ရန်ကုန်၊ ဧပြီ ၄
မန္တလေးတိုင်း၊ သပိတ်ကျင်းမြို့နယ်တွင် အကြမ်းဖက် စစ်တပ်က လေယာဉ်ဖြင့် ၂ ကြိမ် ဗုံးကျဲ တိုက်ခိုက်ခဲ့ကြောင်း ခရိုင် ပကဖ မှ တာဝန်ရှိသူ တစ်ဦးက ရန်ကုန်ခေတ်သစ်သတင်းဌာနထံသို့ ပြောဆိုသည်။
ဧပြီလ ၃ ရက်နေ့ မွန်းလွဲ ၁၂ နာရီ ၄၀ မိနစ်ခန့်တွင် သပိတ်ကျင်းမြို့နယ်၊ ၇ မိုင်ရွာ အနီးကို တိုက်လေယာဉ်ဖြင့် ၂ ကြိမ် ဗုံးကျဲ တိုက်ခိုက်ခဲ့ကြောင်း၊ လေကြောင်း တိုက်ခိုက်မှုအတွင်း ပြည်သူများ ထိခိုက်မှု မရှိကြောင်း သိရသည်။
“မနေ့က သပိတ်ကျင်းမြို့နယ် ၇မိုင် ရွာအနီးကို အကြမ်းဖက် စစ်တပ်က လေကြောင်း တိုက်ခိုက်မှု ၂ ကြိမ် ပြုလုပ်သွားတယ်။ ပြည်သူတွေ အထိအခိုက်တော့ မရှိပါဘူး” ဟု ခရိုင် ပကဖ မှ တာဝန်ရှိသူ တစ်ဦးက ပြောဆိုသည်။
အလားတူ ရခိုင်ပြည်နယ်၊ စစ်တွေမြို့နယ်နှင့် ကျောက်ဖြူမြို့နယ်ရှိ ကျေးရွာတချို့ကိုလည်း အကြမ်းဖက် စစ်တပ်က လေကြောင်း၊ လက်နက်ကြီးများဖြင့် ပစ်ခတ် ဗုံးကျဲ တိုက်ခိုက်ခဲ့ကြောင်း ဒေသတွင်းသတင်းရင်းမြစ်များက ပြောဆိုသည်။
ဧပြီ ၃ ရက်နေ့ ညနေ ၅ နာရီခန့်တွင် ကျောက်ဖြူမြို့ နယ် ၊ ရန်ကုန်- ကျောက်ဖြူ ကားလမ်း တစ်လျောက်ရှိ ကုလာဘာတို့ရွာ၊ ဇိုင်းချောင်းရွာနှင့် သိုင်းချောင်းကျေးရွာ တို့ကို တိုက်ပွဲဖြစ်ပွားခြင်းမရှိဘဲ ဂျက်ဖိုက်တာ၊ ဒရုန်း နှင့် လက်နက်ကြီးတို့ဖြင့် ဗုံးကျဲ တိုက်ခိုက်ခဲ့ခြင်းဖြစ်ကြောင်း သိရသည်။
ထို့ပြင် ကျောက်ဖြူမြို့နယ် ဒိုးတန်းတောင်ရှိ အကြမ်းဖက် စစ်တပ်၏ ၃၂ တပ်ရင်းနှင့် အခြား စစ်တပ် အထိုင်ချထားသော နေရာများမှလည်း လက်နက်ကြီးများဖြင့် ပစ်ခတ်မှုများ လုပ်ဆောင်ခဲ့ပြီး ဂုံးချွန်ကျေးရွာ အနီးတဝိုက်ကိုလည်း ယင်းနေ့ နံနက် ၁၁ နာရီခန့်တွင် အကြမ်းဖက် စစ်တပ်က ဒရုန်းဗုံးသီး ၃၀ ကျော်ထက်မနည်း ဗုံးကျဲ တိုက်ခိုက်ခဲ့ပြီး လက်နက်ကြီးများဖြင့် အဆက်မပြတ် ပစ်ခတ် တိုက်ခိုက်ခဲ့ကြောင်း သိရှိရသည်။
စစ်တွေမြို့တွင်လည်း အကြမ်းဖက် စစ်တပ်၏ ၃၅၄ တပ်ရင်းက လက်နက်ကြီးများဖြင့် ပစ်ခတ်မှုများ လုပ်ဆောင်ခဲ့ပြီး မြေပြင်တွင်လည်း ထိတွေ့ တိုက်ပွဲများ ဖြစ်ပွားခြင်းမရှိကြောင်း သိရသည်။
#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup #rejectmilitarycoupmyanmar
