ထားဝယ်ရေနက်ဆိပ်ကမ်း စီမံကိန်း စတင်လုပ်ဆောင်နိုင်ရန် စစ်တပ်က ရေဖြူနှင့် လောင်းလုံးတွင် စစ်ကြောင်း ၃ ကြောင်းဖြင့် ကျေးရွာများကို ဆက်တိုက် စီးနင်း၍ နယ်မြေရှင်းလင်းရေး လုပ်ဆောင်နေ

■ ပြည်သူ ၃၀ နီးပါး ဖမ်းဆီးခံရကာ ရွာပေါင်း ၂၀ ကျော်မှ ထောင်နှင့်ချီသော ပြည်သူများ ထွက်ပြေးနေရ

ရန်ကုန်၊ ဧပြီ ၄

တနင်္သာရီတိုင်း၊ ထားဝယ်ရေနက်ဆိပ်ကမ်း စီမံကိန်း စတင်လုပ်ဆောင်နိုင်ရန် အကြမ်းဖက် စစ်တပ်က ရေဖြူနှင့် လောင်းလုံးတွင် စစ်ကြောင်း ၃ ကြောင်းဖြင့် ကျေးရွာများကို ဆက်တိုက် စီးနင်းနေပြီး ပြည်သူ ၃၀ နီးပါး ဖမ်းဆီးခံရကာ ရွာပေါင်း ၂၀ ကျော်မှ ပြည်သူများ ထွက်ပြေးနေရကြောင်း လောင်းလုံးမြို့နယ် ပြည်သူ့ကာကွယ်ရေးတပ်ဖွဲ့ ပြန်ကြားရေးတာဝန်ခံ ရဲဘော်ရှဲဒိုးက ရန်ကုန်ခေတ်သစ်သတင်းဌာနထံသို့ ပြောဆိုသည်။

မတ်လ ၁၄ ရက်နေ့မှ စတင်ကာ ထားဝယ် ရေနက်ဆိပ်ကမ်း ပတ်ဝန်းကျင်ရှိ ရေဖြူမြို့နယ်နှင့် လောင်းလုံးမြို့နယ် အတွင်းကို အကြမ်းဖက် စစ်တပ်က နယ်မြေရှင်းလင်းရေးဟုဆိုကာ အင်အား ၉၀၀ နီးပါးဖြင့် စစ်ကြောင်း ၃ ကြောင်းခွဲ၍ ဆက်တိုက် ဝင်ရောက် စီးနင်းနေခြင်းဖြစ်ကြောင်း သိရသည်။

ယင်း အကြမ်းဖက် စစ်တပ် စစ်ကြောင်းသည် လမ်းတစ်လျှောက်ရှိ ပြည်သူများကိုလည်း ဆက်တိုက် ဖမ်းဆီးနေပြီး ပြည်သူ ၃၀ နီးပါး ဖမ်းဆီးခံထားရကာ ကျေးရွာ ၂၀ ကျော်မှ ထောင်နှင့်ချီသော ပြည်သူများလည်း ဘေးလွတ်ရာကို ထွက်ပြေး တိမ်းရှောင် နေရကြောင်း သိရှိရသည်။

“ရေနက်ဆိပ်ကမ်းကို သူတို့က ကျွန်တော်တို့ သိရသလောက် လွန်ခဲ့တဲ့ ၃ လပိုင်း ၁၃ ရက်နေ့လောက်က စစ်ကောင်စီက ခန့်ထားတဲ့ ဝန်ကြီးချုပ်က ပြောတယ်။ ရေနက်ဆိပ်ကမ်းကို သူတို့ စပြီးတော့ လုပ်မယ်ပေါ့။ ရေနက်ဆိပ်ကမ်းကို လုံခြုံရေးကို လုပ်ရမယ်ဆိုပြီး သူတို့ ပြောတာရှိတယ်။ ပြောပြီးတဲ့နေ့ နောက်တစ်ရက်လောက်ကနေ စပြီးတော့ စစ်ကြောင်းတစ်ကြောင်းက ဝင်လာတယ်။ ဝင်လာတဲ့ စစ်ကြောင်း ဒီနားပတ်ဝန်းကျင်မှာ စစ်ကြောင်းထိုးတယ်။ ပြီးတဲ့ အခါ ရေနက်ဆိပ်ကမ်းမှာပြန်ဝင်နေတယ်။ အဲတာပြီးတော့ ၃ လပိုင်း ၃၀ ရက်နေ့မှာ အကုန်လုံး စစ်ကြောင်း ၃ ကြောင်းက တစ်ပြိုက်နက်ဝင်လာတယ်။ အင်အားက ၈၀၀ ကျော် ၉၀၀ လောက်ရှိတယ်။ အဲဒီဟာက ရေနက်ဆိပ်ကမ်းဧရိယာထဲမှာ PDF တွေ ကာကွယ်ရေးတပ်တွေ ရှိနေတဲ့ဟာကို လုံးဝအပြတ်ရှင်းမယ့်ပုံစံမျိုးလို့ ကျွန်တော်တို့ ယူဆတာပေါ့။ သူတို့လုပ်ငန်းကို စလည်ပတ်ဖို့အတွက် ကြိုးစားနေတယ် အဲဒီလိုမျိုးပဲ မြင်တယ်” ဟု လောင်းလုံးမြို့နယ် ပြည်သူ့ကာကွယ်ရေးတပ်ဖွဲ့ ပြန်ကြားရေးတာဝန်ခံ ရဲဘော်ရှဲဒိုးက ပြောဆိုသည်။

