အင်းတော်မြို့မဘုန်းကြီးကျောင်းကို စစ်တပ်က လေယာဉ်ဖြင့် ဗုံးကျဲမှု ပြည်သူ ၂ ဦးသေဆုံးပြီး ၈ ဦးဒဏ်ရာရ ၊ ဗုဒ္ဓရုပ်ပွားတော်၊ ဘုန်းကြီးကျောင်း၊ဓမ္မာရုံ အပါအဝင် အဆောက်အအုံများပျက်စီး
ရန်ကုန်၊ ဧပြီ ၅
အကြမ်းဖက် စစ်ကောင်စီတပ်က အင်းတော်မြို့မ ဘုန်းကြီးကျောင်းကို လေယာဉ်ဖြင့် ဗုံးကျဲချခဲ့ရာ ပြည်သူ ၂ ဦးသေဆုံးပြီး ၈ ဦးဒဏ်ရာရရှိကြောင်း Indaw Revolution-IR ၏ သတင်းထုတ်ပြန်ချက်နှင့် KIA သတင်းရင်း မြစ်၏ ပြောဆိုချက်အရ သိရှိရသည်။
ဧပြီလ ၁ ရက်နေ့ မွန်းတည့် ၁၂ နာရီမှ မွန်းလွဲ ၁ နာရီအတွင်း စစ်ကောင်စီတပ်၏ တိုက်လေယာဉ် ၂ စီးက ဗုံး ၄ အင်းတော် မြို့မဘုန်းကြီးကျောင်းတည့်တည့်သို့ ကျဲချခဲ့ကြောင်း၊ အဆိုပါဗုံးကျဲချမှုကြောင့် အင်းတော်မြို့ မြို့မဘုန်းကြီးကျောင်း၊ ဆွမ်းစားဆောင်၊ဓမ္မာရုံတို့ မီးလောင်ခဲ့ပြီး ရပ်တော်မူရုပ်ပွားတော်၊ မြို့တော်ခန်းမ၊ ဓမ္မမဏ္ဍိုင်ဘုန်းကြီးကျောင်းတို့ ပျက်စီးခဲ့ကြောင်း၊ ထို့ပြင် အဆိုပါဘုန်းကြီးကျောင်းထဲတွင် စစ်ကောင်စီနှင့်အတူ ရှိနေသည့် ပြည်သူ ၂ဦးသေဆုံးခဲ့ပြီး ၈ဦး ဒဏ်ရာရရှိခဲ့ကြောင်း သိရှိရသည်။
“အင်းတော်မှာ တိုက်ပွဲဖြစ်တာမရှိဘဲ လေယာဉ်နဲ့ ဗုံးကျဲတာပါ။ စစ်ရေးက ရင်ဆိုင်ထားတာရှိတယ်။ သူတို့တပ်စခန်း ကြီးတစ်ခုတည်း ကျန်တော့တယ်။ ထိတွေ့ပစ်ခတ်တာမျိုးကတော့ အမြဲမပြတ်ရှိတယ်။ လေယာဉ်တွေကတော့ ကင်းထောက်လိုက် ဗုံးကျဲလိုက်ပဲ” ဟု KIA သတင်းရင်းမြစ်က ပြောဆိုသည်။
KIO ပြောခွင့်ရပုဂ္ဂိုလ် ဗိုလ်မှူးကြီးနော်ဘူကလည်း စစ်တပ်အနေဖြင့် အပစ်အခတ်ရပ်စဲရေးဟု တစ်ဖက်သတ် ကြေညာပြီး ၎င်း၏ ကြေညာချက်ကို ပြန်လည် ချိုးဖောက်နေကြောင်း၊ အင်းတော်ဒေသသို့ စစ်ကောင်စီတပ်က ဗုံးကျဲမှုများ လုပ်ဆောင်နေကြောင်း ဧပြီလ ၃ ရက်နေ့ ရန်ကုန်ခေတ်သစ်သတင်းဌာနထံသို့ ထုတ်ဖော်ပြောဆိုထားသည်။
အင်းတော်ဒေသသတင်းရင်းမြစ် Indaw Revolution-IR က စစ်ကောင်စီတပ်အနေဖြင့် မြို့ပေါ် ပြည်သူများ ငလျင်ဒဏ် အလူးအလဲ ခံနေရချိန် ကူညီကယ်ဆယ်ရေးတွင် ထိရောက်စွာ လုပ်ကိုင်ခြင်းမပြုဘဲ အရပ်သားပြည်သူများရှိသည့်နေရာများကို လေကြောင်းတိုက်ခိုက်မှုများ လုပ်ဆောင်နေကြောင်း၊ ငလျင်ဘေးအတွင်း စစ်တပ်၏ စီမံခန့်ခွဲမှု ညံ့ဖျင်းခြင်း၊ ပြည်သူများအပေါ် စေတနာမရှိခြင်း၊အချိန်မီကူညီကယ်ဆယ်ရေးများ မလုပ်နိုင်ခြင်းတို့ကြောင့်လည်း မသေသင့်ဘဲ သေခဲ့ရတဲ့သူများ ရှိနေကြောင်း သုံးသပ်ပြောဆိုသည်။
အကြမ်းဖက်စစ်ကောင်စီက ဧပြီလ ၂ ရက်နေ့မှ ဧပြီလ ၂၂ ရက်နေ့အထိ ရက် ၂၀ အကြာ အပစ်အခတ်ရပ်စဲရေး လုပ်ဆောင်မည်ဟု ကြေညာထားသော်လည်း လက်တွေ့တွင်မူ တစ်နိုင်ငံလုံး ထိုးစစ်များ ဆင်နွှဲကာ လေကြောင်းတိုက်ခိုက်မှုများကိုလည်း ဆက်တိုက် လုပ်ဆောင်လျက်ရှိကြောင်း တော်လှန်ရေးတပ်ဖွဲ့များနှင့် NUG က သတင်းထုတ်ပြန်ထားသည်။
