နောင်ချိုမြို့ တိုက်ပွဲတွင် ခမရ ၂၁၃ တပ်ရင်းမှူး ဗိုလ်မှူးနှင့် ဗိုလ်ကြီး အဆင့်ရှိသူ အပါအဝင် တပ်သားများ သေဆုံးပြီး ၄ ဦး အရှင်ဖမ်းမိ၊ လက်နက်ခဲယမ်းများလည်း သိမ်းဆည်းရရှိ
ရှမ်းပြည်နယ်၊ နောင်ချိုမြို့ တိုက်ပွဲတွင် ခမရ ၂၁၃ တပ်ရင်းမှူး ဗိုလ်မှူးနှင့် ဗိုလ်ကြီး အဆင့်ရှိသူ အပါအဝင် တပ်သားများ သေဆုံးပြီး ၄ ဦး အရှင်ဖမ်းမိကာ လက်နက်ခဲယမ်းများလည်း သိမ်းဆည်းရရှိခဲ့ကြောင်း TNLA က ပြောဆိုသည်။
နိုဝင်ဘာလ ၁၆ ရက်နေ့တွင် နောင်ချိုမြို့ရှိ တောင်ခမ်း အမြောက်တပ်စခန်း ၃၅၄ နှင့် ၉၀၂ တပ်စခန်းတို့တွင် တအာင်းအမျိုးသား လွတ်မြောက်ရေးတပ်မတော် TNLA နှင့် အကြမ်းဖက် စစ်တပ်တို့ တိုက်ပွဲပြင်းထန်စွာ ဖြစ်ပွားခဲ့ကြောင်း သိရသည်။
တိုက်ပွဲအတွင်း အကြမ်းဖက် စစ်တပ်ဘက်မှ တပ်မ ၁၁ ၊ ခမရ ၂၁၃ တပ်ရင်းမှူး ဗိုလ်မှူးနှင့် ဗိုလ်ကြီး အဆင့်ရှိသူ အပါအဝင် တပ်သားများ သေဆုံးခဲ့ပြီး လက်နက်ခဲယမ်းများ နှင့် စစ်အသုံးအဆောင်ပစ္စည်းများလည်း သိမ်းဆည်းရရှိခဲ့ကြောင်း၊ ထို့ပြင် လက်နက် ခဲယမ်းနှင့်အတူ စစ်ကောင်စီ တပ်သား ၄ ဦးကိုလည်း အရှင်ဖမ်းဆီးနိုင်ခဲ့ကြောင်း သိရှိရသည်။
ရှမ်းပြည်နယ်တောင်ပိုင်း ရပ်စောက်-ကျောက်ဂူ မှ နောင်ချိုမြိုနယ်အတွင်း စစ်အင်အားဖြည့်တင်းရန် ကြိုးပမ်းနေသည့် အကြမ်းဖက် စစ်တပ်မှ ထိုးစစ်ဆင်လာသောကြောင့် တိုက်ပွဲဖြစ်ပွားနေခြင်းဖြစ်ကြောင်း သိရသည်။
နောင်ချိုမြို့ရှိ တောင်ခမ်း အမြောက်တပ်စခန်း ထိန်းချုပ်နိုင်ရန် အကြမ်းဖက် စစ်တပ်က ရှမ်းပြည်နယ် တောင်ပိုင်း ရပ်စောက်-ကျောက်ဂူမှ တစ်ဆင့် စစ်အင်ဖြည့်တင်းနေပြီး လေကြောင်းမှ တစ်ဆင့်လည်း စစ်လက်နက်ခဲယမ်းများ ဖြည့်တင်းနေကြောင်း၊ ထို့ပြင် စစ်ကောင်စီတပ်သည် တိုက်ပွဲဖြစ်ပွားခြင်းမရှိသည့် နေရာများကိုလည်း လက်နက်ကြီးများဖြင့် ပစ်ခတ်ခြင်း၊ လေကြောင်းဖြင့် ဗုံးကျဲ တိုက်ခိုက်မှုများ လုပ်ဆောင်နေကြောင်း TNLA က ပြောဆိုသည်။
