မင်းတုန်းမြို့နယ်တွင် စစ်ကြောင်းထိုးလာသော စစ်တပ်ကို တိုက်ခိုက်မှု စစ်သား ၁၀ ဦးထက်မနည်း သေဆုံးပြီး တော်လှန်ရေး ရဲဘော် ၁ ဦးကျဆုံး
မကွေးတိုင်း၊ မင်းတုန်းမြို့နယ်အတွင်း စစ်ကြောင်းထိုးလာသော စစ်တပ်ကို တိုက်ခိုက်ရာ စစ်တပ်ဘက်မှ ၁၀ ဦးထက်မနည်း သေဆုံးခဲ့ကြောင်း သရက်ခရိုင် အမှတ် ၄ တပ်ရင်း သတင်းနှင့် ပြန်ကြားရေးတာဝန်ခံ ကိုမြတ်က ရန်ကုန်ခေတ်သစ် သတင်းဌာနထံသို့ ပြောဆိုသည်။
ဖေဖော်ဝါရီလ ၁၈ ရက်နေ့ မင်းတုန်းမြို့နယ်၊ ကန်မနိုင်ကျေးရွာမှ စစ်ကြောင်းထိုးရန် ထွက်လာသော အကြမ်းဖက် စစ်တပ်၏ တပ်မ ၈၈ ၊ ကပစ ၁၂ နှင့် ပျူစောထီးများ ပူးပေါင်းထားသော အင်အား ၇၀ ပါ စစ်ကြောင်းက မြောက်ပြင်ကျေးရွာ ဘုန်း ကြီးကျောင်းအတွင်း ဝင်ရောက်တပ်စွဲခဲ့ကြောင်း၊ ယင်းနောက် ဖေဖော်ဝါရီလ ၁၉ ရက်နေ့ မွန်းလွဲ ၂ နာရီ ၂၅ မိနစ်ခန့်တွင် အကြမ်းဖက် စစ်ကောင်စီ တပ်သားများ တပ်စွဲထားသော မြောက်ပြင်ရွာ ဘုန်းကြီးကျောင်းကို တော်လှန်ရေး တပ်ဖွဲ့များက ဒရုန်းဖြင့် ၆၀ မမ ဗုံးသီးများဖြင့် စတင် ကျဲချတိုက်ခိုက်ခဲ့ကြောင်းသိရသည်။
ထို့နောက် ဖေဖော်ဝါရီလ ၁၉ ရက်နေ့ မွန်းလွဲ ၃ နာရီခန့်အချိန် ပြည်သူ့ကာကွယ်ရေးတပ်မတော် သရက်ခရိုင်အမှတ် – ၄ တပ်ရင်းမှ တပ်ခွဲ ၁ နှင့် တပ်ခွဲ ၂ မှ တော်လှန်ရေး ရဲဘော်များက ဘုန်းကြီးကျောင်းအတွင်းထဲထိ ထိုးစစ်ဆင် ဝင်ရောက် တိုက် ခိုက်ခဲ့ရာ တိုက်ပွဲပြင်းထန်ခဲ့ပြီး အကြမ်းဖက် စစ်တပ်ဘက်မှ လက်နက်ကြီးပစ်ကူများ အပြင် လေကြောင်းပစ်ကူများဖြင့်ပါ တိုက်ခိုက်ခဲ့ပြီး ညနေ ၅ နာရီခန့်တွင် Jet Fighter ဖြင့် ၃ ကြိမ် လာရောက်တိုက်ခိုက်ပါခဲ့သောကြောင့် တော်လှန်ရေး ရဲဘော်များ ပြန်လည် ဆုတ်ခွာခဲ့ရကြောင်း သိရှိရသည်။
အဆိုပါ တိုက်ပွဲအတွင်း အကြမ်းဖက် စစ်တပ်ဘက်မှ ၁၀ ဦးထက်မနည်း သေဆုံးပြီး အများအပြား ထိခိုက်ဒဏ်ရာရရှိခဲ့ကြောင်း၊ တော်လှန်ရေး ရဲဘော် ၂ ဦး မစိုးရိမ်ရ ဒဏ်ရာရရှိကာ ရဲဘော် ၁ ဦး ပြင်းထန် ဒဏ်ရာများဖြင့် မြင့်မြတ်စွာ အသက်ပေး ကျဆုံးခဲ့ကြောင်း သိရသည်။
