မြောက်ခင်ရန်းကျေးရွာမှ စစ်တပ်နှင့်ပျူစောထီးများက မီးရှို့သတ်ဖြတ်လိုက်သည့် YDF ရဲဘော် ဖိုးတေနှင့် ရဲဘော်သားထောင်တို့ ဘယ်လို အဖမ်းခံခဲ့ရတာလဲ၊ အာဇာနည်ရဲဘော် ၂ ဦးရဲ့ ဘ၀ နောက်ကြောင်း ဘယ်လိုရှိသလဲ
By ရန်ကုန်ခေတ်သစ်
မကွေးတိုင်း၊ ဂန့်ဂေါမြို့နယ်၊ မြောက်ခင်ရန်းကျေးရွာတွင် ၂၀၂၃ ခုနှစ် နိုဝင်ဘာလ ၇ ရက်နေ့ ယောဒေသကာကွယ်ရေးတပ် YDF မှ ရဲဘော်ဖိုးတေနှင့် ရဲဘော် သားထောင် တို့ ၂ ဦးကို စစ်တပ်နှင့်ပျူစောထီးများက အရှင်လတ်လတ် မီးရှို့သတ်ဖြတ်ခဲ့သည့် ဖြစ်ရပ်သည် ပြည်တွင်းပြည်ပနှင့် နိုင်ငံတကာအသိုင်းအ၀ိုင်း၊ ကုလသမဂ္ဂလစုံစမ်းရေးကော်မရှင်IIMM အထိ ဗီဒီယိုသက်သေနှင့်တကွ ရောက်ရှိသွားခဲ့ပြီဖြစ်သည်။ သူတို့နှစ်ဦး သတ်ဖြတ်မခံရခင် အခြေအနေများနှင့် သူတို့နှစ်ဦး၏ အကြောင်းကို YDF ၏ စစ်ဒေသမှူး ကိုကောင်းကို ရန်ကုန်ခေတ်သစ်သတင်းဌာနက ဆက်သွယ်မေးမြန်းထားပါသည်။
မေး ။ ။ အရင်ဆုံး နာမည်နဲ့ ရာထူးလေး မိတ်ဆက်ပေးပါ။
ဖြေ ။ ။ ကျွန်တော့်နာမည်က ကိုကောင်းပါ။ YDF တပ်ကပါ။ တာဝန်ကတော့ စစ်ဒေသမှူးပါဗျ။
မေး ။ ။ ၂၀၂၃ ခုနှစ် နိုဝင်ဘာ ၇ ရက်နေ့က ရဲဘော်သားထောင်နဲ့ ရဲဘော် ဖိုးတေက ဘယ်လိုပုံစံမျိုးနဲ့ တိုက်ပွဲမှာ ပျူစောထီးတွေ ဖမ်းတာခံရလဲ။ ဘယ်လို ကျန်ရစ်ခဲ့တာလဲ။ အဲဒါလေး သိချင်ပါတယ်။
ဖြေ ။ ။ ကျွန်တော်တို့ နိုဝင်ဘာ ၆ ရက်နေ့ကနေ စပြီးမှ မြောက်ခင်ရန်းကျေးရွာကို ထိုးစစ်စခဲ့ပါတယ်ဗျ။ ထိုးစစ်စခဲ့တဲ့အချိန်မှာနိုဝင်ဘာ ၇ ရက်နေ့ မနက်ပိုင်း ၅ နာရီ ၆ နာရီ ဝန်းကျင်ခန့်မှာ ကျွန်တော်တို့ စပြီး ထိုးစစ်ဆင် တိုက်စစ်ဖွင့်တဲ့ အနေအထားရှိတယ်။ ကျွန်တော်တို့ကို မလိုသူတချို့က ပျူစောထီးတွေကို ကြိုတင်သတင်းပေးထားတယ်။ မြောက်ခင်ရန်ကျေးရွာ ပျူစောထီးတွေကို။
အဲဒီမှာ ကျွန်တော်တို့ သွားတဲ့အချိန်မှာ ကျွန်တော်တို့ ရဲဘော်တွေက မြောက်ခင်ရန်းကျေးရွာက ပျူစောထီးရန်သူစခန်းနားကို ကပ်နေတဲ့အချိန်မှာ “PDF အဖွဲ့တွေ လာတိုက်မှာလား မတိုက်မှာလား မသိဘူး။ သူပုန်တွေ စောင့်ရတာ ပျင်းနေပြီ”တွေ ဘာတွေ အဲဒီလိုမျိုးစကားပြောဆိုသံတွေ ကြားခဲ့ရပါတယ်။
