ချောင်းဦးတွင် မိုင်းရှင်းရန် ထွက်လာသော စစ်သားများနှင့် မုံရွာ-မန္တလေး လမ်းပိုင်းရှိ မြပုလဲ စစ်တပ်ဂိတ် တို့ကို တိုက်ခိုက်မှု စစ်ကောင်စီ တပ်သား ၁ ဦး သေဆုံး
စစ်ကိုင်းတိုင်း၊ ချောင်းဦးမြို့နယ်တွင် မိုင်းရှင်းရန် ထွက်လာသော အကြမ်းဖက် စစ်သားများကို မိုင်းဆွဲ တိုက်ခိုက်ရာ စစ်တပ်ဘက်မှ ၁ ဦးသေဆုံးခဲ့ကြောင်း Yae Nagar အဖွဲ့မှ တာဝန်ရှိသူ တစ်ဦးက ရန်ကုန်ခေတ်သစ် သတင်းဌာနထံသို့ ပြောဆိုသည်။
ယနေ့ ဒီဇင်ဘာလ ၃၀ ရက်နေ့ နံနက် ၈ နာရီ ၇မိနစ်ခန့်တွင် ချောင်းဦးမြို့မှ မိုင်းရှင်းရန် Light truck ကားဖြင့် ထွက်လာသော အကြမ်းဖက် စစ်သားများကို ချောင်းဦးနှင့် နတ်ရေကန် အကြား လမ်းပိုင်း တစ်နေရာတွင် တော်လှန်ရေး တပ်ဖွဲ့များက ပဒေသာမိုင်းဖြင့် မိုင်းဆွဲ တိုက်ခိုက်ခဲ့ရာ စစ်သား ၁ ဦး သေဆုံးခဲ့ကြောင်း သိရသည်။
“ချောင်းဦးကနေ မိုင်းရှင်းဖို့ ထွက်လာတဲ့ စစ်ခွေးတွေကို မိုင်းဆွဲတိုက်ခိုက်ခဲ့ပါတယ်။ ချောင်းဦးနဲ့ နတ်ရေကန်ကြား လမ်းပိုင်း တစ်နေရာမှာ စစ်ခွေးတွေ Light truck ကား ရပ်ပြီး မိုင်းရှင်းနေတဲ့အချိန် ပဒေသာမိုင်းနဲ့ တိုက်ခိုက်ခဲ့တာပါ စစ်ခွေး ၁ ကောင်သေပြီး ၁ ကောင် ဒဏ်ရာရတယ်” ဟု Yae Nagar အဖွဲ့မှ တာဝန်ရှိသူ တစ်ဦးက ပြောဆိုသည်။
အဆိုပါ တိုက်ခိုက်မှုကို Yae Nagar အဖွဲနှင့် Seven Defend Force တို့က ပူးပေါင်း လုပ်ဆောင်ခဲ့ခြင်းဖြစ်ကြောင်း သိရသည်။
ထို့ပြင် စစ်ကိုင်းတိုင်း၊ မုံရွာ-မန္တလေး လမ်းပိုင်းတွင် လူငယ်များကို ပေါ်တာဆွဲ ဖမ်းဆီး ငွေညှစ်နေသည့် မြပုလဲဂိတ်ကို ဒရုန်းဖြင့် ဗုံးကျဲ တိုက်ခိုက်ရာ စစ်တပ်ဘက်မှ ထိခိုက်မှုရှိကြောင်း 5/ Commando Force အဖွဲ့ တာဝန်ခံ Zapya က ရန်ကုန်ခေတ်သစ် သတင်းဌာနထံ သို့ပြောဆိုသည်။
ဒီဇင်ဘာလ ၂၉ ရက်နေ့ နံနက် ၁၀ နာရီ ၃၀ မိနစ်မှ မွန်းလွဲ ၃ နာရီ အထိ မုံရွာ-မန္တလေး လမ်းပိုင်းတွင် လူငယ်များကို ပေါ်တာဆွဲ ဖမ်းဆီး ငွေညှစ်နေသော အကြမ်းဖက် စစ်တပ်၏ မြပုလဲဂိတ်ကို ဒရုန်းဖြင့် ဗုံးကျဲ တိုက်ခိုက်ခဲ့ခြင်းဖြစ်ကြောင်း သိရသည်။
