ဘောလခဲမြို့သိမ်းတိုက်ပွဲတွင် စစ်တပ်ဘက်မှ ဗိုလ်မှူး မျိုးမင်းသူ အပါအဝင် စစ်သားအများအပြားသေဆုံးပြီး စစ်သုံ့ပန်းနှင့် လက်နက်ခဲယမ်းများ ဖမ်းဆီး သိမ်းပိုက်ရရှိ
ကရင်နီပြည်၊ ဘောလခဲမြို့ကိုအပြီးသတ်သိမ်းပိုက်နိုင်ရေး ထိုးစစ်ဆင်တိုက်ခိုက်နေပြီး စစ်တပ်မှ ဗိုလ်မှူး မျိုးမင်းသူအပါအဝင် စစ်သားအများပြားသေဆုံးကာ စစ်သုံ့ပန်း၊ လက်နက်ခဲယမ်းများလည်း သိမ်းပိုက်ရရှိထားကြောင်း KA စစ်ရေးချုပ် ဗိုလ်မှူးကြီး ဘုန်းနိုင်က ရန်ကုန်ခေတ်သစ်သတင်းဌာနထံ သို့ အတည်ပြုပြောကြားသည်။
မတ်လ ၁၉ ရက်နေ့မှစ၍ ဘောခဲမြို့ရှိ စစ်ကောင်စီ၏ လက်ကျန်တပ်ရင်းစခန်း ၃ ခုကို အပြီးသတ်သိမ်းပိုက်နိုင်ရေး အတွက် ကရင်နီတော်လှန်ရေးပူးပေါင်းတပ်ဖွဲ့များက စစ်ကြောင်း ၃ ကြောင်းဖြင့် ထိုးစစ်ဆင်တိုက် ခိုက်လျက်ရှိရာ နှစ်ဖက်တိုက်ပွဲပြင်းထန်နေကြောင်း၊ အကြမ်းဖက်စစ်တပ်မှ ဗိုလ်မှူး မျိုးမင်းသူ အပါအဝင် စစ်သားအများအပြားသေဆုံးကာ စစ်သုံ့ပန်းများ၊ လက်နက်ခဲယမ်းများ သိမ်းပိုက်ရရှိထားကြောင်း သိရသည်။
“စတာကတော့ တစ်ပတ်လောက်ရှိတယ်။ စာရင်းဇယားတော့ မပို့လားသေးဘူး။ ဒါပေမယ့် သေဆုံး ၊ ဒဏ်ရာရထားတာ၊ လက်နက်ခဲယမ်းတစ်ချို့လည်း သိမ်းဆည်းရရှိထားတယ်၊ အတိအကျတော့ မရ သေးဘူး။ ဆက်သွယ်ရေးအခက်အခဲဖြစ်လို့၊ သူသူငါငါချနေကြတော့ ပို့ဖို့ကလည်း အချိန်မရသေး ဘူး။ တိုက်ပွဲကဆက်ဖြစ်နေတယ်၊ရအောင်လုပ်မယ်လေ။အပြီးသိမ်းလိုက်မယ်၊ မဟုတ်ရင်ရှုပ်တယ်၊ ကျနော်တို့က အကိုင်းလိုက်ဖြတ်တော့ စစ်ရေးကြာတယ်လေ၊ အခုက ပင်ရင်းဖြတ်လိုက်မလို့။” ဟု KA စစ်ရေးချုပ် ဗိုလ်မှူးကြီး ဘုန်းနိုင်က ရန်ကုန်ခေတ်သစ်သတင်းဌာနထံသို့ ပြောကြားသည်။
ဘောလခဲဗျူဟာတွင် စစ်ကောင်စီတပ်က တပ်ရင်း ၃ ရင်းအထိုင်ချထားပြီး ရဟတ်ယာဉ်ဖြင့် စစ်အင် အားများလည်း ထပ်မံဖြည့်တင်းထားကြောင်း၊ ထို့ကြောင့် အပြီးသတ် သိမ်းပိုက်နိုင်ရေးအတွက် ကရင်နီတော်လှန်ရေးတပ်ပေါင်းစုမှ စစ်ကြောင်း ၃ ကြောင်းဖြင့် ထိုးစစ်ဆင်တိုက်ခိုက်နေခြင်းဖြစ် ကြောင်း သိရသည်။
“ကျနော်တို့ဘက်ကလည်း ထိခိုက်ဒဏ်ရာရတာရှိတယ်။ တချို့ကျတာလည်းရှိမယ်၊ ဒါပေမယ့် အ သေး စိတ်ကတော့ မရသေးဘူး။ ကျနော်တို့က စစ်ကြောင်း ၃ ကြောင်းနဲ့ တက်နေတယ်။ ဝိုင်းပြီးတော့ ဖြတ် ဖို့အလုပ်လုပ်နေပါတယ်။ အဲဒါကတော့ ဘယ်အချိန်ပြီးမလဲ မသိဘူး။ ရှားတော ကျတော့ တစ် လ နီးပါးလောက်ကြမှ ပြီးတယ်လေ။ ရှားတောဗျူဟာက၊ အခုဘောလခဲဗျူဟာကတော့ တပ်ရင်း ၃ ရင်း ထိုင်ထားတာကိုး။ တပ်ရင်း ၃ ရင်းဆိုတော့ လူများမလား၊ လူတော့သိပ်မရှိတော့ဘူးထင်တယ်။ ဒါပေမယ့် ဟတ်စကီးနဲ့လာချတာတော့ရှိတယ်ပေါ့၊ ဒါပေမယ့် ဒီနောက်ပိုင်းတော့ မလာနိုင်တော့ ဘူးထင်တယ်။” ဟု KA စစ်ရေးချုပ် ဗိုလ်မှူးကြီးဘုန်းနိုင်က ပြောဆိုသည်။
စစ်ကောင်စီတပ် ဗျူဟာစခန်းမှ ပြည်သူလူထုနေထိုင်ရာရပ်ကွက်များအတွင်း လက်နက်ကြီးများဖြင့် ရမ်းသမ်းခတ်မှုရှိသောကြောင့် ဘောခဲမြို့နေ ပြည်သူများမှာ ဘေးလွတ်ရာထွက်ပြေးတိမ်းရှောင်နေ ကြရကြောင်း သိရသည်။
ဓာတ်ပုံ – KNDF ဒုစစ်ဦးစီးချုပ် မာဝီက လူမှုကွန်ရက်တွင် တင်ပြထားသော ဘောလခဲဗျူဟာတိုက်ပွဲမှ ဖမ်းမိသော စစ်သုံ့ပန်းများနှင့် သိမ်း ဆည်းရရှိသောလက်နက်ခဲယမ်းများ။
