ညောင်ဦး -မြင်းခြံလမ်းမတွင် လူငယ် ၁၀၀ ခန့်ကို စစ်ကောင်စီနှင့်ဌာနဆိုင်ရာ ပူးပေါင်းအဖွဲ့က ဖမ်းဆီးသွားပြီး မည်သည့်နေရာတွင် ထိန်းသိမ်းထားမှန်း မသိရ၊ တပ်သားသစ်စုဆောင်းသည့်အနေဖြင့် ပေါ်တာဆွဲ ဖမ်းဆီးခံရဟုဆို
ရန်ကုန်၊ ဒီဇင်ဘာ ၉
မန္တလေးတိုင်း၊ ညောင်ဦး-မြင်းခြံလမ်းမပေါ်တွင် ပြည်သူ ၁၀၀ နီးပါးကို အကြမ်းဖက်စစ်ကောင်စီ ပူးပေါင်းအဖွဲ့က ဖမ်းဆီးသွားပြီး မည်သည့်နေရာတွင် ထိန်းသိမ်းထားသည်ကို မသိရသဖြင့် မိသားစု ဝင်တွေ စိတ်ပူနေကြရကြောင်း ညောင်ဦးမြို့နယ်ပကဖတာဝန်ခံကိုဇီးက ရန်ကုန်ခေတ်သစ် သတင်း ဌာနထံသို့ ပြောကြားသည်။
ဒီဇင်ဘာလ ၇ ရက် နံနက်ပိုင်းမှစ၍ ညောင်ဦးမြို့နယ်၊ ညောင်ဦး -မြင်းခြံလမ်းမပေါ် ညောင်ဦးမြို့နှင့် လက်ခြေပေါ်ကြား၌ အကြမ်းဖက်စစ်သား၊ ရဲ၊ အထွေထွေအုပ်ချုပ်ရေးဌာနနှင့် ပြည်သူ့စစ်များ ပူး ပေါင်းပြီး လာသမျှ မိန်းကလေး၊ ယောက်ျားမှန်သမျှကို အကုန်ဖမ်းဆီးသွားရာ ပြည်သူ ၁၀၀ နီးပါး ဖမ်းဆီးခံလိုက်ရခြင်း ဖြစ်ကြောင်း၊ ထို့သို့ ဖမ်းဆီးသွားသူများကို မည်သည့် နေရာတွင် ထိန်းသိမ်းထား ကြောင်း သိရှိရခြင်းမရှိသဖြင့် မိသားစုဝင်များမှာ စိတ်ပူနေကြရကြောင်း သိရသည်။
“ ညောင်ဦးမြို့အရှေ့ဘက် ညောင်ဦးလက်ပံခြေပေါ်ကြားမှာ လာသမျှပြည်သူ ကျား၊ မအကုန် ဖမ်းတာ၊ ၁၀၀ နီးပါးလောက်ဖမ်းခံရတယ်လို့ ကြားတယ်။ ညောင်ဦးမြို့ပေါ်ကို ဖမ်း ခေါ်သွာတယ်လို့တော့ သိရတယ်၊ ဘယ်နေရာမှာ ဖမ်းထားလဲဆိုတာ မသိရဘူး။ ကလေးမိဘတွေ အနေနဲ့က ဘယ်လိုက်လို့ လိုက်ရမှန်း မသိ ဖြစ်နေတယ်။” ဟု ညောင်ဦးမြို့နယ်ပကဖတာဝန်ခံ ကိုဇီး က ရန်ကုန်ခေတ်သစ် သတင်း ဌာနထံသို့ ပြောကြားသည်။
ညောင်ဦးမြို့ပေါ်တွင်လည်း လုံခြုံရေးတင်းကြပ်စစ်ဆေးနေပြီး စစ်ကြောင်းလည်း ထိုးနေသော ကြောင့် မိဘပြည်သူများအနေဖြင့် အရေးပေါ်ကိစ္စမှလွဲ၍ ခရီးသွားလာခြင်းမျိုး မပြုလုပ်ကြပါရန် ညောင်ဦးမြို့နယ်ပကဖက အထူးမေတ္တာရပ်ခံထားသည်။
“အခုညောင်ဦးမှာက လူငယ်ချင်းရန်ဖြစ်ရင်လည်း ပြည်သူ့စစ်ထဲ ထည့်တယ်။ အရက်သမား၊ ဆေး သမားတော်တော်များများကိုလည်း အကုန်ဖမ်းပြီး ပြည်သူ့စစ်ထဲထည့်တယ်။ ပြီးရင် လူမှုရေး ပြသနာ တွေဖြစ်တဲ့ မယားခိုးမှု ကျုးလွန်ရင်လည်း ရဲစခန်းရောက်တာနဲ့ တရားမစွဲဘဲပြည်သူ့စစ်ထဲ တခါ တည်း ထည့်ပေးလိုက်တာ၊ အခုက ဘာအမှုဖြစ်ဖြစ်၊ ဘာအမှုပဲလုပ်လုပ် အကုန်ပြည်သူ့စစ်ထဲ ပို့နေ တာ။ ပြည်သူ့စစ်များများစုဆောင်းပေးနိုင်ရင် ရဲတွေရာထူးတိုးပေးသလို ငွေလည်းရတယ်လို့ သိရပါ တယ်” ဟု ညောင်ဦးမြို့နယ်ပကဖတာဝန်ခံကိုဇီးက ရှင်းပြသည်။
ဓာတ်ပုံ- မန္တလေးမြို့ပေါ်တွင် စစ်ကားများဖြင့် လှည့်လည်စစ်ဆေးနေသော အကြမ်းဖက်စစ်ကောင်စီတပ်ဖွဲ့ဝင်များ။ (ပုံအဟောင်းဖြစ်ပါသည်။)
