ဒလ၊ ဆင်ဖြေဖုံးရပ်ကွက်မှ မထင်မရှား ကျော်စွာလင်းကို အနာဂတ်တပ်ချုပ်ရာထူးပေးဖို့ မင်းအောင်လှိုင် ရည်ရွယ်နေတာလား

စစ်မတိုက်ဖူးသူကို ညှိ/ကွပ်ရာထူးပေးလို့ စစ်တပ်ထဲမှာ ဝေဖန်သံတွေ အကြီးအကျယ် ဆူညံ

By ရန်ကုန်ခေတ်သစ်

အကြမ်းဖက်စစ်ခေါင်းဆောင် မင်းအောင်လှိုင်က ဒီဇင်ဘာလ ၁၈ ရက်နေ့မှာ စစ်ဦးစီးအရာရှိချုပ်(ကြည်း) ရာထူးနဲ့ စစ်ထောက် ချုပ် ရာထူး ပူးတွဲ ရယူထားတဲ့ သူ့ လူယုံ ဒုဗိုလ်ချုပ်ကြီး ကျော်စွာလင်းကို ကြည်း၊ ရေ၊ လေ ညှိနှိုင်းကွပ်ကဲရေးမှူးအဖြစ် ရာထူးတိုးပေးလိုက်ပါတယ်။ ဒုဗိုလ်ချုပ်ကြီး အဆင့်ကနေ ဗိုလ်ချုပ်ကြီးရာထူးတိုးပေးပြီး စစ်တပ်ရဲ့ နံပါတ် ၃ ခေါင်းဆောင်အဖြစ် တာဝန်ပေးလိုက်တာဖြစ်ပါတယ်။

ဒီလိုရာထူးတိုးပေးလိုက်တာကြောင့် နံပါတ် ၃ ခေါင်းဆောင်ဖြစ်လာတဲ့ ဗိုလ်ချုပ်ကြီးကျော်စွာလင်းက တပ်ချုပ်ရာထူးအတွက် လျာထားတယ်လို့ စစ် တပ်အသိုင်းအ၀ိုင်းက သုံးသပ်ပြောဆိုလာပါတယ်။ စစ်ခေါင်းဆောင် မင်းအောင်လှိုင်က ၂၀၂၅ ရွေးကောက်ပွဲ ကျင်းပပြီး အရပ်ဘက် သမ္မတရာထူးရယူနိုင်ဖွယ်ရှိတယ်လို့ တပ်သတင်းရင်းမြစ်တွေက ခိုင်ခိုင်မာမာ ပြောဆိုလာပါတယ်။

အသက် ၅၀ ကျော်ဝန်းကျင် သာရှိသေးတဲ့ ကျော်စွာလင်းကို စစ်တပ်ရဲ့ ကြည်းရေလေ ညှိနှိုင်းကွပ်ကဲရေးမှူး အဖြစ် တာဝန်ပေးအပ်လိုက်တာ အနာဂတ်တပ်ချုပ်ရာထူးအတွက် ရည်ရွယ်ထားမှုကို မြင်ရတဲ့အပြင် အခြားတစ်ဖက်မှာလည်း တစ်ခါ စစ်မတိုက်ဖူးသေးတဲ့ သူတစ်ဦးကို နံပါတ် ၃ ကြည်း၊ ရေ၊ လေ ညှိနှိုင်းကွပ်ကဲရေးမှူး ရာထူးပေးလိုက်တာမို့ စစ်တပ်ထဲမှာ အလိုမကျမှုတွေက အကြီးအကျယ်ဖြစ်ပေါ်နေပါတယ်။

ဒုတိယဗိုလ်ချုပ်ကြီး ကျော်စွာလင်းက စစ်တက္ကသိုလ် အပတ်စဉ် ၃၅ ကျောင်း ဆင်း တစ်ဦးဖြစ်ပြီး ၂၀၁၈ ခုနှစ်မှာ အလယ်ပိုင်းတိုင်း တိုင်းမှူး၊ ၂၀၂၀ ခုနှစ် မေလမှာ ဒုတိယဗိုလ်ချုပ်ကြီးရာထူးနဲ့ စစ်ထောက်ချုပ်တာဝန်ရယူခဲ့ပါတယ်။ အဲဒီနောက် စစ်ဦးစီးအရာရှိချုပ်(ကြည်း) အဖြစ် ၂၀၂၃ ခုနှစ်မှာ ပူးတွဲ တာဝန်ယူခဲ့ပါတယ်။

