စလင်းမြို့နယ်တွင် စစ်ဆင်ရေးများ ပူးတွဲလုပ်ဆောင်ရန် တော်လှန်ရေး လက်နက်ကိုင် တပ်ဖွဲ့ ၆ ခု ပေါင်းစည်းလိုက်ပြီး စစ်တပ်ကို စုပေါင်း ထိုးစစ်ဆင်တိုက်ခိုက်မည်
မကွေးတိုင်း၊ စလင်းမြို့နယ်အတွင်း စစ်ဆင်ရေးများ ပိုမို လုပ်ဆောင်နိုင်ရန် လက်နက်ကိုင် တော်လှန်ရေး အဖွဲ့ ၆ ခုပူးပေါင်းလိုက်ပြီး စစ်တပ်ကို ပူးပေါင်းအားဖြင့် ထိုးစစ်ဆင် တိုက်ခိုက်မည်ဖြစ်ကြောင်း ဒေါင်းစစ်အောင် (LPDF) မှ တာဝန်ရှိသူ တစ်ဦးက ရန်ကုန်ခေတ်သစ် သတင်းဌာနထံသို့ ပြောဆိုသည်။
ဖေဖော်ဝါရီလ ၂၈ ရက်နေ့တွင် ဘုံသဘောတူညီချက် ၁၃ ချက်ကို စလင်းမြို့နယ် အခြေစိုက် ရင်း ၁ ၊ ရင်း ၅ ၊ ဗမာ့တပ်တော်၊ ဒေါင်းစစ်အောင်၊ ဒေါင်းညီနောင် မြို့ပြပြောက်ကျား နှင့် SALIN LOCAL PDF တို့မှ တာဝန်ရှိသူများက လက်မှတ်ရေးထိုး၍ ပူးပေါင်းဖွဲ့စည်းခဲ့ခြင်းဖြစ်ကြောင်း သိရသည်။
“ဘုံသဘောတူညီချက်တွေနဲ့အတူ ပြည်သူကိုရှေးရှုသွားမယ်။ တစ်ဖွဲ့နဲ့တစ်ဖွဲ့အပြန်အလှန်ထိန်းကျောင်းသွားမယ်။ စစ်ဆင်ရေးကို စုပေါင်းအားနဲ့ ပိုပြီးအားကောင်းအောင် ပါ်ပေါင်း လုပ်ဆောင်သွားမယ်” ဟု ဒေါင်းစစ်အောင် (LPDF) မှ တာဝန်ရှိသူ တစ်ဦးက ပြောဆိုသည်။
ဘုံသဘောတူညီချက်များတွင် အဖွဲ့ဝင် တပ်ရင်းတပ်ဖွဲ့များမှ ရဲဘော်များက ပြည်သူများကို ခြိမ်းခြောက်ခြင်း၊ မောက်မာရိုင်းစိုင်းစွာ ပြောဆိုခြင်းများ လုပ်ဆောင်ခဲ့ပါက ထိရောက်စွာ အရေးယူခြင်းလုပ်ဆောင်မည့်အချက်အပါအဝင် တပ်ရင်းတပ်ဖွဲ့အချင်းချင်း ခိုက်ရန်ဖြစ်ပွားခြင်း၊ ရပ်ရွာထဲ အရက်သောက်၍ သေနတ်ဖောက်ခြင်းကို ထိရောက်စွာ အရေးယူအပြစ်ပေးမည်ဖြစ်ကြောင်း၊ မဟာမိတ်အဖွဲ့ဝင်များအချင်းချင်း နားလည်မှု လွဲမှားမှုရှိပါက သေနတ်နှင့် ဖြေရှင်းခြင်း လုံးဝ မပြုလုပ်ရန်လည်း ဘုံသဘောတူညီချက်တွင် ပါဝင်သည်။
