အထက် မင်းလှမြို့နယ်မြို့နယ်တွင် စစ်ကား ၂ စီးကို အနီးကပ် စောင့်ကြို တိုက်ခိုက်မှု ကပစ ၁၀ မှ အရာရှိများ အပါအဝင် စစ်တပ်ဘက်မှ ထိခိုက်သေဆုံးသူများပြား
မကွေးတိုင်း၊ အထက်မင်းလှမြို့နယ်တွင် အကြမ်းဖက် စစ်ကား ၂ စီးကို အနီးကပ် စောင့်ကြို တိုက်ခိုက်ခဲ့ရာ ကပစ ၁၀ မှ အရာရှိများ အပါအဝင် စစ်သား ၃၁ ဦးသေဆုံးပြီး အများအပြား ဒဏ်ရာရရှိခဲ့ကြောင်း United States Of Burma Army – USBA တပ်ဖွဲ့ တာဝန်ခံ ကိုဗဟိန်းက ရန်ကုန်ခေတ်သစ် သ တင်း ဌာနထံသို့ ပြောဆိုသည်။
ယနေ့ ဇန်နဝါရီလ ၂၈ ရက်နေ့ မွန်းလွဲ ၁ နာရီ ၂၈ မိနစ်ခန့်တွင် ကံတုပ်ကျေးရွာ အကြမ်းဖက် စစ်တပ်ဂိတ်မှ အထက် မင်းလှမြို့ဘက်သို့ ပြန်လာသည့် အင်အား ၄၉ ဦးပါ စစ်ကား ၂ စီးကို အထက်မင်းလှမြို့ နယ်အတွင်းရှိ သရက်-မင်းလှ ကားလမ်းနှင့် ပုသိမ်-မုံရွာ ကားလမ်းကို ဆက်သွယ်ပေးထားသော ကံတုပ် – စစ္စနို့ ကားပိုင်းရှိ လယ်လှကျေးရွာအနီး မန်းသံပုရာကန် ရေနံချက်စက်ရုံ -PIC နှင့် ၁၅ မိုင်အကွာ လမ်းပိုင်း တစ်နေရာတွင် တော်လှန်ရေး တပ်ဖွဲ့များက အနီးကပ် စောင့်ကြို တိုက်ခိုက်ခဲ့ခြင်းဖြစ်ကြောင်း သိရသည်။
“ကံတုတ်ကနေ စစ္စနို့ဘက်ကို (မင်းလှဘက်ကိုပေါ့) မောင်းပြီး ပြန်တာ။ အရာရှိအပါအဝင် ၃၁ ဦး သေတယ်။ လက်နက်ကမရဘူး။တိုက်ခိုက်ခံရပြီးတော့ ကားသမားက မသေမရှင်နဲ့ မောင်းနိုင်လိုက် တဲ့အခါကျတော့ ရှေ့မီတာ ၄၀၀ လောက်အထိမောင်း ပြေးသွားတာ အဲလောက် အကွာအဝေးကျမှ ကားသမားက မမောင်းနိုင်ဘဲနဲ့ သတိလွတ်သွားတာ အဲဒီအချိန်မှာ အကောင်း အတိုင်းကျန်နေတဲ့ သေနတ် ပစ်နိုင်သေးတဲ့ စစ်ခွေး ၁၅ ယောက် လောက်က ခုခံပြန်ပစ်တာ အဲဒီလို ပြန်ခံပစ်တာရယ် အဲဒီနေရာက ရန်သူ့အတွင်းပိုင်းကို အရမ်းကျ တယ်။ ကျနော်တို့အတွက် ဆုတ်ဖို့အချိန် မရဘူး။ တကယ်လို့ သူတို့နဲ့ ဆက်ပြီးတိုက်လိုက်ရင် ကျနော် တို့ ဆုတ်လမ်းအတွက်က တော်တော် အဆင်မပြေတော့ဘူး။ ချုံခို တိုက်ပွဲကနေ သမရိုးကျတိုက်ပွဲ အသွင် ပြောင်းသွားတဲ့အခါ ကျတော့ ဆုတ်ပေးလိုက်တာပါ။ ဘာမှတော့ သိမ်းဆည်းရရှိတာ မရလိုက်ဘူး” ဟု United States Of Burma Army – USBA တပ်ဖွဲ့မှာ တာဝန်ခံ ကိုဗဟိန်းက ရန်ကုန် ခေတ်သစ် သ တင်း ဌာနထံသို့ ပြောကြား သည်။
