နေပြည်တော်မှာ မဲစာရင်း မှားတယ်လို့ ဝေဖန်ခဲ့တဲ့ ဘူးလက်လှဆွေကို မနေ့ညပိုင်း စစ်တပ်က နေအိမ်ကနေ လာရောက် ခေါ်ဆောင်သွားပြီး ဒီနေ့မှာ အဆက်အသွယ်မရတော့ဘူးလို့ သိရပါတယ်။
အောက်တိုဘာလ ၅ ရက်နေ့မှာ ဘူးလက်လှဆွေက နေပြည်တော်မှာ မဲစာရင်းတွေ မှားနေတဲ့အကြောင်း၊ လူဦးရေ ၅၀၀ ရှိရင် ၃၀၀ လောက်မှားနေကြောင်း၊ သေတဲ့သူတွေ စာရင်းပါနေပြီး ရပ်ကွက်အုပ်ချုပ်ရေးမှူးနဲ့ မိသားစုတောင် မဲစာရင်း မပါကြောင်း၊ ၂၀၂၀ ရွေးကောက်ပွဲကာလ မဲစာရင်းအဟောင်းကို သုံးတယ်လို့ ယူဆကြောင်း၊ မဲစာရင်းများ အလွန်ကွာဟနေပြီး မဲစာရင်းများ ပြန်လည် ပြုပြင်ရန်ပင် အချိန် ၁ ပတ်သာ ကျန်တော့ကြောင်း၊ မဲစာရင်းမှားယွင်းမှု အဆင်မပြေကြောင်း ဘူးလက်လှဆွေက ထုတ်ဖော်ပြောဆိုခဲ့ပါတယ်။
အဲဒီနောက် အောက်တိုဘာလ ၈ ရက်နေ့ ညပိုင်းမှာ ဘူးလက်လှဆွေကို စစ်တပ်က နေအိမ်ကနေ လာရောက် ခေါ်ဆောင်သွားတယ်လို့ သတင်းတွေ ထွက်ပေါ်လာပြီး ဒီနေ့အထိ ဘူးလက်လှဆွေရဲ့ လက်ကိုင်ဖုန်းတွေကိုလည်း ဖုန်းခေါ်လို့ မရတော့ပါဘူး။
ပုံမှန်အားဖြင့် နေ့စဉ် တစ်တော့မှာ ဗီဒီယိုလေးတွေ တင်ပြီး နိုင်ငံရေး၊ စီးပွားရေး၊ အာဏာသိမ်းမှု အခြေအနေတွေကို သုံးသပ်ချက် ဗီဒီယိုလေး ဖြန့်ဝေလေ့ရှိတဲ့ လှဆွေရဲ့ တစ်တော့ အကောင့်မှာလည်း ဘာ ဗီဒီယိုမှ မတင်နိုင်တော့တာ တွေ့ရပါတယ်။
စစ်တပ်နဲ့ လော်ဘီအမည်ခံ သတင်းသမားတွေ စုဝေးနေကြတဲ့ Viber Group မှာလည်း သတင်းသမားအမည်ခံ စစ်တပ်လော်ဘီ အောင်မင်းက ဘူးလက်လှဆွေ အဖမ်းခံထားရသလားလို့ စစ်တပ်ကို မေးခွန်းထုတ်ထားပေမယ့်လည်း စစ်တပ်ဘက်ကတော့ ဘာမှ အကြောင်းမပြန်ပါဘူး။ မေးခွန်းမေးသူ အောင်မင်းဆိုတာက ခင်ရီရဲ့ အတွင်းလူယုံဖြစ်ပြီးတော့ ကြံ့ဖွတ်ရဲ့ အမာခံ လော်ဘီလည်းဖြစ်ပါတယ်။
မဲစာရင်းမှားယွင်းမှု အကြောင်းပြလို့ အာဏာသိမ်းခဲ့တဲ့ စစ်တပ်အတွက် ဘူးလက်လှဆွေရဲ့ ဝေဖန်ချက်က အရှိုက်ကို ထိုးသလို ဖြစ်သွားစေနိုင်တယ်လို့ ကြံ့ခိုင်ရေးသတင်းရင်းမြစ်က သုံးသပ်ပါတယ်။ ဒါပေမယ့် ဘူးလက်လှဆွေကို စစ်တပ်က ဖမ်းသွားတာလား၊ ခေါ်မေးနေတာလားဆိုတာကို ကြံ့ခိုင်ရေးပါတီဘက်ကလည်း ဘာမှ မသိဘူးလို့ အဲဒီသတင်းရင်းမြစ်က ဆက်ပြောပါတယ်။
ကြံ့ဖွတ်ပါတီအတွင်းမှာ မင်းအောင်လှိုင်နဲ့ စစ်တပ်ထိပ်ပိုင်းက တိုက်ရိုက်စီမံခန့်ခွဲနေတာဖြစ်ပြီး ပါတီအနေနဲ့ အတွင်းရေးတွေကို ဗဟိုကော်မတီဝင်အဆင့်ကိုတောင် သိခွင့်မရှိတော့ဘူးလို့ ကြံ့ခိုင်ရေးသတင်းရင်းမြစ်က ဆိုပါတယ်။
နေပြည်တော်၊ ပုဗ္ဗသိရိမြို့နယ်မှာ ရွေးကောက်ပွဲ ဝင်ရောက် ယှဉ်ပြိုင်မယ့် ဘူးလက်လှဆွေ အဖမ်းခံရတာလား၊ ခဏ ခေါ်မေးခံရတာလား၊ တစ်တော့မှာ သူ့ထုံးစံအတိုင်း ဗီဒိယိုအတိုတွေ တင်ပြီး ထင်မြင်သုံးသပ်ချက်တွေ ရမ်းသမ်းထပ်ပြောနေဦးမလား ဆိုတာကတော့ စောင့်ကြည့်ရဦးမှာဖြစ်ပါတယ်။
ဓာတ်ပုံ – ဘူးလက်လှဆွေဖေ့ဘုတ်စ်။
#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup #rejectmilitarycoupmyanmar
