ရန်ကုန်တိုင်း၊ မင်္ဂလာဒုံ စစ်ဆေးတက္ကသိုလ်ရှိ စစ်ဗိုလ်လောင်းများ နေထိုင်သော ၅ ထပ်အိပ်ဆောင်ကို ဒရုန်းဖြင့် ဗုံးကျဲတိုက်ခိုက်
ရန်ကုန်တိုင်း၊ မင်္ဂလာဒုံ စစ်ဆေးတက္ကသိုလ်ရှိ စစ်ဗိုလ်လောင်းများ နေထိုင်သော ၅ ထပ်အိပ်ဆောင်ကို ဒရုန်းဖြင့် ဗုံးကျဲတိုက်ခိုက်ခဲ့ကြောင်း ရန်ကုန်သူပုန်အဖွဲ့မှ တာဝန်ရှိသူတစ်ဦးက ရန်ကုန်ခေတ်သစ်သတင်းဌာနထံသို့ ပြောဆိုသည်။
ယနေ့ ဒီဇင်ဘာလ ၁၇ ရက်နေ့ နံနက် ၄ နာရီ ၁၀ မိနစ်အချိန် မင်္ဂလာဒုံမြို့နယ်ရှိ စစ်ကောင်စီစစ်ဆေးတက္ကသိုလ်ဝင်းအတွင်းရှိ စစ်ဗိုလ်လောင်းများနေထိုင်သော ၅ ထပ် အိပ်ဆောင်သို့ ဒရုန်း ၂ စင်းဖြင့် ဗုံးကျဲတိုက်ခိုက်ခဲ့ကြောင်း၊ ဒရုန်းတစ်စီးမှာ ပစ်မှတ်ဧရိယာသို့ ရောက်ရှိခဲ့ပြီး မစ်ရှင်အောင်မြင်ခဲ့သော်လည်း အခြားဒရုန်း ၁ စီးမှာမူ ပစ်မှတ်ဧရိယာမရောက်ခင် စက်ပိုင်းဆိုင်ရာ ချွတ်ယွင်းမှုကြောင့် လမ်းတစ်ဝက်ခန့်တွင် ပျက်ကျခဲ့ကြောင်း သိရှိရသည်။
ပျက်သည့် ဒရုန်းကို ပြန်လည်ရယူရန် ကြိုးစားသော်လည်း ပျက်ကျသည့်နေရာတ၀ိုက်တွင် စစ်ကောင်စီတပ်သားများက စစ်ဆေးရှာဖွေမှုများ ပြုလုပ်နေသဖြင့် ဒရုန်းပြန်လည်ရယူနိုင်ရန် ကြိုးစားမှုကို လက်လျှော့လိုက်ရကြောင်း၊ ဒရုန်းဖြင့် ဗုံးကျဲမှုကြောင့် စစ်ဆေးတက္ကသိုလ်မှ အထိအခိုက်အခြေအနေ မသိရသေးကြောင်း သိရှိရသည်။
“ရန်ကုန်မြို့တွင်းပထမဆုံးအဆင့်မှီ Door to Door Delivery Service ဖြင့် မင်္ဂလာဒုံရှိ စစ်ဆေးတက္ကသိုလ်နားနေဆောင်သို့ ဖျက်အားပြင်းမိုင်းတစ်လုံးပို့ဆောင်ခဲ့ပါတယ်။ Customer Feedback ကိုလက်ခံစောင့်ဆိုင်းနေဆဲဖြစ်ပြီး Feedbackကောင်းများရရှိပါက ၀န်ဆောင်မှုများအားထပ်မန်အဆင့်မြှင့်တင်သွားမည်ဖြစ်ပါတယ်။ များမကြာခင်လည်း နှစ်သစ်လက်ဆောင်များကို စခ/ရခ ဌာနများသို့အဆက်မပြတ်ပို့ဆောင်ပေးဦးမည်ဖြစ်ပါသောကြောင့် ရင်ခုန်စွာမျှော်လင့်စောင့်စားကြပါကုန်သော်” ဟု ရန်ကုန်သူပုန်က ထုတ်ပြန်ထားသည်။