ထိုသို့ စီးနင်းတိုက်ခိုက်မှုအတွင်း ပကစ ၁၀ မှ အရာရှိများအပါအဝင် အကြမ်းဖက်စစ်သား ၃၁ ဦး သေဆုံးပြီး ၇ ဦး အပြင်းအထန် ဒဏ်ရာရရှိကာ လက်ကျန်စစ်သား အနည်းငယ်ဖြင့် အထက်မင်းလှ ဆေးရုံးသို့ မောင်းပြေးသွားကြောင်း၊ အဆိုပါ တိုက်ခိုက်မှုကို မကွေးတိုင်း ပကဖ အထူးလှုပ်ရှားတပ်ဖွဲ့ – United States Of Burma Army – USBA တပ်ဖွဲ့မှ တိုက်ခိုက်ခဲ့ခြင်းဖြစ်ပြီး ပြည်သူ့ကာကွယ်ရေးတပ်ဖွဲ့ဝင် ၃ ဦး ဒဏ်ရာရရှိခဲ့သော် သော်လည်း စိုးရိမ်စရာအခြေအနေမရှိကြောင်း သိရသည်။
ထိတွေ့ တိုက်ပွဲအတွင်း အထိနာခဲ့သော အကြမ်းဖက် စစ်တပ်က တိုက်ပွဲဖြစ်ပွားခဲ့သော နေရာ အနီးတဝိုက်ကို မြေပြင် စစ်ကြောင်း ၊ Drone များဖြင့်ပါ တိုက်ခိုက်နေပြီး လေယာဉ်ဖြင့်ပါ တိုက်ခိုက်မှုများ အချိန်မရွေး လုပ်ဆောင်လာနိုင်သောကြောင့် မင်းတုန်းမြို့နယ်၊ အထက် မင်းလှအတွင်းရှိ ပြည်သူများအနေဖြင့် အထူးဂရုပြု နေထိုင်ကြရန် တိုက်တွန်းထားသည်။
ဇန်နဝါရီလ ၂၅ ရက်နေ့မှ စတင်ကာ ပုသိမ် -မုံရွာ လမ်းပိုင်းရှိ ကံတုတ်ကျေးရွာဂိတ်စခန်းကို ရောက်ရှိနေသော အကြမ်းဖက် စစ်တပ် စစ်ကြောင်းသည် လက်ပံတံခါးတိုက်နယ်နှင့် ရှမ်းတပ်တိုက်နယ် အတွင်းကို သို့ လက်နက်ကြီးများဖြင့် ရမ်းသမ်းပစ်ခတ်၍ စစ်ကြောင်းထိုးနေခြင်းကြောင့် ပြည်သူ ၄၀၀၀ ခန့် ထွက်ပြေးတိမ်းရှောင်နေခဲ့ရကြောင်း သိရသည်။
“ဒီတစ်ခါသူတို့က အငိုက်မိတာ။ အဲဒီပတ်ဝန်းကျင်မှာရှိတဲ့ရွာတွေဆိုရင်လည်း စစ်ကောင်စီယန္တရား ၁၀၀ ရာခိုင်နှုန်းအပြည့်လည်ပတ်နေတဲ့ ရွာတွေပေါ့။ နည်းနည်းလေး လူတစ်ယောက်နဲ့ တွေ့ရင်က အစ သတင်းပေါက်မယ့် အနေအထားတွေပေါ့။ သူတို့နယ်မြေလို့ အပိုင်သတ်မှတ်ပြီးတော့ အဲဒီလမ်းပေါ်မှ သူတို့က တစ်ယောက်တည်းလည်းသွားတယ်။ ၂ ယောက်တည်းလည်းသွားတယ်။ အခုကားတွေဆိုရင်လည်း လုံးဝအေးအေးဆေးဆေးနဲ့သွားလာခဲ့တာ လက်နက်ကိုင်တော်လှန်ရေး ၄ နှစ် ပြည့်လို့ပြည့်ချိန်ကာလမှာတောင်မှ သူတို့က စိုးမိုးတဲ့ဒေသ အဲဒီလို ဒေသမှာ အခုလိုထဖြစ်တဲ့ အချိန် ကျတေ့ သူတို့အတွက်တော်တော်လေးတော့ ဆိုးဆိုးရွားရွား တုံ့ပြန်လာနိုင်ပါတယ်။ ဒါကြောင့် ဒေသပြည်သူတွေအနေနဲ့ကတော့ လက်နက်ကြီးနဲ့ ရမ်းသမ်းပစ်ခတ်မယ့်အန္တရာယ်တွေ၊ လေကြောင်း တိုက်ခိုက်မှုတွေကို သတိဝီရိယထားပြီးတော့ ကြိုတင်ပြင်ဆင်ကြဖို့ တိုက်တွန်းအကြံပေးလိုပါတယ်” United States Of Burma Army – USBA တပ်ဖွဲ့မှာ တာဝန်ခံ ကိုဗဟိန်းက ဆက်လက်ပြောဆိုသည်။
