မံစီမြို့နယ်၊ ဂျယ်ခမ်း (စီခန်းကြီး) စစ်တပ် ဗျူဟာ စခန်းကို KIA၊ AA၊ KPDF ပူးပေါင်း တပ်ဖွဲ့ဝင်များ ထိုးစစ်ဆင် တိုက်ခိုက်နေပြီး တိုက်ပွဲပြင်းထန်နေ

မံစီမြို့နယ်၊ ဂျယ်ခမ်း (စီခန်းကြီး) စစ်တပ် ဗျူဟာ စခန်းကို KIA၊ AA၊ KPDF ပူးပေါင်း တပ်ဖွဲ့ဝင်များ ထိုးစစ်ဆင် တိုက်ခိုက်နေပြီး တိုက်ပွဲပြင်းထန်နေ

■ စစ်တပ်က ဂျယ်ခမ်းရွာနှင့် သံတံတားရွာကို လေကြောင်းဖြင့် ဗုံးကျဲ တိုက်ခိုက်ခြင်းကြောင့် ပြည်သူ ၆ ဦးသေဆုံး

ရန်ကုန်၊ ဖေဖော်ဝါရီ ၁၇

ကချင်ပြည်နယ်၊ မံစီမြို့နယ်၊ ဂျယ်ခမ်း (စီခန်းကြီး) အကြမ်းဖက် စစ်တပ် ဗျူဟာ စခန်းကို KIA၊ AA၊ KPDF ပူးပေါင်း တပ်ဖွဲ့ဝင်များ ထိုးစစ်ဆင် တိုက်ခိုက်နေပြီး တိုက်ပွဲပြင်းထန်နေကြောင်း KIA ၏ စစ်ရေးသတင်းရေးမြစ်က ရန်ကုန်ခေတ်သစ် မီဒီယာသို့ ပြောဆိုသည်။

ဖေဖော်ဝါရီလ ၁၇ ရက်နေ့ နံနက် ၆ နာရီခန့်က စတင်ကာ အကြမ်းဖက် စစ်တပ်၏ မြောက်ပိုင်းတိုင်းစစ်ဌာနချုပ် (မပခ) လက်အောက်ခံ ခလရ-၁၅ ၊ ၁၂၁ ၊ ၂၇၆ ၊ ၂၂၃ ပူပေါင်းတပ်များ တပ်စွဲထားသော မံစီမြို့နယ်၊ ဂျယ်ခမ်း(စီခန်းကြီး) စစ်တပ် ဗျူဟာ စခန်းကို KIA၊ AA၊ KPDF ပူးပေါင်း တပ်ဖွဲ့ဝင်များက ထိုးစစ်ဆင် တိုက်ခိုက်နေပြီ အကြမ်းဖက် စစ်တပ်ကလည်း ဂျက်ဖိုက်တာဖြင့် ၁၄ ကြိမ် ဗုံးကျဲ တိုက်ခိုက်ခဲ့ပြီး ယနေ့ ညနေ ၅ နာရီ ၃၀ မိနစ်ထိ တိုက်ပွဲ ပြင်းထန်နေကြောင်း သိရသည်။

ထို့ပြင် အကြမ်းဖက် စစ်တပ်က အရပ်သား ပြည်သူများ နေထိုင်သည့် ဂျယ်ခမ်းရွာနှင့် သံတံတားရွာ တို့ကို လေကြောင်းဖြင့် ဗုံးကျဲ တိုက်ခိုက် ခဲ့ခြင်းကြောင့် ပြည်သူ ၆ ဦးသေဆုံးခဲ့ကြောင်း သိရသည်။

“ဂျယ်ခမ်း (စီခန်းကြီး) စစ်ခွေး ဗျူဟာ စခန်းကို KIA၊ AA၊ KPDF ပူးပေါင်းတပ်ဖွဲ့ဝင်တွေ ဒီနေ့ နံနက် ၆ နာရီမှာ ထိုးစစ်ဆင်တိုက်ခိုက်နေပါတယ်။ ဒီနေ့ စစ်ခွေးတွေက ဂျက်ဖိုက်တာနဲ့ ဗုံးကျဲတာ ၁၄ ကြိမ် ရှိသွားပြီ ညနေ ၅ နာရီ ၃၀ မိနစ် အထိ တိုက်ပွဲပြင်းထန်နေဆဲပါ။ စစ်ခွေးတွေက ဂျယ်ခမ်းရွာထဲကို လေယာဥ်နဲ့ ဗုံးကျဲတာ ပြည်သူ ၅ ဦးသေသွားတယ်။ သံတံတား ရွာမှာလည်း ဗုံးကျဲတာ ပြည်သူ ၁ ဦးသေတယ်။ လေယာဉ်က တစ်နေကုန်ကျဲနေတာ တိုက်ပွဲက အခုညပိုင်းမှာ ငြိမ်နေတယ်” ဟု KIA ၏ စစ်ရေးသတင်းရေးမြစ်က ပြောဆိုသည်။