ဒုတိယ ဗိုလ်ချုပ်ကြီး ကျော်စွာ လင်းက G3 ဘ၀ကစလို့ ဒုတိယဗိုလ်ချုပ်ကြီးဖြစ်တဲ့အထိ စစ်မတိုက်ဖူးပါဘူး။ ကိုယ်ရေးအရာရှိရာထူး၊ စစ်ရုံးမှာပဲ ရုံးစီမံခန့်ခွဲရေး ရာထူး တာဝန်တွေကိုသာ ထမ်းဆောင်ခဲ့သူဖြစ်ပြီး သူရာထူးတက်ခဲ့တဲ့အဆင့်ဆင့်ကလည်း အဖားကောင်းလို့ ရာထူး ရသူလို့ တပ်သတင်းရင်းမြစ်တွေက ဆိုပါတယ်။

ကျော်စွာလင်းက မင်းအောင်လှိုင်ကို ဆရာလိုတစ်မျိုး၊ အဖေလိုတစ်ဖုံ ကိုးကွယ်သူလို့ တပ်သတင်းရင်းမြစ်တွေက ဆိုပါတယ်။ တစ်ချိန်က သန်းရွှေကို မင်းအောင်လှိုင်က ခြေသုတ်ပုဆိုး မြေစွယ်ကျိုး ကျိုးနွံ့ကိုးကွယ်ခဲ့သလိုပါပဲ။ ကျော်စွာလင်းကို လူယုံအဖြစ် လက်သက်မွေးထားတာက မင်းအောင်လှိုင်ဖြစ်ပါတယ်။

အသက်ငယ်ငယ်နဲ့ ဗိုလ်ချုပ်ကြီးရာထူးရလာသလို အခြားတစ်ဖက်မှာလည်း တပ်ချုပ်ရာထူးကို မျှော်မှန်းတဲ့အထိ ကျော်စွာလင်းက ရည်မှန်းချက်ကြီးသူလို့ ဆိုပါတယ်။ သူ့ရှေ့က စီနီယာ ဒုတိယဗိုလ်ချုပ်ကြီး မိုးမြင့်ထွန်းလို အဖြစ်မခံနိုင်တဲ့အတွက် လာဘ်ပေးလာဘ်ယူကိစ္စတွေကိုတော့ သူတတ်နိုင်သမျှ ရှောင်တာတွေ့ရတယ်လို့ တပ်သတင်းရင်းမြစ်တွေက ပြောပါတယ်။ သူအမြဲ ကြွေးကြော်တာက သူက အဂတိတရားကင်းတယ်၊ ဘယ်တော့မှ လာဘ် မစားဘူးကွဆိုပြီး ရှေ့လူ(ဒုတိယဗိုလ်ချုပ်ကြီး မိုးမြင့်ထွန်း) ထက်သာ တယ်လို့ မကြာခဏ ကြွားလုံးထုတ်ပါတယ်။

မင်းအောင်လှိုင်ရဲ့ မြှောက်စားမှုနဲ့ ဒုချုပ် စိုးဝင်းနဲ့ ညှိကွပ်ဟောင်း ဗိုလ်ချုပ်ကြီး မောင်မောင်အေးတို့ကို အရင်ကတည်းက သိပ်ပြီး ဂရုမစိုက်ခဲ့ပါဘူး။ အဆင့်တူ ဒုတိယ ဗိုလ်ချုပ် ကြီးတွေနဲ့ ဗိုလ်ချုပ်တွေကိုတောင် ရာထူး ဂုဏ်မောက်ပြီး မောက်မောက်မာမာ ပြောဆို ဆက်ဆံပါတယ်။ အခုလို စစ်တပ်ရဲ့ နံပါတ် ၃ ခေါင်းဆောင် ဖြစ်လာချိန်မှာတော့ ပိုပြီးတော့ မောက်မာလာဖို့ရှိနေတာကတော့ သေချာပေါက်ပါပဲ။ စစ်ဘက်ဆိုင်ရာ အစည်းအဝေးတွေမှာ သူက ဦးဆောင်ပြောပြီး သူ့ထက် စီနီယာ တချို့ရဲ့ တင်ပြချက်တွေကိုလည်း ဆုံးအောင် နားထောင်လေ့မရှိဘူးလို့ တပ်သတင်းရင်းမြစ်တွေက ဆိုပါတယ်။