“ကျနော်တို့ တိုက်ပွဲအပြီး ရတဲ့ သတင်းအချက်နဲ့ နယ်မြေရှင်းလင်းရေး အခြေအနေအရဆိုရင် စစ်ခွေး ၁၀ ကောင် အထက် အကျအဆုံးရှိပါတယ်။ ကျန်တာတော့ ထိခိုက်ဒဏ်ရာရှိမှာပေါ့။ ဒီတိုက်ပွဲက အတော်ပြင်းထန်ခဲ့ပါတယ်။ တိုက်ပွဲအချိန် ၂ နာရီ ကျော်ကျော်လောက်ကြာတယ်။ တစ်ဖက် ရန်သူကလည်း ဘုန်းကြီးကျောင်းဝင်းမှာ ဘုန်းကြီးကျောင်းက ၂ ထပ် အဆောက် အဦးပေါ့။ အဲအတွင်းထဲမှာ သူတို့ သေချာပြင်ဆင်ပြီးတော့ ကျနော်တို့ကို ခုခံတယ်ပေါ့လေ သူတို့မှာက လက်နက်ငယ်တွေ ၄၀ မမ တွေ လက်နက်ကြီးပစ်ကူတွေ လေကြောင်းပစ်ကူတွေပါ သုံးပြီး ခုခံတယ်။ ကျနော်တို့ ဘက်ကလည်း ရှိတဲ့ လက်နက် အကုန်သုံးပြီးတော့ ထိုးစစ်ဆင် တိုက်ခိုက်တယ်ပေါ့။ တိုက်ပွဲပြင်းထန်ပြီးတော့ လေကြောင်း ပစ်ကူပါ ယူတဲ့ အနေအထားမှာ ကျနော်တို့ အနေနဲ့ အတတ်နိုင်ဆုံး အပြီးသတ်ချေမှုန်းနိုင်ရေး ကြိုးခဲ့တာပေါ့။ လေကြောင်း ပစ်ကူကြောင့် ကျနော်တို့ ပြန်ဆုတ်ခဲ့ရတယ်။ ကျနော်တို့တွေ ဒီထက်ပိုပြီးတော့ တိုက်ခိုက်နိုင်ဖို့ကို ပြင်ဆင်ကြိုစားသွားဖို့ရှိတယ်။ အဲအတွက် လိုအပ်တဲ့ စစ်ရေးသတင်းအချက်အလက်တွေနဲ့ လိုအပ်တဲ့ အကူအညီတွေကိုလည်း ဒေသခံတွေကော ကျန်တဲ့ တာဝန်ရှိသူတွေကော ပါဝင်ပံ့ပိုးပေးကျပါလို့ ပြောချင်ပါတယ်” ဟု သရက်ခရိုင် အမှတ် ၄ တပ်ရင်း သတင်းနှင့် ပြန်ကြားရေးတာဝန်ခံ ကိုမြတ်က ပြောဆိုသည်။
အဆိုပါ တိုက်ခိုက်မှုကို ပြည်သူ့ကာကွယ်ရေးတပ်မတော် ၊ အမှတ် ၁ စစ်ဒေသ ၊ မကွေးတိုင်း ၊ သရက်ခရိုင် အမှတ် ၄ တပ်ရင်း ဒရုန်းတပ်စိတ်၊ ပြည်သူ့ကာကွယ်ရေးတပ်မတော် သရက်ခရိုင်အမှတ် – ၄ တပ်ရင်း တပ်ခွဲ ၁ ၊ တပ်ခွဲ ၂ နှင့် ကျောင်းသားလက်ရုံးတပ်တော် (SAF) ဒရုန်းတပ်ဖွဲ့တို့က ပူးပေါင်းလုပ်ဆောင်ခဲ့ကြောင်း သိရသည်။
ထို့ပြင် ဖေဖော်ဝါရီလ ၂၀ ရက်နေ့ အကြမ်းဖက် စစ်တပ် စစ်ကြောင်းက မင်းတုန်းမြို့ ၅ မိုင်ဂိတ် အနီးမှ ၁၂၀ မမ လက်နက်ကြီးအချက်ရေ ၃၀ ခန့် ပစ်ကူပေး၍ မြောက်ပြင်ကျေးရွာမှ မင်းတုန်းမြို့ဘက်သို့ ပြန်လည်ဆုတ်ခွာသွားကြောင်း သိရှိရသည်။
