ပေါင်မြို့နယ်၊ ဇင်းကျိုက်နယ်မြေရဲစခန်းမှ နယ်ထိန်းရဲတပ်သား ထွန်းနိုင်လင်း ပစ်ခတ်ခံရပြီး သေဆုံး
ရန်ကုန်၊ ဩဂုတ် ၁၃
မွန်ပြည်နယ်၊ ပေါင်မြို့နယ်၊ ဇင်းကျိုက်နယ်မြေရဲစခန်းမှ နယ်ထိန်းရဲတပ်သား ထွန်းနိုင်လင်း ပစ်ခတ်ခံရပြီး သေဆုံးသွားကြောင်း ရဲသတင်းရင်းမြစ်ထံမှ သိရှိရသည်။
ဩဂုတ်လ ၁၂ ရက်နေ့ ညနေ ၄ နာရီ ၅၂ မိနစ်အချိန် ပေါင်မြို့နယ်၊ ဇင်းကျိုက် နယ် မြေရဲစခန်း၊ ပန်းကုန်းကျေးရွာမှ နယ်ထိန်းရဲတာဝန်ထမ်းဆောင်နေသော ရဲတပ်သား ထွန်းနိုင်လင်းသည် သထုံဘက်မှ ရဲစခန်းသို့ ပြန်လာကြောင်း၊ ပေါင်မြို့နယ်၊ ရန်ကုန် – မော်လမြိုင်လမ်းမကြီး၊ ပန်းကုန်းကျေးရွာ၊ ရပ်ကွက် ၂ ပိုင်း၊ ဦးကရင်ထမင်းဆိုင်အနီး လမ်းကွေ့ တွင် သေနတ်ဖြင့် ပစ်ခတ်ခံရပြီး ပွဲချင်းပြီး သေဆုံးသွားကြောင်း သိရှိရသည်။
” ဇင်းကျိုက်ရဲစခန်း၊ ပန်းကုန်းကျေးရွာ နှင့် ကတွန်ကျေးရွာ အပိုင်နယ်ထိန်း ရဲတပ်သား ထွန်းနိုင်လင်း ပစ်ခတ်ခံရပြီး ပွဲချင်းပြီးဆုံးတယ်။ သေနတ်နဲ့ ၃ ချက် အပစ်ခံရတယ်။ ရန်ကုန်-မော်လမြိုင် ကားလမ်း တံတားအမှတ် ၁/၁၆၅ အနီးမှာ အပစ်ခတ်ခံရတာ။ အရပ်ဝတ်နဲ့ ခဏ သွားပြီး ပြန်လာတဲ့အချိန် အပစ်ခံရတာပါ။ ကြည့်ရတာ ပစ်မယ့်သူက ချောင်းနေတာထင်တယ်” ဟု ဇင်းကျိုက်နယ်မြေရဲစခန်းမှ ရဲ သတင်းရင်းမြစ်က ပြောသည်။
လက်ရှိတွင် ရဲတပ်သားထွန်းနိုင်လင်းကို ပစ်ခတ်သွားသူများကို ဖမ်းဆီးနိုင် ခြင်းမရှိသေးဘဲ စစ်တပ်က မြို့ပေါ်တွင် ဧည့်စာရင်း စစ်ဆေးမှုနှင့် ပိတ်ဆို့ စစ်ဆေးမှုတချို့ လုပ်ဆောင်ခဲ့ကြောင်း သိရှိရသည်။
