ရန်ကုန်၊ ဒီဇင်ဘာ ၂၀
ရခိုင်ပြည် ဂွမြို့အခြေစိုက် ခမရ ၅၆၃ တပ်ရင်းကို သိမ်းပိုက်လိုက်ပြီး ခမရ ၅၆၂ တပ်ရင်းထဲတွင် စစ်ကောင်စီတပ်ဖွဲ့ဝင်များ ဆက်လက်ခုခံနေကြောင်း AA ရှေ့တန်းသတင်းရင်းမြစ်က ရန်ကုန်ခေတ်သစ်သတင်းဌာနထံသို့ ပြောဆိုသည်။
ယနေ့ ဒီဇင်ဘာလ ၂၀ ရက်နေ့ နံနက်အစောပိုင်း ဂွမြို့အခြေစိုက် ခမရ ၅၆၃ တပ်ရင်းကို သိမ်းပိုက်လိုက်ခြင်းဖြစ်ပြီး အဆိုပါစခန်းမှ စစ်ကောင်စီတပ်ဖွဲ့တချို့က ခမရ ၅၆၂ တပ်ရင်းထဲသို့ သွားရောက်ပြီး ဆက်လက်ခုခံနေ ကြောင်း သိရှိရသည်။
“ဂွမြို့ ခမရ ၅၆၃ ကိုသိမ်းလိုက်ပါပြီ။ ကျန်တဲ့ကောင်တွေကတော့ ခမရ ၅၆၂ မှာ စုပြီး ခုခံနေကြတယ်” ဟု AA သတင်းရင်းမြစ်တစ်ခုကပြောဆိုသည်။
ဂွမြို့ထဲတွင် စစ်ကောင်စီ၏ ခမရ ၅၆၂ နှင့် ခမရ ၅၆၃ တပ်ရင်းတို့ရှိပြီး ခမရ ၅၆၃ တပ်ရင်းကို အာရက္ခတပ်တော် AA က သိမ်းပိုက်လိုက်ခြင်းဖြစ်ကြောင်း၊ ခမရ ၅၆၃ တပ်ရင်းကို သိမ်းပိုက်ရရှိပြီး ဂွမြို့ထဲကို ထိန်းချုပ်ထားသည့် သတင်းအပေါ် AA က တရားဝင် အတည်ပြု ထုတ်ပြန်ခြင်းမရှိသေးပေ။
ခမရ ၅၆၂ တပ်ရင်းသည် သံတွဲ၊ ကျိန္တလီဘက်က လာလျှင်တွေ့ရသော ဂွမြို့အဝင်က တပ်ရင်းဖြစ်ပြီး ခမရ ၅၆၃ တပ်ရင်းသည် ရန်ကုန်၊ ဧရာဝတီဘက်က လာလျှင်တွေ့ရသော ရိုးတောင်အဆင်း ဂွမြို့အဝင်တွင် တွေ့ရသော တပ်ရင်းဖြစ်သည်။
လက်ရှိတွင် ဂွမြို့အတွင်း အာရက္ခတပ်တော် AA နှင့် စစ်ကောင်စီတို့မှာ နှစ်ဖက်တိုက်ပွဲ ပြင်းထန်နေပြီး AA က နောက်ဆုံးကျန်ရှိနေသည့် ခမရ ၅၆၂ တပ်ရင်းကို ထိုးစစ်ဆင်တိုက်ခိုက်နေကြောင်း သိရသည်။
ဂွမြို့သည် ရခိုင်ပြည် တောင်ပိုင်းဒေသ၏ အဆုံးမြို့တစ်ခုဖြစ်ပြီး ဧရာဝတီတိုင်းဒေသနှင့် ထိစပ်နေသော နယ်စပ်မြို့တစ်မြို့လည်းဖြစ်ကြောင်း၊ ဂွမြို့မကျစေရေး အတွက် အာဏာသိမ်း စစ်ကောင်စီသည် ဧရာဝတီတိုင်းဒေသက စစ်ကူအများအပြားဖြင့် ပင်လယ်ပြင်က လာရောက်ကာ AA ထိုးစစ်အား အပြင်းအထန် ခုခံနေကြောင်း သိရသည်။
#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup #rejectmilitarycoupmyanmar
