ ထောက်တိုင်များနှင့် ယှဉ်တွဲသွားလာခြင်းမပြုရန် စသည့် အချက် ၄ ချက်တို့ ဖြစ်ကြောင်းသိရသည်။
အဆိုပါ အချက်များအား လေးစား လိုက်နာကြပါရန်နှင့် ပျက်ကွက်ပါက နောက်ဆက်တွဲ ကိစ္စရပ်များကို တာဝန်ယူမည်မဟုတ်ကြောင်း ပခုက္ကူ မြို့နယ် ပကဖ က အသိပေး ထုတ်ပြန်ထားသည်။
ပခုက္ကူ-ကမ္မ-ပေါက် လမ်းပိုင်းကို ဖြတ်သန်းသွားလာကြသော ဒေသ ပြည်သူများနှင့် အနီးတဝိုက်တွင် နေထိုင်ကြသော ပြည်သူများ အနေဖြင့် ယင်းလမ်းပိုင်းနှင့် ပတ်သက်ပြီး လိုက်နာရန် စည်းကမ်းချက်များကို ပခုက္ကူမြို့နယ် ပကဖက ဇွန်လ ၂၅ ရက်နေ့တွင် ထုတ်ပြန် ကြေညာထားသော်လည်း လိုက်နာဆောင်ရွက်မှု အားနည်းနေသောကြောင့် ပခုက္ကူ-ကမ္မ- ပေါက် လမ်းပိုင်းနှင့် ပတ်သက်၍ သတိပေးကြေညာချက်ကို လိုက်နာဆောင်ရွက်သွားရန် ထပ်မံ ထုတ်ပြန် ကြေညာခြင်းဖြစ်ကြောင်းသိရသည်။