ယင်းတိုက်ခိုက်မှု အတွင်း အကြမ်းဖက် စစ်ကောင်စီ တပ်သားများ ထိခိုက်မှုရှိသော်လည်း အရေအတွက်ကို အတည်ပြုနိုင်ခြင်းမရှိသေးကြောင်း၊ တော်လှန်ရေး တပ်ဖွဲ့ဝင်များ အထိအခိုက်မရှိ ဆုတ်ခွာနိုင်ခဲ့ကြောင်း သိရှိရသည်။
“ခွေးသေ စာရင်းကတော့ မသိရှိရသေးပါဘူး။ ထိခိုက်မှုတော့ရှိတယ်။ စစ်ခွေးတွေ ဘက်က ပြန်လည် ပစ်ခတ်တာမျိုးတော့ မရှိပါဘူး။ ဒီတိုက်ခိုက်မှုက အဆိုတော် စံလင်းစံ ကျဆုံးခြင်း ၁ နှစ်ပြည့် အထိမ်းအမှတ်အနေနဲ့ တိုက်ခိုက်ခဲ့တာပါ။ သူနဲ့ ကျန်တော်တို့က သူငယ်ချင်းတွေ ဖြစ်ခဲ့သလို အာဏာသိမ်းပြီးနောက်ပိုင်း ဆန္ဒပြပွဲတွေမှာ အတူတူပူပေါင်း ဦးဆောင်းခဲ့တာတွေ ရှိပါတယ်။ သူက UG ဖွဲ့စည်းတော့လည်း သူရဲ့ ရဲဘော်အဖြစ် ပါဝင်ခွင့်ရခဲ့တယ်။ ကျွန်တော်တို့ သံယောဇဥ်က ကျွန်တော်တို့ ထောင်ကျတာတောင် ထောင်ထဲမှာ အတူနေရသေးတယ်။ အရမ်းသူ့ကို သတိရတယ်။ သူကျဆုံးသွားတဲ့အတွက်လည်း စိတ်မကောင်းဖြစ်ရတယ်။ ပုသိမ်ထောင်ပိုင်ရဲ့ ယုတ်မာမှုတွေကြောင့် သူအခုလို ဖြစ်ရတာ စံလင်းစံ မရှိတော့ပေမယ့် သူတည်ထောင်ထားတဲ့ Black Dragon Force Pyapon BDFP အဖွဲ့ အခုထိ ရှိသေးတယ်တာရယ်။ ရဲဘော်တွေလဲ ပြန်လည် စုစည်းနေပါတယ်လို့ ပြောချင်ပါတယ်”ဟု 5/ Commando Forceအဖွဲ့ တာဝန်ခံ Zapya က ပြောဆိုသည်။
အဆိုပါတိုက်ခိုက်မှုကို မုံရွာခရိုင် ပြည်သူ့ကာကွယ်ရေးတပ်မတော်တပ်ရင်း ၄ အထူးကွန်မန်ဒိုတပ်ဖွဲ့ Monywa The Boys၊ မုံရွာခရိုင် ပြည်သူ့ကာကွယ်ရေးတပ်မတော်တပ်ရင်း ၄ တပ်ခွဲ ၂ 5/ Commando Force ၊ မုံရွာခရိုင် ပြည်သူ့ကာကွယ်ရေးတပ်မတော် အမှတ် ၉ တပ်ရင်း FRF 2၊ မုံရွာခရိုင် ပြည်သူ့ကာကွယ်ရေးတပ်မတော်တပ်ရင်း ၂၃ တပ်ခွဲ ၂ ၊ Tiger Brothers people’s Defence Force၊ BLDF အညာမိုင်း အဖွဲ့တို့က ပူးပေါင်း လုပ်ဆောင်ခဲ့ကြခြင်း ဖြစ်ကြောင်း သိရှိရသည်။
