မိုးဗြဲတွင် စစ်တပ်က ပစ်ခတ်သော လက်နက်ကြီး ထိမှန်ပြီး အသက် ၁၆ နှစ်အရွယ် မိန်းကလေး ၁ ဦးသေဆုံးကာ ၄ ဦးဒဏ်ရာရ၊ ရေဦးတွင်လည်း စစ်တပ်က လေယာဉ်ဖြင့် ဗုံးကျဲ တိုက်ခိုက်
ရှမ်းပြည်နယ်နှင့် ကရင်နီ ပြည်နယ်အစပ် မိုးမြဲမြို့ကို အကြမ်းဖက် စစ်တပ်က လက်နက်ကြီးဖြင့် ပစ်ခတ်ခြင်းသောကြောင့် အသက် ၁၆ နှစ်အရွယ် အမျိုးသမီးငယ် ၁ ဦးသေဆုံးကာ ၄ ဦးဒဏ်ရာရရှိခဲ့ကြောင်း Mobye Rescue Team ထံမှ သိရသည်။
မတ်လ ၁ ရက်နေ့တွင် မိုးဗြဲမြို့ အတွင်းကို အကြမ်းဖက် စစ်တပ်က လက်နက်ကြီးဖြင့် ပစ်ခတ်ခြင်းကြောင့် တောင်ယာတွင် အလုပ်လုပ်ကိုင်နေသည့် ပြည်သူ ၅ ဦး လက်နက်ကြီးကျည် ထိမှန်ခဲ့ခြင်းဖြစ်ကြောင်း သိရသည်။
အကြမ်းဖက် စစ်တပ် ပစ်ခတ်သော လက်နက်ကြီး ထိမှန်၍ အမျိုးသမီး ၄ ဦးနှင့် အမျိုးသား ၁ ဦး ထိခိုက်ဒဏ်ရာရရှိခဲ့ကာ ဒဏ်ရာရရှိသူများထဲမှ အသက် ၁၆ နှစ်အရွယ် အမျိုးသမီးငယ် ၁ ဦးသေဆုံးခဲ့ကြောင်း၊ ကျန်ရှိနေသော ဒဏ်ရာရ ပြည်သူ ၄ ဦးကို Mobye Rescue Team မှ ဆရာ၊ ဆရာမ များက အချိန်မှီ ဆေးကုသမှု ပေးနိုင်ခဲ့ကြောင်း သိရှိရသည်။
ထို့ပြင် စစ်ကိုင်းတိုင်း၊ ရေဦးမြို့နယ်ရှိ ကျေးရွာများကိုလည်း အကြမ်းဖက် စစ်တပ်က လေယာဉ်ဖြင့် ဗုံးကျဲ တိုက်ခိုက်ခဲ့ကြောင်း ရေဦးအခြေပြု People’s Defense Comrade ပြန်ကြားရေးတာဝန်ခံ ထူးခန့်ဇော်(အမေ့သား) က ရန်ကုန်ခေတ်သစ်သတင်းဌာနထံသို့ ပြောဆိုသည်။
ဖေဖော်ဝါရီလ ၂၈ ရက်နေ့ ည ၁၁ နာရီခန့်တွင် တံတားဦးမှ တက်လာသော အကြမ်းဖက် စစ်တပ်၏ ဂျက်ဖိုက်တာ ၁ စီးက ရေဦးမြို့နယ် အနောက်ခြမ်း တောင်ပြင်ငယ်ရွာနှင့် အောင်သုခရွာ အကြားနှင့် တောင်ပြင်ငယ်ရွာအနောက်ဘက် တောင်ပေါ်ဘုန်းကြီးကျောင်းအနီးကို တိုက်ပွဲဖြစ်ပွားခြင်းမရှိဘဲ ဗုံးကျဲ တိုက်ခိုက်ခဲ့ကြောင်း သိရသည်။
အကြမ်းဖက် စစ်တပ်၏ လေကြောင်းတိုက်ခိုက်မှု အတွင်း ပြည်သူများ ထိခိုက်မရှိဘဲ ကွင်းပြင်များထဲကိုသာ ကျရောက်ပေါက်ကွဲခဲ့ခြင်းကြောင့် နေအိမ်၊ အဆောက်အဦးများ ပျက်စီးမှုမရှိကြောင်း သိရှိရသည်။
“ရေဦးနယ် အနောက်ခြမ်း တောင်ပြင်ငယ်ရွာနဲ့ အောင်သုခရွာကြားကို တစ်လုံးကျကွဲတယ်လို့ သိရတယ်။ တောင်ပြင်ငယ်ရွာအနောက်ဘက် တောင်ပေါ်ဘုန်းကြီးကျောင်းအနီး တစ်လုံးကျကွဲတယ်။ ပြည်သူထိခိုက်မှု ပျက်စီးမှုမရှိဘူးလို့ အတည်ပြုနိုင်ပြီ ကိုယ့်ဘက်က တော်လှန်ရေးအဖွဲ့တွေအနေနဲ့ရော ပြည်သူတွေရော လေကြောင်းအသိ လေကြောင်းသတိရှိကြဖို့နဲ့ လူစုလူဝေးပွဲမှန်သမျှ တအားစည်ကားနိုင်စေမယ့်ပွဲမျိုးတွေ တတ်နိုင်သမျှ မပြုလုပ်ကြဖို့ သတိပေးချင်တယ်” ဟု ရေဦးအခြေပြု People’s Defense Comrade ပြန်ကြားရေးတာဝန်ခံ ထူးခန့်ဇော်(အမေ့သား) က ပြောဆိုသည်။