ဒုတိယတစ်ချက်မှာ ကျွန်တော်တို့ ၂ ဖွဲ့ ခွဲဝင်ခဲ့ပါတယ်ဗျ။ မြောက်ခရမ်းကျေးရွာ တိုက်နယ်ဆေးရုံဘက်နဲ့ ဘူတာဘက် ၂ ဖွဲ့ ခွဲဝင်ခဲ့ပါတယ်။ တိုက်နယ်ဆေးရုံဘက်မှာကတော့ ကျွန်တော်တို့ဘက်က အဆင်ပြေခဲ့ပါတယ်ဗျ။ တပ်ဆုတ်ခွာခဲ့တဲ့အချိန်မှာ အဆင်ပြေခဲ့တယ်။ ဘူတာဘက်မှာ ကျွန်တော်တို့ ရဲဘော်ဖိုးတေနဲ့ သားထောင်တို့ ကျကျန်ရစ်ခဲ့ပါတယ်ဗျ။ ကျည်ထိမှန်တယ်လို့ ကျွန်တော်တို့ သိခဲ့ရပါတယ်။ ကျွန်တော်တို့ တပ်မှူးတွေ ရဲဘော်တွေ ပြန်ပြောချက်အရ။ အဲဒီမှာ ခြေထောက်တွေ ပေါင်တွေက ထိတဲ့ အနေအထားမှာ မြောက်ခင်ရန်းကျေးရွာက ပျူစောထီးက လူကြီး လူငယ် သက်ကြီးရွယ်အို မိန်းမတွေ ယောက်ျားတွေ အကုန်လုံးက ကျွန်တော်တို့ ဘူတာဘက်က တစ်ခွဲတစ်ခွဲကို ဝိုင်းလိုက်တဲ့အချိန်မှာ ကျွန်တော်တို့ ရဲဘော် ၂ ယောက်ကျန်ခဲ့ပါတယ်။
မေး ။ ။ YDF ရဲဘော်နှစ်ဦးကို ဒီလိုမျိုးရက်ရက်စက်စက် မြောက်ခင်ရန်း ပျူစောထီးတွေက မီးရှို့သတ်ဖြတ်တဲ့ ကိစ္စမှာ ဘာကြောင့် ဒီလိုမျိုးရက်ရက်စက်စက်သတ်တာပါလဲ။
ဖြေ ။ ။ အဲဒီမှာတော့ ကျွန်တော်တို့ သိရသလောက်တော့ စစ်ကောင်စီရဲ့ ဗိုလ်ကြီးအဆင့်ရှိတဲ့ ၃ ပွင့်ဗိုလ်တစ်ယောက်ရှိတယ်လို့ ကြားသိရပါတယ်။ ဒါပြီးကာမှ မြောက်ခင်ရန်းကျေးရွာက ဘူးလက်လှဆွေ ဦးလှဆွေက နေပြီးကာမှ မြောက်ခင်ရန်းရွာအကုန်လုံးကို ချုပ်ကိုင်ထားတယ်လို့ ကျွန်တော်တို့ ကြားသိရပါတယ်။
အဲဒီအနေအထားမှာ ကျွန်တော်တို့က လက်နက်ကိုင်အဖွဲ့အစည်းကိုပဲ ဝင်တိုက်တဲ့အချိန်မှာ သူတို့က ကျွန်တော်တို့ ထင်ထားတာထက်ပိုပြီးကာမှ တစ်ရွာလုံးက ပျူတွေ ဖြစ်နေတာပါ။ မြောက်ခင်ရန်းက အုပ်ချုပ်ထားတဲ့ ပျူစောထီးရွာ ၁၁ ရွာရှိတာပါ့။
မေး ။ ။ ဟုတ်ကဲ့။ အဲဒီတော့ သူတို့ကို ဒီလိုရက်ရက်စက်သတ်တာက ဘာကြောင့်လို့ထင်လဲ။ ဘယ်သူက အဓိက တာဝန်ရှိတယ်လို့ ထင်လဲ။