အဆိုပါ အချက်များအပြင် တော်လှန်ရေးအင်အားစုပြိုကွဲစေသော နှောင့်နှေးစေသော အပြုအမူ၊ အပြောအဆို တစ်ဖွဲ့နှင့် တစ်ဖွဲ့ကြား မပြုလုပ်ရန်၊ အကြမ်းဖက်စစ်တပ်ကို တိုက်ခိုက်ရာတွင် တပ်ပေါင်းစုအသွင်ဖြင့် တိုက်ခိုက်ချေမှုန်းရန်၊ တပ်ပေါင်းစုအနေနှင့် ပူးပေါင်းဆေင်ရွက်ရာတွင် အကျိုးအမြတ်အဆုံးအရှုံးများကို လက်ခံ၍ သာတူညီမျှခွဲဝေအသုံးပြုကာ သတင်းထုတ်ပြန်ချိန်တွင် တပ်ပေါင်းစုတွင် ပါဝင်သည့် တပ်ဖွဲ့များနှင့် ညှိနှိုင်း ထုတ်ပြန်ရန်၊ ရဲဘော်အချင်းချင်းရိုသေလေးစာ၍ ပြဿနာ ဖြစ်ပေါ်ပါက ဘက်လိုက်ခြင်းမပြုဘဲ ကော်မတီတစ်ခု ဖွဲ့စည်းရန်စသည်တို့ ဘုံသဘောတူညီချက်တွင် ပါရှိသည်။
ထို့ပြင် တိုက်ခိုက်ရေးအဖွဲ့များအနေနှင့် တာဝန်ယူထားသည့် နယ်မြေမှ အပ တခြားအဖွဲ့အစည်း တာဝန်ယူထားသည့် နယ်မြေတွင် စစ်ရေးမစ်ရှင် ဖော်ဆောင်ခြင်း သို့မဟုတ် လုပ်ဆောင်ရန် ကိစ္စများ ရှိပါက လက်ရှိတာဝန်ယူထားသည့် နယ်မြေကို အကြောင်းကြားရန်၊ အဖွဲ့အချင်းချင်း ရဲဘော်များ နားလည်မှုလွဲသည့် ကိစ္စများ ဖြစ်ပေါ်ပါက ခေါက်ရန် မဖြစ်ပွားဘဲ တာဝန်ရှိသူများက အချင်းချင်း မျက်နှာစုံညီဖြေရှင်းပေးရန်၊ မြို့နယ်အခြေစိုက် တိုက်ခိုက်ရေးအဖွဲ့များသည်လည်း နယ်မြေအပိုင်ဟု နယ်မြေစွဲ စိတ်ဓာတ်မရှိဘဲ လက်ရှိ နယ်မြေတာဝန်ယူထားသည့် အဖွဲ့သာ နယ်မြေ တာဝန်ခံဖြစ်ရန် ဆိုသော အချက်များ ထုတ်ပြန်ချက်တွင် ပါဝင်သည်။
အလားတူ စလင်းမြို့နယ်အခြေစိုက် လှုပ်ရှားမည့် အဖွဲ့များ ရှိလာပါကလည်း နယ်မြေခံ အဖွဲ့များ ဘုံသဘောတူညီချက်ဖြင့် ညှိနှိုင်းဆွေးနွေးလက်ခံရန်၊ ယာယီတည်းခိုနယ်မြေသစ်သွဦးရန် မဟာမိတ်အဖွဲ့များ လက်ခံထားရှိပါက ဖြစ်လာသမျှ ကိစ္စအဝဝကို လက်ခံထားသည့် အဖွဲ့က တာဝန်ယူဖြေရှင်းရန်၊ စက်ကူခေါ်ခြင်း နီးစပ်ရာ မဟာမိတ်များ ပူးပေါင်း၍ စစ်ရေးမစ်ရှင်ဖော်ဆောင်ခြင်းများ ရှိလာပါက အဖွဲ့တာဝန်ခံကို တိုက်ရိုက် ဆက်သွယ်ပြောကြားရန် စသည့် အချက်များကို ဘုံသဘောတူထားကြောင်း ထုတ်ပြန်ချက်တွင် ဖော်ပြထားသည်။
