ရန်ကုန်၊ ဇန်နဝါရီ ၃၁
မကွေးတိုင်း၊ ဆိပ်ဖြူမြို့နယ်၊ အလယ်စုရွာကို အကြမ်းဖက် စစ်တပ်က ဝင်ရောက်စီးနင်းပြီး နေအိမ် ၅ လုံးကို မီးရှို့ ဖျက်ဆီးကာ လူငယ် ၁၅ ဦးကို ပေါ်တာဆွဲ ဖမ်းဆီးသွားကြောင်း ဒေသပြည်သူများက ရန်ကုန်ခေတ်သစ်သတင်းဌာနထံသို့ ပြောဆိုသည်။
ဇန်နဝါရီ ၃၀ ရက်နေ့ညပိုင်း၊ ဆိပ်ဖြူမြို့နယ်၊ ကူရှည်အုပ်စု အလယ်စုကျေးရွာသို့ အကြမ်းဖက် စစ်တပ်က ရွာမှ ဈေးကားများပေါ်တွင် လိုက်ပါလာပြီး ကျေးရွာထဲကို ဝင်ရောက် စီးနင်းခဲ့ခြင်းဖြစ်ကြောင်း၊ အဆိုပါ စစ်တပ် စစ်ကြောင်းက ကျေးရွာအတွင်းသို့ ဝင်ရောက်စီးနင်းချိန်တွင် သားဖြစ်သူကို ထွက်ပြေးခိုင်းသည့် မိခင်တစ်ဦးကိုလည်း စစ်သားများက ပါးရိုက်ခြင်း၊ ရိုက်နှိက်ခြင်းများလည်း လုပ်ဆောင်သွားကြောင်း သိရှိရသည်။
စစ်ကြောင်း ဝင်ရောက်လာချိန်တွင် ကျေးရွာအတွင်းရှိ ပြည်သူများထွက်ပြေးသောကြောင့် စစ်သားများက နေအိမ် ၅ လုံးကို မီးရှို့ဖျက်ဆီးသွားပြီး လူငယ် ၁၅ ဦးကိုလည်း စစ်မှုထမ်းခိုင်းရန် ပေါ်တာဆွဲ ဖမ်းဆီးသွားခဲ့ကြောင်း သိရသည်။
“ဘာတိုက်ပွဲမှရှိပါဘူး။ လူနေအိမ် ၅ လုံးကိုတော့ မီးရှို့သွားတယ်။ သာမန်အရပ် ပြည်သူ မိခင် ၁ ဦးကိုလည်း ပါးရိုက်ပြီး ရိုက်နှက်သွားတယ်။ ဒဏ်ရာတွေကတော့ မစိုးရိမ်ရပါဘူး။ စစ်ခွေးတွေက သူ့သားကိုမေးပြီး သူသားမတွေ့လို့ဆိုပြီး မိခင်ကို ရိုက်နှက်သွားတာပါ။ သူ့ရဲ့ သားဖြစ်သူကတော့ ရှောင်တိမ်းနေလို့ လွတ်မြောက်သွားပါတယ်။ လူငယ် ၁၅ ဦးကတော့ စစ်မှုထမ်းဖို့အတွက်ဆိုပြီး ဖမ်းဆီးသွားပါတယ်” ဟု ဒေသပြည်သူ တစ်ဦးက ပြောဆိုသည်။
အကြမ်းဖက်စစ်တပ်က မကွေးတိုင်းနှင့်စစ်ကိုင်းတိုင်းတို့တွင် စစ်ကြောင်းထိုး၍ စစ်မှုထမ်း တပ်သားသစ်ရရန် လူငယ်များကို ဖမ်းဆီးခြင်းများ ဆက်တိုက်ဆိုသလိုလုပ်ဆောင်လာကြောင်း သိရှိရသည်။
ဓာတ်ပုံ – စစ်တပ်၏ မီးရှို့မှုကြောင့် မီးလောင်ပြာကျနေသည့် အလယ်စုကျေးရွာ။
#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup #rejectmilitarycoupmyanmar
