ရန်ကုန်၊ ဧပြီ ၄
ရန်ကုန်တိုင်း၊ မကွေးတိုင်းနှင့် ဧရာဝတီတိုင်းတို့တွင် ကျေးရွာ/ရပ်ကွက်အုပ်ချုပ်ရေးမှူးများနှင့် ကြံ့ဖွတ်ပါတီဝင်များက ပေါ်တာဆွဲ ဖမ်းဆီးခြင်းနှင့် စစ်မှုထမ်း သင်တန်းတက်ရန် အတင်း အဓမ္မ မဲနှိုက် ခိုင်းခြင်းများ လုပ်ဆောင်နေကြောင်း ဒေသပြည်သူများက ရန်ကုန်ခေတ်သစ်သတင်းဌာန ထံသို့ ပြောဆိုသည်။
ရန်ကုန်တိုင်း၊ မင်္ဂလာတောင်ညွန့်မြို့နယ်၊ ကူးတို့ဆိပ်ရပ်ကွက်တွင် ကြံ့ဖွတ်ပါတီဝင် ခိုင်ခိုင်စန်း ဦးဆောင် ကြံ့ဖွတ်များက ရပ်ကွက်အတွင်းရှိ ပြည်သူများထံမှ စစ်မှုထမ်းကြေးဟုဆိုကာ လစဉ် ငွေကျပ် ၂ သောင်းကောက်ခံနေပြီး ငွေကြေး မပေးသူများကိုလည်း စစ်မှုထမ်းသင်တန်းသို့ ပို့ဆောင်မည်ဟု ခြိမ်းခြောက်နေကြောင်း သိရှိရသည်။
အလားတူ ဒဂုံမြို့သစ်အရှေ့ပိုင်းမြို့နယ် အမှတ် ၈ ရပ်ကွက် အုပ်ချုပ်ရေးမှူး လှသိန်းသည် စစ်မှုထမ်းစာရင်းပါသော လူငယ်များကို အတင်း အဓမ္မ ဖိအားပေး၍ မဲနှိုက်ခိုင်းသောကြောင့် လူငယ်များ ထွက်ပြေး တိမ်ရှောင်နေရကြောင်း၊ အုပ်ချုပ်ရေးမှူး လှသိန်းသည် လူမိုက်အဖွဲ့များကိုလည်း ရပ်ကွက်အတွင်း ခေါ်ဆောင်ထားပြီး လူငယ်များကို ဖမ်းဆီးမှုနှင့် ခြိမ်းခြောက်မှုများ လုပ်ဆောင်နေကြောင်း သိရှိရသည်။
ထို့ပြင် မရမ်းကုန်းမြို့နယ် ၃ ရပ်ကွက်တွင်လည်း အုပ်ချုပ်ရေးမှူးအဖွဲ့က လူငယ်များကို စစ်မှုထမ်းရန် စာရွက်များ လိုက်လံ ပေးဆောင်နေပြီး လူငယ်များကို စစ်မှုထမ်းခိုင်းရန်အတွက် မဲနှိုက်ရွေးချယ်မှုများ လုပ်ဆောင်နေကြောင်း သိရှိရသည်။
ဧရာဝတီတိုင်း၊ အင်္ဂပူမြို့နယ်၊ တံတားဦးကျေးရွာတွင် ဆယ်အိမ်မှူး အောင်မြင့်ဦးက ကျေးရွာ အတွင်း အသက် ၃၅ နှစ် မှ အသက် ၅၅ နှစ် အကြားရှိသူများကို ရပ်ရွာကာကွယ်ရေး အဖွဲ့များ ဖွဲ့စည်းရန်ဟုဆို မဲနှိုက်ရွေးချယ်မှုများ လုပ်ဆောင်နေကြောင်း သိရှိရသည်။
မကွေးတိုင်း၊ စလင်းမြို့ပေါ် မြို့မစျေးအနီးတွင်လည်း ဧပြီလ ၃ ရက်နေ့က စျေးရောင်း/စျေးဝယ် ပြုလုပ်နေသော လူငယ် ၅ ဦးကို ပေါ်တာဆွဲ ဖမ်းဆီးသွားခဲ့ကြောင်း၊ စလင်းမြို့ပေါ်တွင် စစ်တပ်က အိမ်စီးကားများဖြင့် လိုက်လံ ဖမ်းဆီးမှုများ လုပ်ဆောင်နေကြောင်း သိရှိရသည်။
ဓာတ်ပုံ – စစ်မှုထမ်းအပတ်စဉ် ၁၁ အတွက် ဖမ်းဆီးခံရသော လူငယ်များ။
#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup #rejectmilitarycoupmyanmar
