စေတုတ္တရာမြို့နယ်၊ ကူတော်ပျူစောထီးရွာအနီး ခရီးသည်တင် ကား ၂ စီးကို စစ်တပ်က ပစ်ခတ်မှု ပြည်သူ ၄ ဦးသေဆုံး
မကွေးတိုင်း၊ စေတုတ္တရာမြို့နယ်၊ ကူတော် ပျူစောထီးရွာအနီးတွင် ခရီးသည်တင် ကား ၂ စီးကို အကြမ်းဖက် စစ်တပ်က ပစ်ခတ်ခြင်းကြောင့် ပြည်သူ ၄ ဦးသေဆုံးခဲ့ကြောင်း စေတုတ္တရာမြို့နယ် ပြည်သူ့ကာကွယ်ရေးအဖွဲ့မှ တာဝန်ရှိသူ တစ်ဦးက ရန်ကုန်ခေတ်သစ် သတင်းဌာနထံသို့ ပြောဆိုသည်။
ဧပြီလ ၃ ရက်နေ့ ည ၉ နာရီခန့်အချိန် စေတုတ္တရာမြို့နယ်၊ ကူတော်ပျူစောထီးရွာနှင့် အောက်ဝေါရွာ အကြားတွင် ခရီးသည်ယာဉ် ကား ၂ စီးကို အကြမ်းဖက် စစ်ကောင်စီ တပ်သားများက ပစ်ခတ်ခဲ့ခြင်းဖြစ်ပြီး ပြည်သူ ၄ ဦးသေဆုံးခဲ့ကြောင်း သိရသည်။
အဆိုပါ တိုက်ခိုက်မှု ဖြစ်စဉ်ကို တော်လှန်ရေး တပ်ဖွဲ့များက လုပ်ဆောင်ခြင်းဖြစ်ကြောင်း အကြမ်းဖက် စစ် တပ်၏ လော်ဘီများက ဝါဒဖြန့်နေပြီး ယင်းတိုက်ခိုက်မှုဖြစ်ပွားသည့် နေရာအနီး ဧပြီလ ၁ ရက်နေ့တည်းမှ စတင်ကာ နယ်မြေရှင်းလင်းရေး လုပ်ဆောင်ခဲ့ခြင်းဖြစ်ကြောင်း၊ ယင်းနေရာတွင် အကြမ်းဖက် စစ်တပ် စစ်ကြောင်းနှင့် အင်အား ၆၀ ကျော်ခန့်ရှိသော စစ်တပ် ကင်းပုန်းတို့ ရှိကြောင်း သိရှိရသည်။
“သေဆုံးသူ ပြည်သူ ၄ ဦးလို့ ကြားတယ်။ အလောင်းတွေကို သူတို့ပဲ သယ်သွားတာဆိုတော့ အတိအကျမသိဘူး။ သူတို့က စစ်ရေးမှာ အတော် စိုးရိမ်ရလာပြီလေ ဒီနယ်က ပျူစောထီးဖွဲ့ဖို့ ခေါင်းဆောင် တွေလည်း ခဏခဏ ရှင်းခံနေရတာဆိုတော့ အဲဒါကို ပြည်သူနဲ့ ကျွန်တော်တို့ အကြား သွေးခွဲနည်းပါပဲ။ ဧပြီလ ၁ရက်နေ့ ကတည်းက စေတုတ္တရာ မြို့နယ်တောင်ပိုင်းမှာ အင်အား ၃၅ ဦးလောက်နဲ့ နယ်မြေရှင်းနေတယ်။ ဖြစ်တော့ ဧပြီ ၃ ရက်နေ့မှာ မွန်ဇော်ရွာနားကို ရောက်နေတယ်။ အဲရွာမှာ သင်တန်းဆင်း ၆၀ လောက် နဲ့ စစ်ခွေး ၅ ကောင်ရှိတယ်။ ညဆို ကင်းပုန်းဝပ်တယ်။ အဲဒီလမ်းတစ်လျှောက်မှာ စစ်ခွေး ဂိတ် ၂ ခုရှိတယ်” ဟု စေတုတ္တရာမြို့နယ် ပြည်သူ့ကာကွယ်ရေးအဖွဲ့မှ တာဝန်ရှိသူ တစ်ဦးက ပြောဆိုသည်။
အကြမ်းဖက် စစ်ကောင်စီက ယင်းဖြစ်စဉ်နှင့်ပတ်သက်၍ တော်လှန်ရေး အင်အားစုများအပေါ် ပြည်သူလူထုက အမြင်မှားစေရန် ရည်ရွယ်ချက်ရှိရှိ သတင်းထုတ်ပြန်ခဲ့ကြောင်း၊ အကြမ်းဖက် စစ်ကောင်စီ၏ ပြည်သူအပေါ် ကျူးလွန်သော ထိုလုပ်ရပ်များကို စေတုတ္တရာမြို့နယ် ပြည်သူ့ကာကွယ်ရေးအဖွဲ့အနေဖြင့် ပြင်းပြင်းထန်ထန် လက်တုံ့ပြန် သွေးကြွေးဆပ်သွားမည်ဖြစ်ကြောင်း သိရသည်။
အကြမ်းဖက်စစ်ကောင်စီက စစ်ရှုံးနိမ့်နေချိန် စစ်ရေးပစ်မှတ်နှင့် မသက်ဆိုင်သော ပြည်သူများကို ဖမ်းဆီးသတ်ဖြတ်ခြင်း၊ အများပြည်သူများနေထိုင်ရာ ရပ်ရွာတွင်းသို့ လေကြောင်းဖြင့် ဗုံးကျဲခြင်း၊ ကျေးရွာအတွင်းတပ်စွဲ၍ လူသွားလူလာရှိသော နေရာများတွင် မိုင်းထောင်ခြင်း၊ နေ့ဘက်တွင် ခရီးသွားလာခြင်းများ ကန့်သတ်၍ ငွေညှစ်ခြင်း၊ ညဘက်တွင် ပုဒ်မ ၁၄၄ ဖြင့်ညမထွက်ရအမိန့် ထုတ်၍ ခရီးသွားလာသူများကို ပစ်ခတ်သတ်ဖြတ်ခြင်း ၊ စစ်မှုထမ်းဥပဒေအား အသုံးပြု၍ ၄င်းတို့ ဖမ်းလိုသော လူများကို အတင်းအဓမ္မ ဖမ်းဆီးခြင်း ငွေညှစ်ခြင်း များလုပ်ဆောင်လျက်ရှိကြောင်း စေတုတ္တရာမြို့နယ် ပြည်သူ့ကာကွယ်ရေးအဖွဲ့မှ တာဝန်ရှိသူ ဆက်လက် ပြောဆိုသည်။
