ပဲခူးတိုင်း၊ ရေတာရှည်မြို့နယ်တွင် ဆင်ဂွေကျေးရွာအုပ်ချုပ်ရေးမှူး မျိုးဝင်းက အသက် ၁၆ နှစ်အရွယ် မိန်းကလေးငယ် အဓမ္မပြုကျင့်ခဲ့သော်လည်း ရဲနှင့်စစ်တပ်က အရေးမယူကြောင်း အဆိုပါဖြစ်စဉ်ကို သိရှိထားသူများက ရန်ကုန်ခေတ်သစ်သတင်းဌာနထံသို့ ပြောဆိုသည်။
စက်တင်ဘာလ ၂၆ ရက်နေ့ နံနက် ၉ နာရီအချိန် ရေတာရှည်မြို့နယ်၊ ဆင်ဂွေကျေးရွာတွင် ကျေးရွာအုပ်ချုပ်ရေးမှူး မျိုးဝင်းက အသက် ၁၆ နှစ်အရွယ် မိန်းကလေးငယ် နေထိုင်ရာ အိမ်သို့သွားရောက်ခဲ့ကြောင်း၊ မိန်းကလေးငယ်၏ မိဘများမှာ လယ်ထဲသို့ သွားရောက်နေချိန်ဖြစ်၍ အုပ်ချုပ်ရေးမှူး မျိုးဝင်းကို “အမေတို့ မရှိဘူး” ဟု မိန်းကလေးငယ်က ပြောဆိုခဲ့ကြောင်း၊ သို့ရာတွင် အုပ်ချုပ်ရေးမှူး မျိုးဝင်းက နေအိမ်ပေါ်သို့ အတင်းတက်၍ အတင်းအဓမ္မ ပြုကျင့်ခဲ့ကြောင်း၊ မုဒိမ်းကျင့်ခဲ့ပြီးနောက် အုပ်ချုပ်ရေးမှူး မျိုးဝင်းက ပြန်လည်ထွက်ခွာသွားခဲ့ကြောင်း သိရှိရသည်။
မိဘများ ပြန်လည်ရောက်ရှိလာသောအခါ မိန်းကလေးငယ်က အုပ်ချုပ်ရေးမှူး မျိုးဝင်းက နံနက်ပိုင်း နေအိမ်သို့ လာရောက်ပြီး အတင်းအဓမ္မပြုကျင့်ခဲ့မှုကို ငိုယိုတိုင်တန်းခဲ့ကြောင်း၊ မိဘများက သက်ဆိုင်ရာသို့ အကြောင်းကြားတိုင်တန်းသော်လည်း တစ်စုံတစ်ရာ အရေးယူမှုမရှိသဖြင့် မိန်းကလေးငယ်ကို ထပ်မံ၍ စော်ကားမည်ကို စိုးရိမ်သောကြောင့် တစ်နယ်တစ်ကျေးသို့ စေလွှတ်လိုက်ကြောင်း သိရှိရသည်။
“မိဘတွေက သမီးလေးအတွက် စိုးရိမ်ပြီး ထိုင်းကို ပို့လိုက်ပြီ။ ပြုကျင့်ခံရတဲ့ ကလေးမလေးမှာ နှလုံးရောဂါရှိလို့ ထိုင်းရောက်တဲ့အချိန်မှာ ဆေးကုသမှု ခံနေရတယ်” ဟု ဖြစ်စဉ်ကို သိရှိထားသူက ဆိုသည်
မုဒိမ်းပြုကျင့်ခဲ့သော ဆင်ဂွေကျေးရွာ အုပ်ချုပ်ရေးမှူး မျိုးဝင်းက တိုင်ကြားမှုများ လုပ်ပါက သတ်ဖြတ်မည်ဟု ခြိမ်းခြောက်ခဲ့ကြောင်း၊ ဆင်ဂွေကျေးရွာ အုပ်ချုပ်ရေးမှူး မျိုးဝင်းသည် ကျေးရွာနှင့်ပတ်ဝန်းကျင်တွင် အုပ်ချုပ်ရေးမှူး ဩဇာအာဏာသုံး၍ အလိုမတူဘဲ အမျိုးသမီးများကို မုဒိမ်းကျင့်မှုများ ကျူးလွန်ထားကြောင်း သိရှိရသည်။
“သူက စစ်တပ်ဘက်တော်သား၊ စစ်တပ်နဲ့ပေါင်းပြီး ပြည်သူလူထုအပေါ် အနိုင်ကျင့်တယ်။ အဲဒီလို မိန်းကလေး တော်တော်များများကို အလိုမတူဘဲ အဓမ္မပြုကျင့်ထားတာတွေ များတယ်။ ဘာအရေးယူမှုမှ မရှိဘူး” ဟု ဆင်ဂွေကျေးရွာတွင် နေထိုင်သော သတင်းရင်းမြစ်က ပြောဆိုသည်။
#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup #rejectmilitarycoupmyanmar