ဖြေ ။ ။ အခု ကျွန်တော်သိရသလောက်ကတော့ ကျွန်တော်တို့ တော်လှန်ရေး လုပ်ခဲ့တာက အစပိုင်းမှာတော့ ပါတီစွဲတွေ ပုံစံဖြစ်ခဲ့ကြပါတယ်။ NLD လိုလို ကြံခိုင်ရေးလိုလို ဖြစ်ခဲ့ကြတယ်။ အဲဒီအနေအထားမှာ ဘူးလက်လှဆွေဘက်ကနေပြီးကာမှ သူ့ဘက်က စည်းရုံးရေးဆင်းပြီးကာမှ စစ်ကောင်စီရဲ့ ပြည်သူ့စစ် အဲဒီလိုမျိုးတွေ မွေးထုတ်ခဲ့တယ်လို့လည်း ကြားသိရပါတယ်။
အဲဒီအနေအထားတွေမှာ ရက်ရက်စက်စက်သတ်တယ်ဆိုတဲ့အနေအထားတွေမှာ လက်ရှိ သူတို့က မြောက်ခင်ရန်းကျေးရွာကနေ ရွာအတွင်းကနေ ရွာပြင်ကို ထွက်လို့မရတာတွေ ဖြစ်တဲ့အပေါ် ၊ သူတို့ရွာကို လာတိုက်လို့ပေါ။ နောက်တစ်ခုက သူတို့ရွာကို စစ်ကောင်စီ မင်းအောင်လှိုင်တပ် ကျဆုံးတာတောင်မှ သူတို့ ရွာက လက် ၃ ချောင်းမကလို့ ၁၀ ချောင်းပါ ထောင်ထောင် သူတို့ရွာက အညံ့မခံဘူးတွေ ဘာတွေ အဲဒီလိုမျိုးတွေ ကြားသိရပါတယ်။
မေး ။ ။ အဲဒီတော့ YDF ရဲဘော် ၂ ဦး သတ်ဖြတ်ခံရမှုမှာ အဓိက တာဝန်အရှိဆုံး သူသည် စုံစမ်းသိရှိရသလောက် ဘယ်သူတွေ ပါဝင်တယ်လို့ သိရသလဲဗျ။
ဖြေ ။ ။ မြောက်ခင်ရန်းကျေးရွာ ပျူစောထီးခေါင်းဆောင်က ဖြိုးဝင်းလို့ သိရပါတယ်ဗျ။ အဓိက ပြစ်မှုကျူးလွန်ထားတဲ့ လူပေါ့ဗျာ။ သူနဲ့ တွဲဖက် တွဲပါတာကတော့ အုပ်ချုပ်ရေး။ မြောက်ခရမ်းကျေးရွာရဲ့ ရပ်ရွာအုပ်ချုပ်ရေးမှူး ထက်ဝေဦး လို့ သိရပါတယ်ဗျ။
မေး ။ ။ အဲဒီတော့လေ ကျဆုံးသွားတဲ့ YDF ရဲဘော် ဖိုးတေ အကြောင်းလေးကို အရင်ဆုံး ပြောပြပါလား။
ဖြေ ။ ။ ရဲဘော်ဖိုးတေကတော့ အသက် ၂၂ နှစ်ရှိပါပြီဗျ။ ကျောင်းသားပါ။ ၁၀ တန်းအောင် အဝေးသင်ပထမနှစ်တက်နေပါတယ်ဗျ။
မေး ။ ။ ရဲဘော်ဖိုးတေက ဘယ်ရွာသားလဲ။ ဘယ်ကနေ ဘယ်လိုမျိုး YDF ထဲ ရောက်လာလဲ။
ဖြေ ။ ။ ဟုတ်ကဲ့ ဆရာ။ သူက ကျွန်တော် ပြောသလို ကျောင်းသားလို့ ကိုယ်ရေးအကျဉ်းမှာ ဖြေထားတော့ ကျောင်းသားဆိုတော့ ဘယ်လို ပြောမလဲ အလုပ်အကိုင်ကတော့ မြို့ပေါ်တက်လုပ်တာတွေ ရှိမယ် မထင်ဘူးဗျ။ နောက်တစ်ခု ကျွန်တော်တို့ တပ်ထဲဝင်လာတဲ့ ရည်ရွယ်ချက်ကတော့ ကျွန်တော်တို့ ယောဒေသ၊ ယောပြည်သူလူထုကို ကိုယ်စားပြုပြီးကာမှ ဝင်လာတယ်လို့တော့ ပြောပါတယ်ဗျ။
