ရွှေဘိုမြို့နယ်၊ ချီပါရွာနှင့် ပခုက္ကူမြို့နယ် အင်းဘတ်ရွာကို စစ်တပ်က မီးရှို့ဖျက်ဆီးမှု ကြံ့ဖွတ်ရုံး အပါအဝင် နေအိမ် ၂၀ ကျော်နှင့် ဈေးဆိုင်များပြာကျ
ရန်ကုန်၊ ဧပြီ ၂၅
စစ်ကိုင်းတိုင်း၊ ရွှေဘိုမြို့နယ်၊ ချီပါရွာကို အကြမ်းဖက် စစ်တပ်က မီးရှို့ဖျက်ဆီးခြင်းကြောင့် ကြံ့ဖွတ်ရုံး အပါအဝင် နေအိမ် ၂၀ ကျော်နှင့် ဈေးဆိုင်များမီးလောင်ပြာကျခဲ့ကြောင်း ဒေသပြည်သူများက ရန်ကုန်ခေတ်သစ် မီဒီယာသို့ ပြောဆိုသည်။
ဧပြီလ ၂၄ ရက်နေ့တွင် ချီပါရွာ၌ ၇ ရက်ကြာတပ်စွဲထားသော အကြမ်းဖက် စစ်ကောင်စီ တပ်သားများက ကျေးရွာထဲရှိ ကြံ့ဖွတ်ရုံး အပါအဝင် နေအိမ်များ၊ ဘဲခြံများနှင့် ယက်ကန်းစင်များကို မီးရှို့ဖျက်ဆီးခဲ့ကြောင်း သိရသည်။
အကြမ်းဖက် စစ်တပ် မီးရှို့ဖျက်ဆီးခြင်းကြောင့် ချီပါရွာအတွင်းရှိ ကြံ့ဖွတ်ရုံး၊ နေအိမ် ၂၀ ကျော်၊ ဈေးဆိုင် ၁၀ လုံးခန့်၊ ယက်ကန်းစင်များ နှင့် ဘဲခြံများ မီးလောင်ပြာကျခဲ့ကြောင်း သိရှိရသည်။
“စစ်ခွေးတွေ မီးရှို့တဲ့ထဲမှာ ကြံ့ဖွတ်ရုံးလည်းပါတယ်။ နေအိမ် ၂၀ ၊ စပါးတိုက် ၁ လုံး၊ လက်ယက်ကန်းနဲ့ စက်ယက်ကန်းစင် ၁၅ စင်၊ စားသောက်ဆိုင်တွေ ကဖေးဆိုင်တွေ လည်း မီးလောင်ပြာကျသွားတယ်။ စစ်ခွေးတွေက နွား ၁ ကောင် နဲ့ ဘဲအကောင် ၂၀၀ ခန့်ကိုလည်း သတ်ဖြတ်သွားတယ်။ ဘဲခြံတွေလည်း ပျက်စီးသွားတယ်” ဟု ဒေသပြည်သူ တစ်ဦးကပြောဆိုသည်။
လက်ရှိချိန်တွင် အကြမ်းဖက် စစ်တပ် စစ်ကြောင်းသည် ချီပါရွာမှ ဆုတ်ခွာသွားပြီး မင်းကုန်းဘုန်းကြီးကျောင်းကို ပြန်လည် ရောက်ရှိ သွားကြောင်း သိရသည်။
အလားတူ မကွေးတိုင်း၊ ပခုက္ကူမြို့နယ်၊ အင်းဘတ်ရွာကို အကြမ်းဖက် စစ်တပ်က ဝင်ရောက်စီးနင်းပြီး ပြည်သူပိုင် နေအိမ် ၃ လုံးကို မီးရှို့ ဖျက်ဆီးခဲ့ကြောင်း ဒေသ ပြည်သူများက ရန်ကုန်ခေတ်သစ် မီဒီယာသို့ ပြောဆိုသည်။
ဧပြီလ ၁၉ ရက်နေ့တွင် အကြမ်းဖက် စစ်တပ်က ပခုက္ကူမြို့နယ်၊ အင်းဘတ်ရွာကို ဝင်ရောက်စီးနင်းပြီး နေအိမ် ၃ လုံးကို မီးရှို့ဖျက်ဆီးခဲ့ကြောင်း သိရသည်။
“ဧပြီလ ၁၉ ရက်နေ့က အင်းဘတ်ရွာကို အကြမ်းဖက် စစ်တပ်က ဝင်ရောက်စီးနင်းပြီး မီးရှို့ ဖျက်ဆီးသွားတာ နေအိမ် ၃ လုံး မီးလောင် ဖျက်ဆီးသွားတယ်” ဟု ဒေသပြည်သူတစ်ဦးက ပြောဆိုသည်။