ကျော်စွာလင်းမှာ မင်းအောင်လှိုင် သဘောကျတဲ့အချက်တစ်ခုကတော့ အုပ်စုမဖွဲ့ဘဲ မင်းအောင်လှိုင်ကိုသာ ဘုရားလို ကိုးကွယ်တာပါ။ ဒီအချက်ကို မင်းအောင်လှိုင်က အဓိက သဘောကျတာလို့ ဆိုပါတယ်။ အရပ်ပုတာချင်းလည်းတူ၊ အထက်အရာရှိကို ကျိုးနွံ့တာချင်းလည်း တူတဲ့အတွက်တော့ မင်းအောင်လှိုင်က ကျော်စွာလင်းကို သူ့ကိုယ်ပွားလို့ မြင်ပုံရတယ်လို့ တပ်သတင်းရင်းမြစ်တချို့က ပြောပါတယ်။

ကျော်စွာလင်းရဲ့ ဖြစ်တည် လာရာလမ်းကြောင်းကို ပြန်ကြည့်ရင်လည်း သူက ရန်ကုန်တိုင်း၊ ဒလမြို့နယ်၊ ဆင်ခြေဖုံးရပ်ကွက်တစ်ခုဖြစ်တဲ့ အံကြီးရပ်ကွက်မှာ မထင်မရှား မွေးဖွားခဲ့သူဖြစ်ပြီး မွေးဖွားချိန်က မိဘတွေက ဆင်းရဲလွန်းပါတယ်။ မိခင်ဖြစ်သူက အချိန်တော်တော်ကြာ ပဲပြုတ်ရောင်း၊ စျေးရောင်းပြီး ကျော်စွာလင်းကို ကျွေးမွေးခဲ့ရတာလို့ဆိုပါတယ်။ ဆင်းရဲတဲ့ အသိုင်းအ၀ိုင်းက လာသူ၊ စီးပွားရေးနောက်ခံ ဘက်ဂရောင်း ကြီးကြီးမားမား မရှိသူ စတဲ့ အချက်တွေက မင်းအောင်လှိုင်အတွက် သူ့ကို တစ်ချိန် ဘေး မဖြစ်စေဖို့ အဓိက ဦးတည်ရွေးချယ်နေပုံရတယ်လို့ တပ်သတင်းရင်းမြစ်တွေက ဆိုပါတယ်။

ဘယ်လိုပဲဖြစ်ဖြစ် ရှေ့တန်းမှာ စစ်မတိုက်ခဲ့ဖူးသူ၊ ဒလမြို့ရဲ့ ဆင်ခြေဖုံးရပ်ကွက်မှာ မထင်မရှား ဆင်းဆင်းရဲရဲ မွေးလာသူ ကျော်စွာလင်းကို နံပါတ် ၃ စစ်ခေါင်းဆောင်အဖြစ် မင်းအောင်လှိုင် တာဝန်ပေးတာက တပ်ချုပ်ရာထူးကို သူလက်လွှတ်တဲ့အခါ သူ့ကို အန္တရာယ်မပေးနိုင်တဲ့သူကို တမင် စီစဉ် ရည်ရွယ် ရွေးချယ်မှုအဖြစ် စစ်တပ်အသိုင်းအ၀ိုင်းက သုံးသပ်ပြောဆိုကြပါတယ်။

#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup #rejectmilitarycoupmyanmar