ကော့သောင်း၊ ပုလုံးတုံတုံးရွာတွင် အုပ်ချုပ်ရေးမှူး ထွန်းထွန်း၊ နယ်ထိန်းရဲ၊ မီးသတ်တပ်ဖွဲ့ဝင်များအပါအဝင် စစ်ဆေးရေးအဖွဲ့ဝင် ၆ ဦးက ဧည့်စာရင်းစစ်မည်ဟုဆိုကာ အမျိုးသမီး ၂ ဦးကို ခေါ်ဆောင် မုဒိမ်းကျင့်၊ ရဲစခန်းက အမှုလက်မခံဘဲ အမျိုးသမီး ၂ ဦးကို ပြန်လည် ခြိမ်းခြောက်

ရန်ကုန်၊ ဖေဖော်ဝါရီ ၂၆

တနင်္သာရီတိုင်း၊ ကော့သောင်းမြို့နယ်၊ ပုလုံးတုံတုံးရွာမှ အိမ်ထောင်သည် အမျိုးသမီး ၂ ဦးကို အုပ်ချုပ်ရေးမှူး ထွန်းထွန်း ဦးဆောင်သော အဖွဲ့က ဧည့်စာရင်း ဝင်ရောက် စစ်ဆေးမည်ဟု အကြောင်းပြ၍ မုဒိမ်းပြုကျင့်ခဲ့ကြောင်း ပြုကျင့်ခံရသော အမျိုးသမီး ၂ ဦး၏ ဆွေမျိုးနှင့်မိတ်ဆွေများက ရန်ကုန်ခေတ်သစ်သတင်းဌာနထံသို့ ပြောဆိုသည်။

ပုလုံးတုံတုံးရွာ ပသျှူးပိုင်းဘက်ရှိ ၃ မိုင်တွင် အိမ်ခန်းငှားနေသော အိမ်ထောင်သည် အမျိုးသမီး ၂ ဦး၏ အမျိုးသားများ ငါးဖမ်းထွက်နေစဉ် အုပ်ချုပ်ရေးမှူး ထွန်းထွန်း ဦးဆောင်သော အဖွဲ့က ဧည့်စာရင်း ဝင်ရောက် စစ်ဆေးခဲ့ပြီး ဧည့်စာရင်း တိုင်ကြားထားခြင်းမရှိဟုဆိုကာ အမျိုးသမီး ၂ ဦးကို ဖမ်းဆီးခေါ်ဆောင်ခဲ့ကြောင်း သိရသည်။

ထိုသို့ ဖမ်းဆီးသွားပြီးနောက် အိမ်ထောင်သည် အမျိုးသမီး ၂ ဦးကို ပုလုံးတုံတုံးကမ်းခြေ ရွှေကျွန်းသာဘက်ကို ခေါ်ဆောင်သွားပြီး အုပ်ချုပ်ရေးမှူး ထွန်းထွန်း၊ အုပ်ချုပ်ရေးမှူး တပည့်ဖြစ်သူ မီးလောင်၊ မီးသတ်တပ်ဖွဲ့ဝင် စိုးနိုင်၊ နယ်ထိန်း ပြည့်ဖြိုးအောင်၊ ၃မိုင်စာရေး ဟင်သူဖြိုးနှင့် အမည်မသိသူ ၁ ဦးက တစ်လှည့်စီ မုဒိမ်းပြုကျင့်ခဲ့ကြောင်း၊ ထိုသို့ မုဒိမ်းပြုကျင့်ပြီးနောက် အမျိုး သမီး ၂ ဦးကို ၎င်းတို့ နေထိုင်သော အခန်းသို့ ပြန်လည် ပို့ဆောင်ပေးခဲ့ကြောင်း သိရသည်။

အဆိုပါ ဖြစ်စဉ်နှင့် ပတ်သက်ပြီး ကာယကံရှင်များက ကော့သောင်း ရဲစခန်းတွင် သွားရောက်အမှုဖွင့် တိုင်ကြားခဲ့ရာတွင် ရဲများက အုပ်ချုပ်ရေးမှူး ထွန်းထွန်းကို စခန်းသို့ ခေါ်ယူ စစ်ဆေးခဲ့ကြောင်း၊ သို့ရာတွင် ယင်းသို့ ပြုကျင့်မှုမှာ အမျိုးသမီးများက အခငွေကြေးယူ ပြည့်တန်ဆာလုပ်ဆောင်ခြင်းဖြစ်သည်ဟု ဖြေကြား၍ တိုင်ကြားသူ အမျိုးသမီးများကို ပြန်လည် အရေးယူမည်ဟု ခြိမ်းခြောက်လာကြောင်း သိရှိရသည်။

ထိုသို့ တိုင်ကြားခံရခြင်းကြောင့် အုပ်ချုပ်ရေးမှူး ထွန်းထွန်းက ကျေးရွာအတွင်းရှိ ပြည်သူများကို အစည်းအဝေးခေါ်၍ ခြိမ်းခြောက်ခဲ့ကြောင်း ၊ မုဒိမ်းပြုကျင့်ခံရသော အမျိုးသမီး ၂ ဦးကိုလည်း အုပ်ချုပ်ရေးမှူး ထွန်းထွန်းက ခြိမ်းခြောက်ခဲ့သဖြင့် ရဲများက လာရောက် စစ်ဆေးစဉ်တွင် အုပ်ချုပ်ရေးမှူး ထွန်းထွန်းပြောဆိုခိုင်းသည့်အတိုင်း အခကြေးငွေ ယူဆောင်ခဲ့ကြောင်း ထွက်ဆိုခဲ့ရကြောင်း သိရှိရသည်။

“အုပ်ချုပ်ရေးမှူး ထွန်းထွန်း ဦးဆောင်တဲ့ အဖွဲ့က ရွာထဲမှာဧည့်စာရင်းလိုက်စစ်ပြီး ပုလုံးတုံတုံးရွာ ပသျှူးပိုင်းဘက်ရှိတဲ့ ၃မိုင်က အိမ်ခန်းငှားနေတဲ့ လင်မယား ၂ တွဲအခန်းကိုပါ သွားစစ်တာ သူတို့အမျိုးသားတွေက ငါးဖမ်းလှေ ထွက်နေတဲ့ အချိန်ဆိုတော့ အိမ်မှာမရှိဘူး။ အဲတာကို အခွင့်အရေးယူပြီး ဧည့်စာရင်း မတိုင်ဘူးဆိုတဲ့ အကြောင်းပြချက်နဲ့ ဖမ်းဆီးခေါ်ဆောင်သွားပြီး မုဒိမ်းပြုကျင့်ကျတာ မုဒိမ်းမှုဖြစ်ပြီးတော့ အမှုကို ငွေနဲ့ ဖုံးပြီး ပိတ်လိုက်တာ ကာယကံရှင် အမျိုးသမီး ၂ ဦးလည်း အုပ်ချုပ်ရေးမှူး ထွန်းထွန်းက ခြိမ်းခြောက်ထားလို့ ကြောက်ပြီး မပြောရဲကျဘူး” ဟု ဒေသပြည်သူတစ်ဦးက ပြောဆိုသည်။

ရန်ကုန်ခေတ်သစ်သတင်းဌာနက ယင်းကိစ္စအတွက် ကျေးရွာအုပ်ချုပ်ရေးမှူး ထွန်းထွန်းကို ဆက်သွယ်ရန် ကြိုးပမ်းသော်လည်း ဖုန်းအဆက်အသွယ်မရရှိပေ။

#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup #rejectmilitarycoupmyanmar