သဲကုန်းမြို့နယ်တွင် ပေါ်တာဆွဲရန် ပြင်ဆင်နေသည့် စစ်သားများကို မိုင်းဆွဲ တိုက်ခိုက်၊ စစ်ကိုင်းမြို့နယ်ရှိ ဆားတောင်ရဲစခန်းကို ဒရုန်းဖြင့် ဗုံးကျဲတိုက်ခိုက်
ရန်ကုန်၊ ဇွန် ၂၉
ပဲခူးတိုင်း၊ သဲကုန်းမြို့နယ်တွင် ပေါ်တာဆွဲရန် ပြင်ဆင်နေသည့် စစ်သားများကို မိုင်းဆွဲ တိုက်ခိုက်ခဲ့ကြောင်း ပြည်ခရိုင် ပြည်သူ့ကာကွယ်ရေးတပ် 3601 (PPDF) တပ်ရင်း တပ်ခွဲ ၃ (Wisdom 2) အဖွဲ့မှ တာဝန်ရှိသူ တစ်ဦးက ရန်ကုန်ခေတ်သစ် မီဒီယာသို့ ပြောဆိုသည်။
ဇွန်လ ၂၈ ရက်နေ့ ညနေ ၆ နာရီခန့်တွင် သဲကုန်းမြို့နယ်၊ ဆင်းမြီးဆွဲမြိုတိုက်နယ်၊ ဇီးကုန်ကျေးရွာအနီး ပေါ်တာဆွဲရန် လုပ်ဆောင်နေသော အကြမ်းဖက် စစ်သားများကို ပြည်ခရိုင် ပြည်သူ့ကာကွယ်ရေးတပ် 3601 (PPDF) တပ်ရင်း တပ်ခွဲ ၃ (Wisdom 2) အဖွဲ့က အဝေးထိန်းမိုင်းဖြင့် ဖောက်ခွဲ တိုက်ခိုက်ခဲ့ကြောင်း သိရသည်။
“ညအချိန် ကျေးရွာတွေအတွင်း ဧည့်စရင်းစစ်ဖို့ အကြောင်းပြပြီး စစ်မှုထမ်းဖို့ ပေါ်တာဆွဲနေတာကြောင့် အခုလို လုပ်ရခြင်းဖြစ်ပါတယ်။ ပြည်သူတွေ အနေနဲ့ စစ်ကောင်စီ တပ်သားတွေ အနီး နီးကပ်စွာမနေဘဲ ရှောင်တိမ်းသွားလာကြဖို့ ပြောချင်ပါတယ်” ဟု ပြည်ခရိုင် ပြည်သူ့ကာကွယ်ရေးတပ် 3601 (PPDF) တပ်ရင်း တပ်ခွဲ ၃ (Wisdom 2) အဖွဲ့မှ တာဝန်ရှိသူ တစ်ဦးက ပြောဆိုသည်။
ထို့ပြင် စစ်ကိုင်းတိုင်း၊ စစ်ကိုင်းမြို့နယ်၊ ဆားတောင်ရဲစခန်းကို ဒရုန်းဖြင့် ဗုံးကျဲတိုက်ခိုက်ခဲ့ကြောင်း စစ်ကိုင်း ခရိုင် ဒရုန်းတပ်ရင်း-SDDF တပ်ဖွဲ့မှ တာဝန်ရှိသူတစ်ဦးက ရန်ကုန်ခေတ်သစ်သတင်းဌာနထံသို့ ပြော ကြားသည်။
ဇွန်လ ၂၅ ရက် ညနေ ၅ နာရီ ၃၀ မိနစ်အချိန်မှ ၆ နာရီ ၃၀ မိနစ်အချိန်အထိ စစ်ကိုင်းမြို့နယ်၊ ဆား တောင်မြို့မရဲစခန်းကို “Shar Htoo WAW”နည်းပညာ တိုက်ခိုက်ရေး Fixed Wings Drone များဖြင့် 1.5 kg AIR BOMB ၈ လုံး ကျဲချတိုက်ခိုက်ခဲ့ပြီး အကြမ်းဖက်စစ်သား ထိခိုက်သေဆုံးမှုကို သိရှိနိုင်ရန် စုံစမ်းနေဆဲဖြစ်ကြောင်း သိရသည်။
အဆိုပါ တိုက်ခိုက်မှုကို စစ်ကိုင်းခရိုင်ဒရုန်းတပ်ရင်း-SDDF ၊ GTR အမှတ် ၂ တပ်ရင်း နှင့် Phoenix SGG တို့ ပူးပေါင်းကာ တိုက်ခိုက်ခဲ့ခြင်းဖြစ်ကြောင်း သိရသည်။
