ရန်ကုန်၊ စက်တင်ဘာ ၁၃
မန္တလေးတိုင်း၊ ရမည်းသင်းမြို့နယ်၊ မိုးထိမိုးမိရွှေလုပ်ကွက်များတွင် မိုးသည်းထန်စွာ ရွာသွားမှုကြောင့် မြေပြိုကျမှုများ ဖြစ်ပေါ်ပြီး အလုပ်သမားအများပြား ပျောက်ဆုံးနေကြာင်း အဆိုပါ ရွှေလုပ်ကွက်မှ အလုပ်သမားတချို့က ရန်ကုန်ခေတ်သစ်သတင်းဌာနထံသို့ ပြောဆိုသည်။
စက်တင်ဘာလ ၁၁ ရက်နေ့နှင့် စက်တင်ဘာလ ၁၂ ရက်နေ့ မိုးသည်းထန်စွာ ရွာသွန်းမှုကြောင့် ရမည်းသင်းမြို့နယ်၊ မိုးထိမိုးမိရွှေလုပ်ကွက်ရှိ လုပ်ကွက်များတွင် မြေပြိုကျမှု များ ၊ ရွှေတူးဖော်ရေးလုပ်ကွက်နှင့် အလုပ်သမားများနေထိုင်ရာ နေရာများ ပြိုကျမှုများဖြစ်ပွားခဲ့ကြောင်း ၊ မိုးထိမိုးမိရွှေတူးဖော်ရေးတွင် လုပ်ကွက်ပေါင်း ၄၀ နီးပါးရှိပြီး ရွှေလုပ်ကွက်အများအပြား မြေပြိုကျမှုကြောင့် ပျက်စီးသွားကြောင်း၊ လက်ရှိအချိန်အထိ အဆက်အသွယ်များ ပြတ်တောက်ပြီး ကယ်ဆယ်ရေးလည်းမရှိဘဲ ပျောက်ဆုံးနေသော အလုပ်သမားအများအပြားလည်းရှိနေကြောင်း သိရှိရသည်။
“ရမည်းသင်း မိုးထိမိုးမိရွှေလုပ်ကွက် မှာ မိုးကြီးပြီးမြေတွေပြိုလို့ လူတွေသေကြတယ်။ လုပ်ကွက်တစ်ခုတည်းမှာတင် သေတာ မနည်းဘူး။
လုပ်ကွက်ပေါင်း သုံးလေးဆယ်ထက် မနည်းရှိတာ။ အခုရေတော့မရှိတော့ဘူး။ ဒါပေမယ့် အခုအထိကိုအလောင်းပြန်မရသေးတာတွေ ပျောက်ဆုံးနေတာတွေအများကြီးပဲ။ မြေကြီးတွေဖုံးသွားတယ်။ အဆက်အသွယ်တွေလည်း ပြတ်တောက်နေတယ်” ဟု မိုးထိမိုးမိရွှေလုပ်ကွက်မှ ရွှေတူးဖော်ရေးလုပ်သားတစ်ဦးက ပြောဆိုသည်။
ထို့ပြင် ရမည်းသင်းမြို့နယ်အတွင်းရှိ ရွာအများအပြား တောင်ကျချောင်းရေဖြင့် တိုက်စားသွားပြီး ရွာလုံးကျွတ် ပျောက်ကွယ်သွားကြောင်း၊ သပြေပင်ကျေးရွာ ၊ ငါးတဲစုကျေးရွာ၊ အရှေ့ပင်ရွာ အပါအဝင် ကျေးရွာအများအပြား တောင်ကျချောင်းရေနှင့်အတူ မြေကြီးအောက်တွင် နစ်မြုပ်သွားကြောင်း သိရှိရသည်။
“ရမည်းသင်းမြို့နယ်၊ သပြေပင်ကျေးရွာ တစ်ရွာလုံး မြေကြီးအောက်ထဲရောက်သွားပါတယ်။ လက်ရှိ ရေကျသွားပေမယ့် တစ်ရွာလုံး မြေကြီးအောက်ထဲရောက်သွားပါတယ်။ အိမ်ခြေ ၃၅၀ ကျော်ရှိတဲ့အထဲမှာ အမြင့်ပိုင်းက အိမ်ခြေ ၄၀ ကျော်ပဲကျန်တယ်။ လူဦးရေ ၁၆၀၀ လောက်နေတာမှာ ၉၀၀ လောက်ပဲ ကျန်ပါတယ်။ ရွာမှာက မိုးထိမိုးမိ ရွှေတူးဖော်ရေးလုပ်ကွက်မှာ အလုပ်လုပ်တဲ့ မိသားစုတွေ နေကြတယ်။ လက်ရှိ လူဦးရေ ၁၆၀၀ ရှိတာမှာ အမြင့်ပိုင်းတွေ တက်ပြီး ကျန်ခဲ့တာက လူဦးရေ ၃၀၀ လောက်ရှိတယ်။ သပြေပင် ဘုန်းတော်ကြီး ကျောင်းမှာ သွားခိုလှုံနေတာက လူဦးရေ ၃၅၀ လောက်ရှိတယ်။ ရေဘေးသင့်စခန်းလိုဖွင့်ပြီးနေတာက ၂၅၀ လောက်ရှိတယ်။ စုစုပေါင်း လူဦးရေ ၉၀၀ လောက်ပဲ ကျန်တယ်။ ကျန်တဲ့ ၇၀၀ လောက်က ပျောက်နေတယ်။ တစ်ရွာလုံး မြေကြီးအောက်ရောက်သွားတော့ အလောင်းလည်း ဖော်လို့မရဘူး” ဟု ဒေသပြည်သူတစ်ဦးက ပြောဆိုသည်။
လက်ရှိအချိန်အထိ ရမည်းသင်းမြို့နယ်အတွင်းရှိ ကျေးရွာများသို့ ကယ်ဆယ်ရေး ရောက်ရှိလာခြင်းမရှိဘဲ အသက်ရှင်ကျန်ရစ်သူများမှာလည်း စားဝတ်နေရေး ၊ အမိုးအကာနှင့် ကျန်းမာရေး ဒုက္ခများကြုံတွေ့နေရကြောင်း သိရှိရသည်။
#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup #rejectmilitarycoupmyanmar
