ရန်ကုန်၊ ဒီဇင်ဘာ ၂၇
ရန်ကုန်တိုင်း၊ မြောက်ဥက္ကလာမြို့နယ်နှင့် ပဲခူးတိုင်း မင်းလှမြို့နယ်တွင် အကြမ်းဖက် စစ်တပ်က လူငယ်များကို ပေါ်တာဆွဲ ဖမ်းဆီးမှုကြောင့် လူငယ် ၁၀ ဦးကျော် ဖမ်းဆီးခံရကြောင်း ဒေသပြည်သူများက ရန်ကုန်ခေတ်သစ်မီဒီယာသို့ ပြောဆိုသည်။
ယမန်နေ့ ဒီဇင်ဘာလ ၂၆ ရက်နေ့ မွန်းလွဲပိုင်းတွင် မြောက်ဥက္ကလာမြို့နယ်၊ ဓမ္မာရုံးမှတ်တိုင်အနီးရှိ ဓမ္မာရုံတွင် တပ်စွဲထားသော အကြမ်းဖက် စစ်ကောင်စီ တပ်သားများက ဌ ရပ်ကွက်ထဲထိ ဝင်ရောက်ပြီး လူငယ် ၂ ဦးကို ပေါ်တာဆွဲ ဖမ်းဆီးခဲ့ကြောင်း သိရသည်။
“မြောက်ဥက္ကလာ ဓမ္မာရုံ မှတ်တိုင် ဓမ္မာရုံမှာ တပ်စွဲထားတဲ့ စစ်ခွေးတွေက မနေ့က မွန်းလွဲပိုင်းမှာ ရပ်ကွက်ထဲထိ ဝင်ဆွဲတာ ကောင်လေး ၂ ဦး ပါသွားတယ်။ လက်နက်တွေ ကိုင်ဆောင်ပြီး ပေါ်တင်ကို ပေါ်တာဆွဲတာ ဌ ရပ်ကွက် နှင်းဆီဘက်က လူငယ် ၂ ဦး ပါသွားတယ်လို့ သိရတယ်။ လမ်းပေါ်မှာတွေ့ တန်းဆွဲတာ ကလေးတွေက သားတို့ ကို ဘာလို့ ဖမ်းတာလည်း မေးတော့ မင်းတို့ကို ပေါ် တာ ဆွဲ တာလို့ပြောပြီး ဖမ်းသွားတာလို့ သိရတယ်” ဟု ဒေသပြည်သူတစ်ဦးက ပြောဆိုသည်။
ယင်းနေ့ ညနေ ၅ နာရီ ၄၅ မိနစ်ခန့်တွင် မြောက်ဥက္ကလာမြို့နယ်၊ ဂ ရပ်ကွက်၌ အကြမ်းဖက် စစ်ကောင်စီ တပ်သားများက အိမ်စီးကားဖြင့် ပတ်ပြီး ဥက္ကလာလမ်းပေါ်ရှိ မဟာနွယ် လက်ဖက်ရည်ဆိုင်ကို ဝင်ရောက်ကာ အမျိုးသား ၅ ဦးကို ပေါ်တာဆွဲ ဖမ်းဆီးသွားကြောင်း မြောက်ဥကလာပမြို့နယ် ပြည်သူကာကွယ်ရေးတပ်ဖွဲ့က ထုတ်ပြန်ထားသည်။
အလားတူ ဒီဇင်ဘာလ ၂၄ ရက်နေ့နှင့် ၂၅ ရက်နေ့တွင် မင်းလှမြို့အထွက် မဟာစည်ရိပ်သာအနီး ကားလမ်း၊ ညောင်ဝင်းရွာနှင့် သရက်ပင်ဆိပ်ရွာ မှ လူငယ် ၈ ဦးကိုလည်း အကြမ်းဖက် စစ်ကောင်စီ တပ်သားများက ပေါ်တာဆွဲ ဖမ်းဆီးခဲ့ကြောင်း သိရသည်။
ထို့ပြင် ဒီဇင်ဘာလ ၅ ရက်နေ့တွင် ဧရာဝတီတိုင်း၊ ညောင်တုန်းမှ ရန်ကုန်သို့ ပြန်လာသည့် အသက် ၂၂ နှစ်အရွယ် ကိုစိုးထက်ကျော်လည်း လက်ရှိအချိန်အထိ ပျောက်ဆုံးနေပြီး မိသားစုဝင်များနှင့် အဆက်အသွယ် ပြတ်တောက်နေကြောင်း သိရှိရသည်။
” ၅ ရက်နေ့မှာ ကိုစိုးထက်ကျော်က ညောင်တုန်းကနေ ရန်ကုန်ကို အပြန်မှာ ပျောက်သွားတာ အခုထိ အဆက်သွယ်မရသေးဘူး” ဟု ဒေသပြည်သူတစ်ဦးက ပြောဆိုသည်။
အလားတူ ပဲခူးတိုင်း၊ မင်းလှမြို့နယ်၊ သင်္ဃန်းချောင်းရွာမှ ၉ တန်းကျောင်းသား အသက် ၁၄ နှစ်အရွယ် မောင်ကောင်းခန့်နိုင်သည်လည်း ဒီဇင်ဘာလ ၂၅ ရက်နေ့ နံနက် ၆ နာရီ ၃၀ မိနစ်ခန့်တွင် ကျူရှင်သွားမည်ဟုဆိုပြီး နေအိမ်မှ ထွက်သွားပြီးနောက် ပျောက်ဆုံးနေကြောင်း ဒေသပြည်သူများထံမှ သိရသည်။
ဓာတ်ပုံ – မိသားစုဝင်များနှင့် အဆက်အသွယ် ပြတ်တောက်ပြီး ပျောက်ဆုံးနေသည့် အသက် ၂၂ နှစ်အရွယ် ကိုစိုးထက်ကျော်နှင့် အသက် ၁၄ နှစ်အရွယ် မောင်ကောင်းခန့်နိုင်။
#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup #rejectmilitarycoupmyanmar