အဆိုပါ အကြမ်းဖက် စစ်တပ် စစ်ကြောင်းသည် လက်ရှိချိန်ထိ ရေဖြူမြို့နယ်နှင့် လောင်းလုံးမြို့နယ် အတွင်းကို လှည့်ပတ်သွားလာနေပြီး ပြည်သူများကိုလည်း လူသားဒိုင်း အဖြစ်ဆက်လက် ဖမ်းဆီးထားကြောင်း၊ လက်ရှိချိန်ထိ တော်လှန်ရေး တပ်ဖွဲ့များနှင့် ထိတွေ့ တိုက်ပွဲများ ဖြစ်ပွားခြင်းမရှိသော်လည်း တိုက်ပွဲများ ဖြစ်ပွားလာနိုင်ကြောင်း သိရသည်။

လက်ရှိချိန်တွင် အကြမ်းဖက် စစ်တပ်၏ စစ်ကြောင်း ၃ ကြောင်းသည် မောင်းမကန် ၊ နဘုလယ် နှင့် ထားဝယ် ရေနက် ဆိပ်ကမ်း အနီးတို့တွင် ရှိနေပြီး တော်လှန်ရေး တပ်ဖွဲ့များနှင့် မြေပြင်တွင် စစ်ရေးဆက်တိုက် တင်းမာနေဆဲဖြစ်ကြောင်း သိရှိရသည်။

“စစ်ခွေးတွေက နယ်မြေရှင်းနေတာ ထိတွေ့မှုလည်း ဖြစ်ရင်ဖြစ်နိုင်တယ်။ ဘယ်ချိန်ထဖြစ်မလဲဆိုတာတော့ မသိဘူး။ လူတွေကတော့ အင်အားအများကြီးနဲ့ ဝင်လာတဲ့ဟာကို ကြောက်လန့်ပြီးတော့ ရှောင်နေကြတာတော့ ရှိတယ်ပေါ့။ ရေနက်ဆိပ်ကမ်းက အကောင်အထည် မဖော်သေးဘူး။ ဖော်လို့လည်း မရသေးဘူး။ဘာဖြစ်လို့လည်းဆိုတော့ ဒီဧရိယာတစ်ဝိုက်မှာက စစ်ကြောင်းတစ်ခါ လာထိုးရင် တစ်ခု တိုက်ပွဲတွေ ဖြစ်တယ်။ ပြီးရင် စစ်ကြောင်း ပြန်သွားရင် ပြန်ငြိမ်သွားတယ်။ အဲဒီလိုမျိုးပဲ ရှိနေတယ်။ ဒီနေရာကို လာပြီးတော့ လုပ်ငန်းစလုပ်မယ်ဆို မလုပ်နိုင်တဲ့ အနေအထားမှာရှိတယ်။ လုပ်ငန်းစဖို့ နယ်မြေရှင်းတဲ့ အနေအထားဟုတ်တယ်။ နယ်မြေရှင်းမှ လုပ်ငန်းစလို့ ရမှာ။ ဒါကြောင့် နယ်မြေရှင်းအောင် တစ်ခါမှ မထိုးဖူးသေးတဲ့ အင်အားနဲ့ စစ်ကြောင်းလာထိုးတာ ဒီနယ်မြေကို အပြတ်ရှင်းတာ ပြီးတဲ့အခါ လုပ်ငန်းစမှာပေါ့။ ဒီလို သဘောရှိတယ်” ဟု ရဲဘော်ရှဲဒိုးက ဆက်လက် ပြောဆိုသည်။

#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup #rejectmilitarycoupmyanmar