ရန်ကုန်၊ မတ် ၇
ရုရှားပြန် မင်းအောင်လှိုင်ကို ကြိုဆိုရန် Non-CDM ဝန်ထမ်းများ၊ အနုပညာရှင်များ၊ စစ်တပ် လက်အောက်ခံ အဖွဲ့များကို စစ်ကောင်စီက နေပြည်တော်သို့ စတင်ဆင့်ခေါ်နေပြီဖြစ်ကြောင်း နေပြည်တော်တပ်သတင်းရင်းမြစ်က ပြောဆိုသည်။
မတ်လ ၉ ရက်နေ့ နေပြည်တော်သို့ ပြန်လည် ရောက်ရှိလာမည့် အကြမ်းဖက် မင်းအောင်လှိုင်ကို ကြိုဆိုရန် မြန် မာ နိုင်ငံရုပ်ရှင်အစည်းအရုံးမှ အနုပညာရှင်များ၊ အဆိုတော်များ ၊ ဟာသသရုပ်ဆောင်များ၊ YMBA အပါအဝင် စစ်ကောင်စီလက်အောက်ခံ အဖွဲ့အစည်းများ၊ နိုင်ငံတစ်ဝန်းမှ Non-CDM ဝန်ထမ်းများ၊ အခြေခံပညာ အထက်တန်းကျောင်းများမှ ကျောင်းသားကျောင်းသူများ အပါအဝင် စစ်တပ်နှင့်ပတ်သက်နေသော အဖွဲ့အစည်းများကို နေပြည်တော်သို့ လာရောက်ရန် ဆင့်ခေါ်နေခြင်းဖြစ်ကြောင်း သိရှိရသည်။
အကြမ်းဖက် မင်းအောင်လှိုင်ကို ကြိုဆိုရာတွင်ယခင်ထက် ပိုမို၍ ကြီးကြီးကျယ်ကျယ် ခမ်းခမ်းနားနား စည်စည် ကားကား ကြိုဆိုရန် ပြင်ဆင်ခိုင်းနေပြီး အိုးစည်ဗုံမောင်းများဖြင့် နေပြည်တော်လေဆိပ်မှ လမ်းတစ်လျှောက် ကြိုဆိုကြရန် လုပ်ဆောင်နေခြင်းဖြစ်သည်ဟု သိရှိရသည်။
“ဒီတစ်ခေါက် ရုရှားခရီးစဉ်က အားရကျေနပ်ဖွယ်ဖြစ်တဲ့အတွက် ခါတိုင်းခရီးစဉ်တွေနဲ့မတူ ကြီးကြီးကျယ်ကျယ် ခမ်းခမ်းနားနားကြိုဖို့ လုပ်တာ။ တီး၀ိုင်းတွေ အိုးစည် ဒိုးပတ်တွေလည်းပါမယ်။ ဗီနိုင်းတွေလည်း စရိုက်နေကြပြီ။ မနက်ဖြန် နေပြည်တော်ကို ကြိုရောက်ဖို့ တချို့ အဖွဲ့တွေ ခေါ်ထားပြီ” ဟု နေပြည်တော် တပ်သတင်းရင်းမြစ်က ဆိုသည်။
မင်းအောင်လှိုင်၏ ယခင်နိုင်ငံခြားပြန် ခရီးစဉ်များတွင် အကယ်ဒမီ စင်ရော်မောင်မောင်၊မေသန်းနု၊ မေသဉ္ဇာဦး၊ ရန်အောင်၊ ခန့်စည်သူ၊ စိုးမြတ်သူဇာ စသည့် စစ်တပ်ထောက်ခံသော အနုပညာရှင်များ၊ ဒိန်းဒေါင် ဦးဆောင်သော စစ်တပ်ဘက်တော်သား ဟာသလူရွှင် တော်များ၊ အဆိုတော်ယုန်လေး အပါအဝင် စစ်တပ်လော်ဘီများက တက်တက်ကြွကြွ ပါဝင်ကြိုဆိုခဲ့ကြပြီး ယခု ရုရှားပြန်ခရီးစဉ်တွင်လည်း ၎င်းတို့ ဆက်လက်ပါဝင်ဦးမည်ဖြစ်ကြောင်း သိရှိရသည်။
မတ်လ ၉ ရက်နေ့ မင်းအောင်လှိုင်၏ ရုရှားပြန်ခရီးစဉ် ကြိုဆိုရေးအတွက် ကုန်ကျစရိတ်နှင့် နေ့တွက်ခများကို ဝန်ကြီးဌာနဆိုင်ရာ နှင့် စစ်တပ်နှင့်မိတ်ဖက် စီးပွားရေးလုပ်ငန်းများက ကျခံကြမည်ဖြစ်ကြောင်း သိရှိရသည်။
ဓာတ်ပုံ – ၂၀၂၄ ခုနှစ် နိုဝင်ဘာလ တရုတ်မှ အပြန်ခရီးတွင် မင်းအောင်လှိုင်ကို ကြိုဆိုကြသည့် စစ်တပ်လော်ဘီများ။
#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup #rejectmilitarycoupmyanmar
