ထားဝယ်နှင့် ပခုက္ကူ မြို့နယ်ရှိ စစ်တပ် တပ်စွဲထားသော နေရာများကို တိုက်ခိုက်မှု စစ်ကောင်စီ တပ်သား ၂ ဦးသေဆုံး
တနင်္သာရီတိုင်း၊ ထားဝယ်မြို့နယ်ရှိ အကြမ်းဖက် စစ်တပ် တပ်စွဲထားသော နေရာကို စနိုက်ပါဖြင့် ပစ်ခတ် တိုက်ခဲ့ရာ စစ်ကောင်စီ တပ်သား ၁ ဦး သေဆုံးခဲ့ကြောင်း ဥဩစစ်ကြောင်း ထား၀ယ်မြို့နယ် မှ ပြန်ကြားရေးတာဝန်ခံက ရန်ကုန်ခေတ်သစ်သတင်းဌာနထံသို့ပြောဆိုသည်။
မတ်လ ၂၆ ရက်နေ့တွင် ထားဝယ်မြို့နယ်၊ ရွှေဂူတံတားဂိတ်အနီး ရွှေဂူတောင်ဘုရားပေါ်တွင် တပ်စွဲထားသော အကြမ်းဖက် စစ်ကောင်စီ တပ်စခန်းကို ထားဝယ်မြို့နယ် ပြည်သူ့ကာကွယ်ရေးအဖွဲ့ (ဥသြစစ်ကြောင်း) မှ တော်လှန်ရေး ရဲဘော်များက စနိုက်ပါဖြင့် ပစ်ခတ် တိုက်ခိုက်ခဲ့ရာ စစ်သား ၁ ဦးသေဆုံးခဲ့ပြီး တော်လှန်ရေး ရဲဘော်များ အထိအခိုက်မရှိ ပြန်လည် ဆုတ်ခွာနိုင်ခဲ့ကြောင်း သိရသည်။
“အဲစခန်းမှာ စစ်ခွေး အင်အားကတော့ ၁၀ ကျော် ၂၀ အကြား ဝန်းကျင်လောက်တော့ရှိမယ်။ စနိုက်ပါနဲ့ ပစ်တာဆိုတော့ ကျန်တာတွေ ထိခိုက်တာတော့မရှိဘူး။ စစ်ခွေးတစ်ကောင်ပဲ ကျတာပါ။ စစ်ခွေးတွေဘက်ကတော့ ချက်ချင်း တုံ့ပြန်တာမျိုးတော့မရှိဘူး။ အဲဒီ နေ့ ညဘက်ရောက်မှ စက်ကလေးနဲ့ လှမ်းပစ်တာပဲရှိတယ်” ဟု ဥဩစစ်ကြောင်း ထား၀ယ်မြို့နယ် မှ ပြန်ကြားရေးတာဝန်ခံက ပြောဆိုသည်။
ထို့ပြင် မကွေးတိုင်း၊ ပခုက္ကူမြို့နယ်အတွင်းရှိ ပျူစောထီး ကျေးရွာ ၄ ရွာကို ရော့ကတ်များဖြင့် ပစ်ခတ် တိုက်ခိုက်ခဲ့ရာ ပျုစောထီး ၁ ဦး သေဆုံးခဲ့ကြောင်း COBRA ONE တပ်ဖွဲ့မှ တာဝန်ရှိသူတစ်ဦးက ရန်ကုန်ခေတ်သစ်သတင်းဌာနထံသို့ပြောဆိုသည်။
မတ်လ ၂၈ ရက်မှ ၃၀ ရက်နေ့ထိ အခုက္ကူမြို့နယ် အတွင်းရှိ ရှင်မကန် ပျူစောထီးရွာ ၊ ညောင်ဂျစ်ပင် ပျူစောထီးရွာ ၊ အနောက်မကျီးကန် ပျူစောထီးရွာနှင့် အောင်သာ ပျူစောထီးရွာတို့ကို တော်လှန်ရေး ရဲဘော်များက ရော့ကတ် ၁၂ လုံးဖြင့် ပစ်ခတ် တိုက်ခိုက်ခဲ့ခြင်းဖြစ်ကြောင်း သိရသည်။
ယင်း တိုက်ခိုက်မှု အတွင်း ပျူစောထီး ၁ ဦး သေဆုံးကာ မကျီးကန် ပျူစောထီးရွာမှ စစ်ကောင်စီ တပ်သားများသည် အောင်သာရွာဘက်ကို ထွက်ပြေးသွားပြီး သိရှိရသည်။
“မကျီးကန် ပျူစောထီးရွာက ပျူစောထီး ၁ ဦး သေဆုံးတယ်လို့သိရပါတယ်။ အခုလက်ရှိတော့ ညောင်ဂျစ်ပင်ရယ် ရှင်မကန်ရယ်ဘဲရွာတွေမှာ အင်အားဖြည့်ထားပါတယ်။ အရင်ကတော့ ပျူစောထီး အများဆုံးရှိတာပါ။ ခွေးအစစ်က သိပ်မရှိပါဘူး။ ကျန်တဲ့ရွာကတော့ အသေ အပျောက်မကြာရသေးပါဘူး။ အခုလက်ရှိ ဖြည့်ထားတာဆိုတော့ ၈၀ ပတ်ချာလည် လောက်မှာတော့ရှိနိုင်ပါတယ်” ဟု COBRA ONE မှ တာဝန်ရှိသူတစ်ဦးက ပြောဆိုသည်။
အဆိုပါ တိုက်ခိုက်မှုကို ဧရာဒေါင်းတပ်ဖွဲ့နှင့် COBRA ONE Pakokku တပ်ဖွဲ့တို့က ပူးပေါင်းလုပ်ဆောင်ခဲ့ခြင်းဖြစ်ကြောင်း သိရသည်။
