အမေရိကန်တစ်ဒေါ်လာ ၄၇၄၀ ကျပ်နှင့် အခေါက်ရွှေတစ်ကျပ်သားလျှင် ၅၇ သိန်းကျော်စျေးပေါက်နေ၊ ဘဏ်ဂယက်နှင့် ငွေသားကန့်သတ်မှု ထုတ်နေရမှု ကြောင့် ရွှေနှင့်ဒေါ်လာ အဝယ်ထိုးတက်လာ

ရန်ကုန်၊ ဇူလိုင် ၉

မြန်မာနိုင်ငံ၏ ပြည်တွင်းစီးပွားရေးစျေးကွက်တွင် အမေရိကန်တစ်ဒေါ်လာ ၄၇၄၀ ကျပ်နှင့် အခေါက်ရွှေတစ်ကျပ်သားလျှင် ၅၇ သိန်းကျော်စျေးပေါက်နေကြောင်း စျေးကွက်အတွင်းမှ စုံစမ်းသိရှိရသည်။

ကမ္ဘာ့ရွှေစျေးကွက်တွင် ရွှေစျေးနှုန်းမှာ အနည်းငယ်မြင့်တက်နေပြီး ရွှေတစ်အောင်စလျှင် အမေရိကန်ဒေါ်လာ ၂၃၇၁ စျေးရှိကြောင်း၊ ပြည်တွင်းစျေးကွက်တွင်လည်း အခေါက်ရွှေတစ်ကျပ်သားလျှင် ငွေကျပ် ၅၇ သိန်းကျော် စျေးရှိနေပြီး အရောင်းအဝယ်တွင် ဝယ်လိုအား မြင့်တက်လာကြောင်း၊ အမေရိကန်ဒေါ်လာမှာမူ တစ်ဒေါ်လာလျှင် ၄၇၇၀ ကျပ်ဝန်းကျင်တွင် စျေးပေါက်နေကြောင်း သိရှိရသည်။

“ဒီဇူလိုင်လဆန်းပိုင်းမှာ ရွှေရော အဝယ်အတော်ကို လိုက်လာတယ်။ ပုဂ္ဂလိကဘဏ်တွေကို စစ်တပ်က အရေး ယူမယ်ဆိုတဲ့ ကြေညာချက်ကြောင့်အများကြီးပါတယ်။ ဘဏ်တွေက ငွေထုတ်ကန့်သတ်မှုတွေကြောင့်လည်း ပါတယ်။ ငွေလက်ထဲရှိတဲ့လူက ရွှေကို စျေးကောင်းပေးပြီး ဝယ်လာကြတယ်။ အဝယ်တွေ အတော်ကို တက်လာတာ” ဟု ရန်ကုန်ရွှေကုန်သည်တစ်ဦးက ပြောဆိုသည်။

အလားတူ ဒေါ်လာစျေးကွက်တွင်လည်း ယခု လဆန်းပိုင်း ဒေါ်လာ ဝယ်လိုအား မြင့်တက်လာကြောင်း၊ ဒေါ်လာကို သောင်းဂဏန်းမှ သိန်းဂဏန်းအထိ ဝယ်ယူစုဆောင်းသူများရှိနေကြောင်း သိရှိရသည်။

“အရွက်သီးသန့်ချည်း ဝယ်တာ။ ရသလောက်ဝယ်ကြတယ်။ ကျပ်ငွေမထားကြတာ။ အဖမ်းအဆီးတွေ ဖြစ်ပြီးမှ ပထမဆုံးအကြိမ် အဝယ်ပြန်လိုက်တာပဲ” ဟု ဗိုလ်တထောင်မှ နိုင်ငံခြားငွေ ဝယ်ရောင်းလက်ကြီးဒိုင်က ရန်ကုန်ခေတ်သစ်သတင်းဌာနထံသို့ ပြောဆိုသည်။

အကြမ်းဖက်စစ်ကောင်စီကမူ ရွှေစျေးနှင့်ဒေါ်လာစျေးကို ၎င်း၏ လက်အောက် ခံ အသင်းများမှတစ်ဆင့် စျေးနှုန်း ကန့်သတ်ထားသော်လည်း ယင်းကန့်သတ်မှုမှာ လက်တွေ့စျေးကွက်တွင် အလုပ်မဖြစ်ကြောင်း သိရှိရသည်။

#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup #rejectmilitarycoupmyanmar