သာကေတတွင် အသက် ၂၁ နှစ်အရွယ် မောင်ကျော်သက်ပိုင်ကို အမှတ် ၉ ရပ်ကွက်အုပ်ချုပ်ရေးမှူးနှင့်အဖွဲ့က ပေါ်တာဆွဲ ဖမ်းဆီးပြီး ငွေ ၁၂၅ သိန်းဖြင့် စစ်မှုထမ်းလူစားထိုးအဖြစ် ရောင်းစားမှု အချိန်မီ ပြန်လည် ကယ်တင်၊ ဖမ်းရောင်းသည့် အုပ်ချုပ်ရေးမှူးနှင့်အဖွဲ့ကို အမှုဖွင့်မည်

ရန်ကုန်၊ အောက်တိုဘာ ၂၃

ရန်ကုန်တိုင်း၊ သာကေတမြို့နယ်တွင် အသက် ၂၁ နှစ်အရွယ် မောင်ကျော်သက်ပိုင်ကို သာကေတ အမှတ် ၉ ရပ်ကွက်အုပ်ချုပ်ရေးမှူးနှင့်အဖွဲ့က ပေါ်တာဆွဲ ဖမ်းဆီးပြီး ငွေကျပ် ၁၂၅ သိန်းဖြင့် စစ်မှုထမ်းလူစားထိုးအဖြစ် ရောင်းစားခဲ့မှုကို အချိန်မီ ပြန်လည်ကယ်တင်နိုင်ခဲ့ကြောင်း မောင်ကျော်သက်ပိုင်၏ မိတ်ဆွေများက ရန်ကုန်ခေတ်သစ်သတင်းဌာနထံသို့ ပြောဆိုသည်။

အောက်တိုဘာလ ၁၉ ရက်နေ့ညပိုင်း မောင်ကျော်သက်ပိုင်ကို သာကေတမြို့နယ် အမှတ် ၉ ရပ်ကွက်အုပ်ချုပ်ရေးမှူးနှင့်အဖွဲ့က ပေါ်တာဆွဲ ဖမ်းဆီးသွားကြောင်း၊ ယင်းနောက် အောက်တိုဘာလ ၂၀ ရက်နေ့ ဧရာဝတီတိုင်း ကျုံပျော်မြို့ရှိ စစ်မှုထမ်းလိုအပ်နေသော ရပ်ကွက်တစ်ခုသို့ ငွေကျပ် ၁၂၅ သိန်းဖြင့်ရောင်းစားခဲ့ကြောင်း သိရှိရသည်။

“အောက်တိုဘာလ ၁၉ ရက်နေ့ညပိုင်း အပြင်မှာ ပေါ်တာဆွဲ ဖမ်းဆီးပြီးတော့ အောက်တိုဘာလ ၂၀ရက်နေ့မှာချက်ချင်းရောင်းစားခဲ့တာပါ။ လူမဖမ်းခင်ကတည်းက ကြိုတင်ချိတ်ဆက်ထားပြီးသားဆိုတာ ထင်ရှားပါတယ်” ဟု မိတ်ဆွေဖြစ်သူက ရန်ကုန်ခေတ်သစ်သတင်းဌာနထံသို့ ပြောဆိုသည်။

မောင်ကျော်သက်ပိုင်ကို ယင်းကဲ့သို့ စစ်မှုထမ်းလူစားထိုးအဖြစ် ရောင်းချလိုက်ကြောင်း သတင်းရရှိသည်နှင့် မိဘများနှင့် ဆွေမျိုးများက အောက်တို ဘာလ ၂၁ ရက်နေ့ လိုက်လံရွေးထုတ်ရာ အောက်တိုဘာလ ၂၂ ရက်နေ့တွင် ပြန်လည် ခေါ်ယူနိုင်ခဲ့ကြောင်း၊ ငွေကျပ် ၁၂၅ သိန်းပေး၍ စစ်မှုထမ်းလူစားထိုးအဖြစ် ခေါ်ယူခဲ့သော ကျုံပျော်မြို့မှ ရပ်ကွက်အုပ်ချုပ်ရေးမှူးမှာ ငွေများ ဆုံးရှုံးသွားကြောင်း သိရှိရသည်။

“ကျော်သက်ပိုင်လေးကို ရောင်းစားတာသိရတော့ မိဘတွေရော ဆိုင်ရာ ပိုင်ရာတွေနဲ့ လိုက်တဲ့အခါမှာ ကျုံပျော်မြို့မှာ ပြန်တွေ့တယ်။ ပြန်ခေါ်လို့ရတယ်။ ဟိုဘက်ကနေ ၁၂၅ သိန်းနဲ့ ဝယ်ထားတဲ့ အုပ်ကြီးကတော့ သူ့ငွေ ဆုံးတာပေါ့” ဟု ဖြစ်စဉ်ကို သေချာစွာ သိရှိထားသော မိတ်ဆွေက ရှင်းပြသည်။

ယင်းကဲ့သို့ အသက် ၂၁ နှစ်အရွယ် လူငယ် မောင်ကျော်သက်ပိုင်ကို ဖမ်းဆီးပြီး စစ်မှုထမ်းလူစားထိုးအဖြစ် ငွေကျပ် ၁၂၅ သိန်းဖြင့် ရောင်းစားခဲ့သော သာကေတမြို့နယ် အမှတ် ၉ ရပ်ကွက် အုပ်ချုပ်ရေးမှူးနှင့်အဖွဲ့ကို သာကေတမြို့နယ်၊ အမှတ် ၂ ရဲစခန်းတွင် အမှုဖွင့်လှစ်တိုင်ကြားသွားရန် စီစဉ်နေကြောင်း သိရှိရသည်။

ဓာတ်ပုံ – စစ်မှုထမ်းလူစားထိုးအဖြစ် ရောင်းစားခံခဲ့ရသော မောင်ကျော်သက်ပိုင်။

#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup #rejectmilitarycoupmyanmar