သူ ပြောတာလေးတစ်ခုတော့ ရှိပါတယ်။ တိုင်းရင်းသား ၁၃၅ မျိုးရှိတဲ့အထဲမှာ ယောကလည်း ယောလူမျိုးဆိုပြီး ရှိခဲ့တယ်။ ဂန့်ဂေါခရိုင်ဆိုပြီးကာမှ တိုင်းဒေသကြီးတွေ ခွဲပြီးကာမှ ဂန့်ဂေါခရိုင်ဆိုပြီးကာမှ ရှိခဲ့တယ်။ အဲဒီအချိန်မှာ ဂန့်ဂေါခရိုင် ဂန့်ဂေါမြို့ ၊ မြို့ဖြစ်ပြီးကာမှ ကျန်တဲ့ဒေသတွေက အုပ်ချုပ်တယ်။ ဒါပြီးနောက်တစ်ခုက တန်းတူအခွင့်အရေးတွေ မရခဲ့ဘူး။
ပညာရေး၊ သူပြောသွားတာကတော့ ယောက ပြည်သူလူထုတွေအတွက် အများကြီး ကိုယ်စားပြုပြီး ပြောသွားပါတယ်ဗျ။ ကျန်းမာရေးကဏ္ဏမှာဆိုလည်း ပြည်သူ့ဆေးရုံရှိတယ်။ ဒါပေမယ့် ခြေသည်းခွံကွာတာလောက်လေးကိုမှ သူတို့က ဂန့်ဂေါပြည်သူ့ ဆေးရုံက အလုပ်မလုပ်ဘူး။ ဒီလောက်လေးကိုမှ မန္တလေးကို သွား။ ပညာရေးမှာလည်း ၁၀ တန်း အောင်ပြီးတာနဲ့ တခြားနယ်တွေကို လွှတ်။ ပညာရေးပိုင်းမှာဆိုရင်လည်း မြို့တွေ ဖြစ်ပြီး ခရိုင်တွေ ဖြစ်ပြီးကာမှ ပညာရေးကောလိပ်တို့ အဝေးသင်တို့ အဲဒီလိုမျိုး ရှိရမယ်ဆိုပြီး တန်းတူအခွင့်အရေးတို့ဆိုပြီး ကျွန်တော်တို့ရှေ့မှာ ရင်ဖွင့်ထားတာလေးတွေတော့ ရှိပါတယ်။
မေး ။ ။ အဲဒီတော့ သူကတော့ဘယ်အချိန်လောက်မှာ YDF ထဲကို ဝင်ပြီးတော့လာလဲ ။
ဖြေ ။ ။ အာဏာသိမ်းပြီး ယောကာကွယ်ရေးတပ်ထဲကို စရောက်လာတာပါဗျ။ တပ်ဦးကာလ တပ်တည်ထောင်တဲ့အထဲမှာ ဘယ်လိုတွေ လုပ်ရင် ကောင်းမယ် သွားလာပြောဆိုတဲ့အထဲမှာ ရဲဘော်ဖိုးတေကလည်း အဓိက ကျတဲ့လူပဲဗျ။
မေး ။ ။ ကျဆုံးသွားတဲ့ ရဲဘော်သားထောင်ရဲ့ အကြောင်းလေး ပြောပြပေးပါခင်ဗျာ။
ဖြေ ။ ။ ရဲဘော်သားထောင်ကတော့ ၁၀ တန်းဗျ။ အဲဒီအချိန် ကိုဗစ်ဖြစ် အာဏာသိမ်းတာနဲ့ သူကတော့ ဆန္ဒတွေပြ သပိတ်တွေ ပြတဲ့အချိန်မှာ တော်လှန်ရေးအစကတည်းက ညီအစ်ကိုလို တိုက်ပွဲဝင်ခဲ့တဲ့ ရဲဘော်ဗျ။
မေး ။ ။ သူက အသက် ဘယ်လောက်ရှိပြီလဲဗျ။
