ဘီးလင်းမြို့နယ်၊ လဂွန်းပျို စစ်စခန်းမှ စစ်ကောင်စီ တပ်သား ၁၆ ဦး သည် လက်နက်မျိုးစုံ ၁၅ လက် ယူဆောင်လာပြီး PDF တပ်ဖွဲ့ထံ အလင်းဝင်
မွန်ပြည်နယ်၊ ဘီးလင်းမြို့နယ်၊ လဂွန်းပျို စစ်စခန်းမှ စစ်ကောင်စီ တပ်သား ၁၆ ဦး လက်နက်မျိုးစုံ ၁၅ လက် ယူဆောင်လာပြီး အလင်းဝင်ရောက်ခဲ့ကြောင်း တောင်ပိုင်းစစ်ဒေသက ပြောဆိုသည်။
ဇန်နဝါရီလ ၇ ရက်နေ့ နံနက်ပိုင်းတွင် ဘီးလင်းမြို့နယ်၊ လဂွန်းပျို စစ်စခန်းမှ စစ်ကောင်စီ တပ်သား ၁၆ ဦးသည် တော်လှန်ရေး ပူးပေါင်းတပ်ဖွဲ့များထံ ချိတ်ဆက်၍ အလင်းဝင်ရောက်လာခြင်းဖြစ်ပြီး ပြည်သူ့ကာကွယ်ရေး တပ်မတော်၊ တောင်ပိုင်းစစ်ဒေသ၊ စစ်ဒေသခွဲ အမှတ် ၂ ရှိ PDF ရဲဘော်များက ကြိုဆိုခဲ့ကြောင်း သိရသည်။
အဆိုပါ အလင်းဝင်လာသော စစ်ကောင်စီ တပ်သား ၁၆ ဦးသည် ၈၀ မမ ၁ လက် ၊ ၆၀ မမ ၁ လက်၊ ၅၀ မမ ၁ လက်၊ စက်လက် ၁ လက်၊ စနိုက်ပါ သေနတ် ၁ လက်၊ MA-1 သေနတ် ၇ လက်၊ MA-2 သေနတ် ၁ လက်၊ MA-3 သေနတ် ၁ လက်၊ MA-4 သေနတ် ၁ လက်တို့ကို ယူဆောင်လာပြီး အလင်းဝင်ရောက်လာခြင်းဖြစ်ကြောင်း သိရှိရသည်။
ကျန်ရှိနေသေးသော အကြမ်းဖက် စစ်ကောင်စီတပ်သားများအနေဖြင့်လည်း စစ်အာဏာရှင်ကို ဆန့်ကျင်ပြီး ပြည်သူလူထုအပေါ် အကြမ်းဖက်လုပ်ရပ်များ ထပ်မံလုပ်ဆောင်ခြင်းမပြုဘဲ ပြည်သူ့ကာကွယ်ရေးတပ်မတော်ထံသို့ လာရောက် ချိတ်ဆက် ပူးပေါင်းကြရန် တောင်ပိုင်းစစ်ဒေသက တိုက်တွန်း ပြောဆိုထားသည်။