ဖြေ ။ ။ အခု ၂၂ နှစ် ၂၃ ထဲမှာဗျ။
မေး ။ ။ ရဲဘော် သားထောင်ကရော ဘာကြောင်မို့လို့ တပ်ထဲကို ဝင်ခဲ့တယ်လို့ ပြောခဲ့တာရှိလား။ ဘယ်လို ခံယူချက် တော်လှန်ရေးမှာ ဘယ်လိုကြောင့် လက်နက်ကိုင်ပြီး ပါလာရတယ်ဆိုတာ။
ဖြေ ။ ။ ရဲဘော် သားထောင်ကတော့ စစ်ကောင်စီရဲ့လုပ်ရပ်တွေကို မကြိုက်လို့ ပြည်သူလူထုတွေကို ညှဉ်းပန်းနှိပ်စက်တာတွေ ဂန့်ဂေါမြို့ပေါ်က လက်နက်ကြီးတွေနဲ့ ရမ်းသမ်းပစ်ခတ်တာတွေ အဲဒီအပေါ်တွေမှာ အခြေပြုပြီး YDF ထဲ ပါလာတာဗျ။
မေး ။ ။ ဒီရဲဘော် ၂ ဦးက သူတို့ ဘယ်လောက်ပဲ နှိပ်စက်ခံရပါစေ။ သူတို့ မျက်ဝန်းတွေထဲမှာ ဒီဟာကို ကြံ့ကြံ့ခံသွားတဲ့ သတ္တိကို မြင်ရတယ် ၊ ဒီအပေါ်မှာ လုပ်ဖော်ကိုင်ဖက်အနေနဲ့ရော စစ်ဒေသမှူးအနေနဲ့ရော သူတို့ ၂ ဦးရဲ့ စွန့်လွှတ်မှုအပေါ်မှာ ဘယ်လိုများ မှတ်ချက်ပေးချင်သလဲ။
ဖြေ ။ ။ ကျွန်တော်တို့ရဲဘော်တွေကတော့ ပြည်သူလူထုကို ဦးစားပေးပြီးကာမှ သူတို့ရဲ့အသက်ကို ပဓာနမထားဘဲ ရဲရဲဝံ့ဝံ့ အသက်ပေးတိုက်ပွဲဝင်ခဲ့တဲ့ ရဲဘော်တွေလည်း ဖြစ်တယ်ဆိုတော့ ကျွန်တော်တို့ကတော့ သူတို့ ခံစားရသလို ကျွန်တော်တို့မှာလည်း ဒီထက်မက အခုလောက် အချိန်အထိ ခံစားနေရပါတယ်။
စစ်ကောင်စီက လူ့အခွင့်အရေးတွေကို ချိုးဖောက်နေပြီး စစ်သုံ့ပန်းနဲ့ အညီ မကိုင်တွယ်တာကို နိုင်ငံတကာသိအောင်လို့ ဆရာတို့ဘက်ကနေမှ နိုင်ငံတကာနည်းဥပဒေတွေ ဘာတွေကိုလည်းတင်ပြစေလိုပါတယ်ဗျ။
မေး ။ ။ နောက်ဆုံး နိဂုံးချုပ် ပြောချင်တာများ ရှိပါသလား။
ဖြေ ။ ။ နောက်ဆုံးနိဂုံးချုပ်အနေနဲ့ စစ်ကောင်စီက ပြည်သူလူထု၊ တော်လှန်ရေးအဖွဲ့အစည်းတွေကို အကြောက်တရားနဲ့ စိုးမိုးနေတဲ့အချိန်မှာ ကျဆုံးသွားတဲ့ ရဲဘော် ၂ ယောက်ကိုယ်စားပြည်သူလူထုရဲ့ရှေ့မှာ စစ်ကောင်စီက အကြောက် တရားနဲ့ ဘယ်လိုပဲ အုပ်ချုပ် အုပ်ချုပ် ကျွန်တော်တို့က ပြည်သူလူထုရှေ့မှာ မားမားမတ်မတ်ဆက်လက်ရပ်တည်နေမှာပါလို့ ပြောကြားလိုပါတယ်။
ရက်စက်နိုင်လွန်းတယ်ခွေးတေ